លោក Trump ៖ ខ្ញុំពិតជាមានកិត្តិយសបើបានជួបលោក Kim Jong-un
នេះជាការថ្លែងដ៏កម្របំផុតរបស់ប្រធានាធិបតីអាមេរិកដែលត្រូវបានគេទទួលស្គាល់ថា ជាមេដឹកនាំប្រើធម៌ក្ដៅមួយរូប។ លោកបានថ្លែងថា លោកមានកិត្តិយសបើបានជួបមេដឹកនាំកូរ៉េខាងជើងលោក Kim Jong-un ក្នុងកាលៈទេសៈដ៏ត្រឹមត្រូវនោះ។ នេះបើយោងតាមសេចក្ដីរាយការណ៍ពី BBC។
សារនេះគឺលោកបានថ្លែងទៅកាន់សារព័ត៌មាន Bloomberg កាលពីថ្ងៃចន្ទ កន្លងទៅ។ លោកលើកឡើងដូច្នេះថា ៖«វាគឺពិតជាផ្ដល់តម្លៃសម្រាប់ខ្ញុំដើម្បីជួបគាត់ ខ្ញុំពិតណាស់ថា មានកិត្តិយសដើម្បីធ្វើរឿងនេះ»។ ការថ្លែងនេះ ធ្វើឡើងប៉ុន្មានមុនពេលដែលលោកសរសើរលោក Kim Jong-un ថា ជាមនុស្សឆ្នាតគួរសម។
ការថ្លែងបែបនេះធ្វើឡើងស្របពេលដែលស្ថានការណ៍រវាងប្រទេសទាំងពីរកាន់តែតានតឹងឡើងជុំវិញបញ្ហានុយក្លេអ៊ែររបស់កូរ៉េខាងជើង។ សេតវិមានបានចេញសេចក្ដីថ្លែងការណ៍ភ្លាមបន្ទាប់ពីលោក Trump បានលើកឡើងបែបនេះ។ សេចក្ដីថ្លែងការណ៍អះអាងថា កូរ៉េខាងជើងត្រូវប្រឈមនឹងលក្ខខណ្ឌជាច្រើនមុនពេលដែលជំនួបរវាងមេដឹកនាំទាំងពីរកើតឡើង៕
ដោយ៖ យោធិន
