កំហុស ៤ យ៉ាងដែលអ្នកជំនួញច្រើនតែធ្វើខុសជាមួយលុយរបស់ពួកគេ
ជាការពិតណាស់ ការចាប់ផ្តើមជំនួញថ្មីមួយមិនមែនជារឿងងាយស្រួលនោះទេ ហើយប្រសិនជាចង់ឲ្យជំនួញជោគជ័យទៀតនោះ វារឹតតែមិនងាយស្រួលទៅទៀត។ ក្នុងមួយឆ្នាំៗមានជំនួញថ្មីថ្មោងជាច្រើនបានកើតឡើង ប៉ុន្តែមិនមានជំនួញច្រើនទេដែលជោគជ័យនោះ។
ខាងក្រោមនេះជាកំហុសមួយចំនួនដែលអ្នកអាចជៀសវាងបាននិងសិក្សាបាន៖
១) មិនទាន់ចេះគ្រប់គ្រងលុយបានល្អ
ដើមទុនដំបូងក្នុងការកកើតជំនួញពិតជាមានសារៈសំខាន់ខ្លាំងណាស់ ដូច្នេះហើយរាល់ចំណាយនិងចំណូលរបស់ក្រុមហ៊ុនត្រូវតែគ្រប់គ្រងឲ្យបានល្អបំផុត។ បើយោងតាម Association of Chartered Certified Accountants ៨២ភាគរយដែលធ្វើឲ្យជំនួញឈានដល់ការបិទទ្វារនោះដោយសារតែការបង្វិលលុយមិនទាន់។
២) ចាប់ផ្តើមជួយសប្បុរសធម៌ឆាប់ពេក
ពិតប្រាកដណាស់ សម្រាប់ជំនួញដែលទើបតែបើកថ្មីថ្មោង លុយពិតជាដើរតួយ៉ាងសំខាន់ក្នុងការទ្រទ្រង់ជំនួញឲ្យដើរទៅមុខនិងពង្រីកឲ្យកាន់តែធំ។ ក្នុងន័យនេះ មិនមែនមានន័យថាអ្នកមិនគួរតបស្នងឬជួយសង្គមវិញទេ តែអ្នកគួរតែចាំដល់ជំនួញរបស់អ្នកដើរបាននឹងនរជាមុនសិន។
៣) ជ្រើសរើសបុគ្គលិកខុស
ការជ្រើសរើសបុគ្គលខុសនឹងខ្ជះខ្ជាយលុយរបស់អ្នកជាច្រើន ពីព្រោះថាអ្នកអាចនឹងត្រូវចំណាយលើវគ្គបណ្ដុះបណ្ដាលដល់បុគ្គលិកហើយសមត្ថភាពរបស់ពួកគេនៅមានកម្រិត។ ផ្ទុយទៅវិញ ជួលបុគ្គលដែលមានជំនាញច្បាស់លាស់បើទោះជាត្រូវចំណាយច្រើនក៏ដោយ តែពួកគេនឹងជួយឲ្យក្រុមហ៊ុនដើរទៅមុខបាន។
៤) ការចំណាយខុស
មានអ្នកជំនួញជាច្រើនចំណាយលុយសម្រាប់បង្កើនគុណភាពផលិតផល តែមិនចំណាយទៅលើទីផ្សារនោះទេ។ ប្រសិនជាអ្នកចំណាយលុយទៅលើតែផលិតផលដោយមិនរកទីផ្សារដើម្បីលក់ចេញ នោះអ្នកនឹងខកចំណូលជាច្រើនដែលអាចធ្វើឲ្យជំនួញរបស់អ្នកបិទទ្វារបាន៕
ប្រែសម្រួល៖ អឹុង មុយយូ
ប្រភព៖ entrepreneur.com
