ប្រទេស១១ដែលការចំណាយទៅលើការសិក្សានៅសាកលវិទ្យាល័យ ថ្លៃបំផុតក្នុងលោក
ខាងក្រោមនេះ ជាប្រទេសចំនួន ១១ដែលការចំណាយលើថ្លៃការសិក្សានៅសាកលវិទ្យាល័យមានតម្លៃថ្លៃបំផុតក្នុងលោក។
១) ហុងគ្រី៖ ចំណាយប្រហែល ៣៤ ២០០ ដុល្លារក្នុងមួយឆ្នាំ ឬស្មើនឹង ៩២%នៃប្រាក់បៀវត្សរ៍។ វាមានតម្លៃបំផុត ប៉ុន្តែរដ្ឋាភិបាលហុងគ្រីក៏អនុញ្ញាតឱ្យនិស្សិតសិក្សានៅសាកលវិទ្យាល័យដោយឥតគិតថ្លៃផងដែរ ប្រសិនបើគេស្ថិតនៅក្នុងប្រទេសរយៈពេល ១០ឆ្នាំបន្ទាប់ពីបញ្ចប់ការសិក្សា ឬសងរដ្ឋវិញនៅពេលបានការងារធ្វើ។
២) រ៉ូម៉ានី៖ ចំណាយសរុប ២៥ ២០០ដុល្លារក្នុងមួយឆ្នាំ ឬស្មើនឹង ៨៦% នៃប្រាក់បៀវត្សរ៍។ ប្រទេសនេះល្បីខ្លាំងខាងជំនាញវិទ្យាសាស្ត្រ ជាពិសេសផ្នែកឱសថសាស្ត្រ។ ប្រាក់ចំណូលជាមធ្យមក្នុងមួយខែសម្រាប់មនុស្សម្នាក់ គឺប្រហែលជាង ៦៥០ដុល្លារដូច្នេះឪពុកម្ដាយមួយចំនួនពិបាកក្នុងការផ្គត់ផ្គង់លើថ្លៃសិក្សារបស់កូនៗ។
៣) អេស្តូនី៖ ចំណាយសរុប ៣៨ ៤០០ដុល្លារក្នុងមួយឆ្នាំឬស្មើនឹង ៧៦%នៃប្រាក់បៀវត្សរ៍៖ រដ្ឋាភិបាលប្រទេសនេះបានយកចិត្តទុកដាក់ខ្លាំងលើវិស័យវិទ្យាសាស្ត្រ និងបច្ចេកវិទ្យា ដូចជាវិស័យវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា។
៤) ឈីលី៖ ចំណាយសរុប ២៣ ៦០០ដុល្លារក្នុងមួយឆ្នាំ ឬស្មើនឹង ៧៣%នៃប្រាក់បៀវត្សរ៍៖ ចំណូលគិតជាមធ្យមក្នុងមនុស្សម្នាក់ប្រចាំឆ្នាំគឺប្រហែល ១៧ ៧៧៣ដុល្លារ ខណៈប្រជាជនប្រទេសនេះចំណាយច្រើនគួរសមទៅលើថ្លៃសិក្សាបុត្រធីតារបស់ពួកគេ។
៥) ម៉ាឡេស៊ី៖ ចំណាយសរុប ១៨ ០០០ដុល្លារក្នុងមួយឆ្នាំ ឬស្មើនឹង ៥៥%នៃ ប្រាក់បៀវត្សរ៍៖ ប្រទេសនេះមានសកលវិទ្យាល័យប្រហែល ២០តែតម្លៃមានការប្រកួតប្រជែងគ្នាខ្លាំង។ ទោះជាយ៉ាងណា ប្រាក់បៀវត្សរ៍មធ្យមក្នុងមនុស្សម្នាក់ក្នុងមួយខែ គឺ ៤៧០ដុល្លារ ដូច្នេះបើគ្មានអាហារូបករណ៍ ឬកម្ចី ឪពុកម្ដាយអាចនឹងទទួលបន្ទុកធំលើការបង់ថ្លៃសាលា។
៦) សហរដ្ឋអាមេរិក៖ ចំណាយសរុប ៩១ ៨៣២ដុល្លារក្នុងមួយឆ្នាំ ឬ ស្មើនឹង ៥៣%នៃប្រាក់បៀវត្សរ៍៖ មិនមែនជារឿងចម្លែកនោះទេសម្រាប់សហរដ្ឋអាមេរិកដែលថ្លៃសាលាមានតម្លៃថ្លៃបែបនេះ ព្រោះថាសកលវិទ្យាល័យល្អៗក្នុងលោកមានច្រើនណាស់នៅក្នុងប្រទេសមហាអំណាចសេដ្ឋកិច្ចមួយនេះ។
៧) អ៊ុយក្រែន៖ ២៣ ២០០ដុល្លារក្នុងមួយខែ ឬស្មើនឹង ៥២%នៃប្រាក់បៀវត្សរ៍៖ ប្រទេសនេះមានសាកលវិទ្យាល័យច្រើនជាងសាកលវិទ្យាល័យនៅអ៊ីតាលី បារាំង អាល្លឺម៉ង់ ប៉ូឡូញ និងបែលហ្សិកបូកបញ្ចូលគ្នាទៅទៀត។ ប្រទេសនេះទើបសម្រេចកាត់បន្ថយចំនួនសាកលវិទ្យាល័យពី ៩០០មកនៅសល់ត្រឹម ២០០ប៉ុន្មានឆ្នាំនេះ។
៨) លីទុយអានី៖ ចំណាយតម្លៃ ២៣ ៩០៤ដុល្លារក្នុងមួយឆ្នាំឬស្មើនឹង ៤៨% នៃប្រាក់បៀវត្សរ៍៖ និស្សិតធ្លាប់ផ្ទុះការតវ៉ាប៉ុន្មានឆ្នាំមុនដោយសារតែកំណែទម្រង់របស់រដ្ឋាភិបាលលីទុយអានី ធ្វើឱ្យថ្លៃសាលាកើនឡើងខ្លាំង។
៩) ចក្រភពអង់គ្លេស៖ ចំណាយប្រហែល ៤០២៩០ដុល្លារ ឬស្មើនឹង ៤២%នៃប្រាក់បៀវត្សរ៍៖ សាកលវិទ្យាល័យល្អៗជាច្រើនស្ថិតនៅក្នុងប្រទេសនេះ ហើយអង់គ្លេសជាប្រទេសទីពីរក្នុងលោកដែលទាក់ទាញនិស្សិតក្រៅប្រទេសទៅសិក្សាច្រើន។
១០) សិង្ហបុរី៖ ចំណាយប្រហែល ៣៥៤០០ដុល្លារក្នុងមួយឆ្នាំឬស្មើនឹង ៣៦%នៃប្រាក់បៀវត្សរ៍៖ ប្រទេសដែនកោះមួយនេះមានសាកលវិទ្យាល័យរដ្ឋតែ៥ប៉ុណ្ណោះប៉ុន្តែបើនិយាយថ្លៃសិក្សាមហាវិទ្យាល័យវេជ្ជសាស្ត្រថ្លៃមែនទែនតែម្ដង។ ទោះជាយ៉ាងណា ប្រទេសនេះជាប្រទេសអ្នកមានទីបីក្នុងលោក។
១១) ជប៉ុន៖ ចំណាយតម្លៃ ២៤០០០ដុល្លារក្នុងមួយឆ្នាំឬស្មើនឹង ១៨%នៃប្រាក់បៀវត្សរ៍៖ មហាអំណាចសេដ្ឋកិច្ចអាស៊ីមួយនេះ មានសាកលវិទ្យាល័យប្រមាណ ៥០០នៅទូទាំងប្រទេសដែលធ្វើឱ្យតម្លៃរាងធូរថ្លៃជាងបណ្ដាប្រទេសមួយចំនួនបន្តិច៕
ដោយ៖ រតនៈ វិភូ
