ប្រធានាធិបតីអាមេរិក Trump៖ «ខ្ញុំមិនចង់ឱ្យមនុស្សក្រីក្រម្នាក់ដឹកមុខសេដ្ឋកិច្ចជាតិនោះទេ»
«ខ្ញុំមិនចង់ឱ្យមនុស្សក្រីក្រម្នាក់ដឹកមុខសេដ្ឋកិច្ចជាតិនោះទេ» នេះជាពាក្យមួយឃ្លាដែលលោកប្រធានាធិបតីអាមេរិក Donald Trump ថ្លែងកាលពីពេលថ្មីៗនេះ។ លោកបានពន្យល់យ៉ាងសាមញ្ញទៅកាន់គណៈរដ្ឋមន្ត្រីរបស់លោកថា អ្នកមានដឹងពីវិធីគ្រប់គ្រងលុយជាងអ្នកក្រ។
ការថ្លែងរបស់ប្រធានាធិបតីអាមេរិកនៅពេលនេះ គឺឆ្លើយតបទៅនឹង ការរិះគន់លើការជ្រើសរើសមហាសេដ្ឋីមួយចំនួនឱ្យចូលបម្រើការងារផ្នែកសេដ្ឋកិច្ចកំពូលរបស់ប្រទេសជាតិមានដូចជា ការតែងតាំងលោក Wilbur Ross អតីតវិនិយោគិនមានលុយពាន់លានជារដ្ឋមន្ត្រីក្រសួងពាណិជ្ជកម្ម អតីតប្រធានក្រុមហ៊ុនហិរញ្ញវត្ថុដ៏ធំនៅអាមេរិក Goldman Sachs លោក Gary Cohn ជាប្រធានទីប្រឹក្សាសេដ្ឋកិច្ច ជាដើម។
ការថ្លែងរបស់លោក នាពេលនេះ គឺធ្វើឡើងកាលពីថ្ងៃពុធ ហើយលោកបានប្រកាន់គោលជំហរមួយគឺថា អ្នកមាន អាចដឹកនាំសេដ្ឋកិច្ចអាមេរិកបានប្រសើរព្រោះថា ពួកគេមានលុយស្រាប់ហើយ ពួកគេមិនត្រូវការលុយទៀតទេ។ លោកបានថ្លែងបែបនេះ ៖«ខ្ញុំស្រលាញ់មនុស្សគ្រប់គ្នា មិនថាអ្នកមាន ឬអ្នកក្រ។ ប៉ុន្តែមុខតំណែងមួយចំនួន ខ្ញុំមិនត្រូវការអ្នកក្រឱ្យមកកាន់ការងារនោះទេ។ ថាតើរឿងនេះវាសមហេតុសមផលទេ? ប្រសិនបើអ្នកទទូចប្រឆាំង ខ្ញុំនឹងធ្វើវា។ ប៉ុន្តែខ្ញុំពេញចិត្តថាផ្លូវនេះគឺប្រសើរជាង ពិតទេ?»៕
ដោយ៖ យោធិន
