កូរ៉េខាងជើងបាញ់មីស៊ីលកម្ទេចកប៉ាល់ជាច្រើនគ្រាប់ធ្លាក់ នៅឆ្នេរភាគខាងកើត
យោងតាមមន្ត្រីយោធាកូរ៉េខាងត្បូងបានឱ្យដឹងថា នៅថ្ងៃព្រហស្បតិ៍នេះ កូរ៉េខាងជើងបានបាញ់មីស៊ីលប្រភេទកម្ទេចនាវាជាច្រើនគ្រាប់នៅឆ្នេរភាគខាងកើតរបស់ខ្លួន។ នេះជាការសាកល្បងមីស៊ីលល្បឿនលឿនជាច្រើនប្រភេទ ទោះបីជាជាសហគមន៍អន្តរជាតិកំពុងដាក់សម្ពាធយ៉ាងណាក្ដី។
ការបាញ់មីស៊ីលថ្មីនេះ គឺមានរយៈពេលមិនដល់ ១សប្ដាហ៍ផង គិតចាប់តាំងពីក្រុមប្រឹក្សាសន្តិសុខអង្គការសហប្រជាជាតិបានដាក់ទណ្ឌកម្មថ្មីៗបន្ថែមទៀតជុំវិញរឿងកម្មវិធីអភិវឌ្ឍន៍អាវុធនុយក្លេអ៊ែរនេះ។
យោងតាមសេចក្ដីប្រកាសរបស់មន្ត្រីជាន់ខ្ពស់កូរ៉េខាងត្បូង មីស៊ីលទាំងនោះត្រូវបានបាញ់ចេញពីឆ្នេរនៃទីក្រុង Wonsan នៅព្រឹកថ្ងៃព្រហស្បតិ៍នេះ ហើយមីស៊ីលបានហោះរយៈចម្ងាយប្រមាណ ២០០គីឡូម៉ែត្រមុននឹងវាធ្លាក់។
សូមបញ្ជាក់ថា ការបាញ់សាកល្បងមីស៊ីលថ្ងៃនេះ គឺជាការសាកល្បងលើកទី៤ហើយ គិតចាប់តាំងពីលោក Moon ឡើងចូលកាន់តំណែងជាប្រធានាធិបតីកូរ៉េខាងត្បូងនៅថ្ងៃទី១០ ខែឧសភា មក៕
ដោយ៖ យោធិន
ប្រភព៖ Reuters
