ការទស្សន៍ទាយរបស់នីកូឡា តេស្លា ប្រហែល១០០ឆ្នាំមុន ឥឡូវក្លាយជាការពិត
បិតាអគ្គិសនីរបស់ពិភពលោក នីកូឡា តេស្លា ធ្លាប់ទស្សន៍ទាយថា នៅពេលអនាគតមនុស្សលោកយើងនឹងអាចប្រាស្រ័យទាក់ទងគ្នាបានដោយពុំមានរបាំងរារាំងពីចម្ងាយនោះឡើយ។ ឥឡូវនេះ ការទស្សន៍ទាយរបស់គាត់មិនត្រឹមតែក្លាយជាការពិតនោះទេ តែថែមទាំងមានឧបករណ៍បច្ចេកវិទ្យាទំនើបជាច្រើនកំពុងតែផ្លាស់ប្ដូររបៀបនៅក្នុងការប្រាស្រ័យទាក់ទងរបស់មនុស្សលោកឲ្យកាន់តែងាយស្រួលនិងឈ្លាសវៃ ដែលមានមូលដ្ឋានចេញពីគំនិតតែមួយ។ តើអ្នកធ្លាប់ឆ្ងល់ទេថា អ្វីទៅដែលអាចឲ្យអ្នកទំនាក់ទំនងទៅកាន់មនុស្សម្នាក់ទៀត ដែលនៅឆ្ងាយពីអ្នករាប់គីឡូដី ហាក់ដូចជាមានវេទមន្តដូច្នោះបាន ? វេទមន្តនេះគឺជារលកវិទ្យុនេះឯង។
ប្រភពរូប៖ Pinterest
រលកវិទ្យុគឺជាបាតុភូតធម្មជាតិមួយ ដែលកើតចេញពីដុំភ្លើងដ៏ធំមួយដែលមានចម្ងាយជាង១៤៩លានគីឡូម៉ែត្រពីភពផែនដីរបស់យើងនេះ ដែលជាព្រះអាទិត្យនេះឯង។ អ៊ីសាក់ ញូតុន គឺជារូបវិទូនិងគណិតវិទូដំបូងបង្អស់ដែលបានរកឃើញធម្មជាតិនៃពន្លឺ។ ពន្លឺពណ៌សរបស់ព្រះអាទិត្យដែលបំភ្លឺភពផែនដីយើងទាំងមូលនេះ គឺជាការផ្គុំបញ្ចូលគ្នារបស់ពន្លឺ៧ពណ៌ ដូចដែលយើងឃើញនៅពេលមានឥន្ទធនូ។ ពន្លឺរបស់ព្រះអាទិត្យដែលអាចឲ្យយើងមើលឃើញបាននេះ គឺជាកាំរស្មីអេឡិចត្រូម៉ាញេទិចមួយប្រភេទនៅក្នុងចំណោមវិសាលភាពនៃកាំរស្មីអេឡិចត្រូម៉ាញេទិចទាំងអស់ដែលព្រះអាទិត្យបានបញ្ចេញ។ ហេតុនេះទើបកាំរស្មីពន្លឺនេះត្រូវបានគេហៅថា ពន្លឺមើលឃើញ។
រលកវិទ្យុគឺជាសមាជិកក្នុងគ្រួសារតែមួយជាមួយនឹងពន្លឺមើលឃើញ។ រលកវិទ្យុអាចធ្វើដំណើរចាប់ពី១ម៉ែត្រទៅ១០,០០០ម៉ែត្រ។ លក្ខណៈដែលរលកវិទ្យុអាចធ្វើដំណើរបានចម្ងាយឆ្ងាយជាងគេបង្អស់ក្នុងចំណោមវិសាលភាពនៃកាំរស្មីអេឡិចត្រូម៉ាញេទិច ដែលបង្កឡើងពីកាំរស្មីចំនួន៧ប្រភេទនេះ ធ្វើឲ្យវាមានប្រយោជន៍សម្រាប់ការប្រើប្រាស់បញ្ជូនរលកសញ្ញាក្នុងអាកាសទៅវិញទៅមក និងឆ្លងកាត់ជម្រៅទឹក ដែលធ្វើឲ្យមនុស្សនៅចម្ងាយខុសគ្នាដូចមេឃនិងដីមានអារម្មណ៍ហាក់ដូចជានៅក្បែរខ្លួននេះឯង។ វិសាលភាពនៃកាំរស្មីអេឡិចត្រូម៉ាញេទិចរបស់ព្រះអាទិត្យ បង្កឡើងពីកាំរស្មី៧ប្រភេទ។ អ្វីដែលកំណត់ភាពខុសគ្នារវាងប្រភេទកាំរស្មីនីមួយៗ ស្ថិតនៅត្រង់ជំហានរលក (តាងដោយ λ) ប្រេកង់ (តាងដោយf) និងថាមពល។ ពន្លឺគឺជារលក។
ទោះបីជាប្រភេទកាំរស្មីទាំង៧នេះខុសពីគ្នាអាស្រ័យលើចំណុចទាំង៣នោះក៏ដោយ ប៉ុន្តែពន្លឺទាំងនោះសុទ្ធតែធ្វើដំណើរចម្ងាយ៣០០លានម៉ែត្រក្នុង១វិនាទី ជាល្បឿនដ៏លឿនបំផុតដែលគ្មានវត្ថុអ្វីនៅលើចក្រវាលលឿនជាងពន្លឺទៀតនោះឡើយ។ ចុះតើអ្វីទៅគឺជាAMនិងFM ដែលអ្នកធ្លាប់ឃើញមាននៅក្នុងវិទ្យុរបស់អ្នក ? AM មកពីពាក្យពេញ Amplitude Modulating មានន័យថាដំណើរផ្លាស់ប្ដូររបស់អំព្លីទុត។ អំព្លីទុតគឺជារយៈកម្ពស់ឬជារយៈទទឹងដែលរលកដាលបាន។ នៅពេលគេប្រើប្រាស់AM អំព្លីទុតនឹងផ្លាស់ប្ដូរឡើងចុះៗ ដោយរក្សាទុកប្រេកង់ឬសំដៅទៅលើចំនួនដែលរលកដាលបានក្នុង១វិនាទីឲ្យនៅថេរ។ FM មកពីពាក្យពេញ Frequency Modulating មានន័យថាដំណើរផ្លាស់ប្ដូររបស់ប្រេកង់។ FM ខុសពីAM ម្ដងនេះប្រេកង់ជាអ្នកផ្លាស់ប្ដូរ ឯអំព្លីទុតឬរយៈកម្ពស់ដែលរលកដាលបានរក្សានៅថេរដដែលវិញ។
រលកវិទ្យុអាចធ្វើដំណើរបានឆ្ងាយជាងគេបង្អស់ ដែលមានន័យថាជំហានរលករបស់វាអាចដាលបានវែងជាងគេបង្អស់។ បើកាលណាជំហានរលកកាន់តែវែង ប្រេកង់និងថាមពលកាន់តែទាបជាងគេ។ ដូច្នេះហើយទើបគេអាចប្រើប្រាស់រលកវិទ្យុក្នុងការប្រើប្រាស់ប្រចាំថ្ងៃ ដើម្បីបញ្ជូនរលកសញ្ញាបានរយៈចម្ងាយឆ្ងាយនិងមានសុវត្ថិភាព។ បើទោះជាគុណភាពនៃការបញ្ជូនសញ្ញារបស់រលកវិទ្យុមានភាពខ្សោយ ក្រៅពីប្រើប្រាស់នៅក្នុងវិទ្យុ ទូរទស្សន៍ និងឧបករណ៍អេឡិចត្រូនិកច្រើនរាប់មិនអស់ទៀត ក៏វាត្រូវបានគេប្រើប្រាស់សម្រាប់ការទាក់ទងនៅក្នុងជម្រៅជ្រៅដូចក្រោមទឹកផងដែរ៕
ដោយ៖ ស្រីពៅ
