តើអត្ថន័យនៃការស្ដាប់ដោយក្តីគោពគឺជាអ្វី ?
បើអ្នកនិយាយ អ្នកគ្រាន់តែរំលឹកឡើងវិញនូវអ្វីដែលខ្លួនឯងចេះហើយប៉ុណ្ណោះ ប៉ុន្តែបើអ្នកស្ដាប់វិញ អ្នកប្រហែលជាអាចរៀនបានអ្វីដែលអ្នកមិនទាន់ចេះទាល់តែសោះ។ យ៉ាងណាមិញ ការស្ដាប់មិនត្រឹមតែបង្កើនការចេះដឹងរបស់អ្នកពីមនុស្សជុំវិញខ្លួនប៉ុណ្ណោះទេ តែថែមទាំងជាការបង្ហាញពីការគោរពរបស់អ្នកចំពោះបុគ្គលម្នាក់នោះផងដែរ។
ប្រភពរូប៖ Freepik
មនុស្សម្នាក់ៗច្រើនតែចូលចិត្តនិយាយអួតអាងពីការចេះដឹងរបស់ខ្លួនទៅកាន់អ្នកដទៃ ប៉ុន្តែបើអ្នកសាកចំណាយពេលវេលាបន្តិចដើម្បីអត់ធ្មត់ស្ដាប់អ្នកដទៃ នោះអ្នកនឹងទទួលបានរបស់មានតម្លៃមកវិញជាមិនខាន។ ដូចគ្នានឹងការផ្ដល់ដំបូន្មានចំពោះអ្នកដទៃ ឬជាមនុស្សជាទីស្រឡាញ់ ឬជាមិត្តភ័ក្ដិក៏ដោយ ពេលខ្លះអ្វីដែលមនុស្សត្រូវការបំផុត សុំត្រឹមតែជាត្រចៀកចាំស្ដាប់ ដើម្បីឲ្យយល់ពីបញ្ហាក្នុងចិត្តពួកគេប៉ុណ្ណោះ។
អ្នកត្រូវចាំថា ថ្នាំស័ក្ដិសិទ្ធិពូកែប៉ុណ្ណាក៏ដោយ បើថ្នាំនេះមិនត្រូវនឹងប្រភេទជំងឺរបស់អ្នកជំងឺម្នាក់នោះទេ ថ្នាំដ៏ស័ក្ដិសិទ្ធិនេះនៅតែឥតប្រយោជន៍ដូចតែគ្នាទេ។ នេះមានន័យថា ស្ថានការណ៍អ្នកនិងស្ថានការណ៍មនុស្សម្នាក់ទៀតមិនដូចគ្នានោះឡើយ។ ថ្វីត្បិតតែអ្វីដែលគេនិយាយប្រាប់អ្នក អាចស្រដៀងនឹងស្ថានការណ៍ដែលអ្នកធ្លាប់ជួប និងឆ្លងកាត់ តែចូរអ្នកស្ដាប់គេឲ្យចប់សិន សាកសួរដេញដោលគេឲ្យអស់សិន សឹមគិតគូរថាតើបើនិយាយពីបទពិសោធន៍របស់ខ្លួនឯងនិងផ្ដល់ដំបូន្មានទៅកាន់ម្នាក់នោះអាចនឹងជួយពួកគេបានឬអត់។ នៅពេលអ្នកជជីកសួរឲ្យដឹងឫសគល់ហើយ ការពិតនិងស្ថានភាពជាក់ស្ដែងរបស់បុគ្គលម្នាក់នោះអាចហួសពីអ្វីដែលអ្នកអាចរំពឹងទុកទៅទៀតក៏ថាបាន។
ការស្ដាប់បង្ហាញពីការគោរព និងសេចក្ដីស្រឡាញ់ ប៉ុន្តែរបស់ដែលមិនអស់ប្រាក់កាសនេះបែរជាពិបាកសម្រាប់មនុស្សភាគច្រើននៅក្នុងសង្គមទៅវិញ។ ចង់ស្គាល់មនុស្សម្នាក់ឲ្យច្បាស់ មិនមែនជួបគេតែម្ដងពីរដង អ្នកនឹងស្គាល់អត្តចរិតពិតរបស់មនុស្សម្នាក់បាននោះឡើយ។ ពេលខ្លះ មនុស្សដែលនៅក្បែរអ្នកស្ទើរតែពេញមួយជីវិតទៅហើយ តែអ្នកក៏នៅតែមិនអាចស្គាល់ពីអត្តចរិតពិតរបស់ពួកគេដែរ។ មនុស្សដែលអង្គុយក្បែរអ្នកនិងជិតដិតនឹងអ្នកបំផុត អាចគ្រាន់តែជាផ្ទាំងទឹកកកផ្នែកខាងលើតូចមួយនៅលើមហាសមុទ្រដ៏ជ្រៅហួសប្រមាណតែប៉ុណ្ណោះ។ បើសិនជាពួកគេមករកអ្នកតែពេលជួបទុក្ខលំបាក អ្នកមិនគួរអន់ចិត្តនោះឡើយ តែគួរតែសប្បាយចិត្តវិញទៅ។ មនុស្សទាំងនេះមិនងាយនឹងប្រាប់ទុក្ខលំបាកទៅនរណាម្នាក់នោះឡើយ តែបើគេប្រាប់អ្នកមានន័យថាគេទុកចិត្តអ្នកជាងគេហើយ។ ទំនុកចិត្តសំខាន់ជាងក្ដីស្រឡាញ់ទៅទៀត។
ពេលវេលាត្រឹមត្រូវ កាលៈទេសៈត្រឹមត្រូវ ពួកគេនឹងប្រាប់រឿងក្នុងចិត្តដល់អ្នកជាមិនខាន។ ការផ្ដល់ដំបូន្មានដល់គេទាំងដែលអ្នកមិនទាន់បានសិក្សាលម្អិតពីស្ថានភាពជាក់ស្ដែងរបស់គេផងនោះ ដំបូន្មានអ្នកអាចល្អនិងមានតម្លៃ ប៉ុន្តែបើដំបូន្មានឬដំណោះស្រាយរបស់អ្នកមិនត្រូវនឹងបញ្ហារបស់គេទេ អ្នកអាចនឹងបាត់បង់ទំនុកចិត្តពីគេក៏ថាបាន ដូចអ្នកជំងឺដែលឈប់ទៅរកពេទ្យដែលព្យាបាលជំងឺខ្លួនមិនត្រូវដូច្នោះដែរ។ ដូច្នេះ អ្នកត្រូវស្ដាប់ដោយការគោរពនិងយកចិត្តទុកដាក់ ដើម្បីឲ្យបញ្ហាត្រូវបានបកមួយស្រទាប់ៗរហូតចូលទៅដល់ឫសគល់នៃបញ្ហារបស់មនុស្សពិតប្រាកដ លុះដំបូន្មាននឹងមានប្រសិទ្ធភាពមិនខាន៕
ដោយ៖ ស្រីពៅ
