ហេតុអ្វីក្នុងការរាប់អានមិត្ត អ្នកគួរផ្ដោតលើគុណភាព ជាជាងបរិមាណ?
មនុស្សទាំងអស់សុទ្ធតែអាចមានឥទ្ធិពលមកលើជីវិតអ្នក។ នៅពេលអ្នកចង់ឲ្យជីវិតរបស់អ្នកវិជ្ជមាននិងល្អប្រសើរ អ្នកមិនអាចទៅផ្លាស់ប្ដូរអ្នកទាំងនោះដើម្បីឲ្យពួកគេមានឥទ្ធិពលវិជ្ជមានមកលើជីវិតអ្នកនោះឡើយ។ យ៉ាងណាមិញ អ្វីដែលអ្នកត្រូវផ្លាស់ប្ដូរ គឺដកចេញនូវមនុស្សទាំងឡាយណា ដែលមិនសមនឹងស្ថិតនៅក្នុងរង្វង់នៃជីវិតរបស់អ្នក។ របស់មានតម្លៃមិនសម្បូរនោះទេ តែបើវាសម្បូរនោះវាពុំមែនជារបស់មានតម្លៃឡើយ។ ចំណែកឯមិត្តភាពពិតក៏ដូចគ្នាដែរ។
បើអ្នកផ្ដោតទៅលើបរិមាណ អ្នកនឹងទទួលបានមិត្តភ័ក្ដិច្រើន តែបើអ្នកផ្ដោតទៅលើគុណភាព នោះអ្នកនឹងទទួលបានមិត្តភ័ក្ដិតិចតែជាមិត្តពិតប្រាកដសម្រាប់អ្នក។ មិត្តភាពពិតនិងសេចក្ដីស្រឡាញ់ពិតគឺជារឿង២យ៉ាងដែលអ្នកមិនត្រូវដេញតាមនៅក្នុងជីវិត។ បើអ្នកកាន់តែដេញតាមចាប់របស់ទាំងនេះប៉ុណ្ណា របស់ទាំងនេះនឹងកាន់តែរត់ចេញឆ្ងាយពីអ្នកប៉ុននោះ។
ចុងក្រោយអ្វីដែលអ្នកទទួលបានគ្រាន់តែជារបស់ដែលមិនមានតម្លៃប៉ុណ្ណោះ វាមានតែនាំឲ្យជីវិតអ្នកទទួលរងឥទ្ធិពលអវិជ្ជមាន និងខាតបង់ពេលវេលាឥតប្រយោជន៍នេះឯង។ នៅពេលណាអ្នកមិនខ្វល់ខ្វាយពីអ្នកក្រៅ មិនខ្វល់ខ្វាយថាតើអ្នកមានមិត្តភ័ក្ដិឬអត់ មិនខ្វល់ខ្វាយថាតើមានគេចូលចិត្តអ្នកឬអត់ គេគិតយ៉ាងណាមកលើអ្នក ហើយងាកមកផ្ដោតទៅលើខ្លួនឯង បង្ហាញពីអ្វីដែលជាធាតុពិតរបស់ខ្លួន ទោះល្អក្ដីអាក្រក់ក្ដី គេទទួលស្គាល់ក្ដីមិនទទួលស្គាល់ក្ដី គេចូលចិត្តឬអត់ នោះមានតែមនុស្សត្រឹមត្រូវនិងពិតប្រាកដប៉ុណ្ណោះដែលនឹងចាប់ផ្ដើមចូលមកក្នុងជីវិតអ្នកដោយខ្លួនឯង។
នៅពេលអ្នកមិនលាក់បាំងពីធាតុពិតរបស់ខ្លួន អ្នកនឹងឆក់ទាញបានមនុស្សដែលស្មោះត្រង់ជាមួយអ្នក។ អ្វីដែលបញ្ជាក់ពីសេចក្ដីពិតរបស់ពួកគេក្នុងនាមជាមិត្តភ័ក្ដិអ្នក ស្ថិតនៅត្រង់ពាក្យពិតរបស់ពួកគេ ដែលមានគោលដៅចង់ឲ្យអ្នកល្អតែម្យ៉ាងគត់ ទោះពាក្យពិតល្វីងជូរចត់ក៏ដោយ។ ពួកគេនឹងប្រគល់ទំនុកចិត្តរបស់ពួកគេមកលើអ្នក ហើយអ្នកត្រូវចាំថាទំនុកចិត្តសំខាន់ជាងក្ដីស្រឡាញ់ទៅទៀត។ ចំណុចដ៏កម្រទាំងនេះ អ្នកនឹងរកមិនបានឡើយនៅក្នុងមិត្តភ័ក្ដិដែលក្លែងក្លាយជាច្រើននោះ។ វាមិនមែនជាបរិមាណនោះឡើយដែលអ្នកត្រូវផ្ដោតទៅលើ តែគឺជាគុណភាពនេះឯង៕
ដោយ៖ ស្រីពៅ
