អ្វីខ្លះដែលអាចជាមូលហេតុនៃការចាកចេញរបស់បុគ្គលិក?
គ្មាននរណាម្នាក់អាចបំពេញចិត្តមនុស្សគ្រប់គ្នាបានទាំងអស់នោះទេ ហើយវាក៏ជារឿងឥតបានការនោះដែរដែលអ្នកត្រូវព្យាយាមធ្វើបែបនោះ។ បុគ្គលិកសុំលាឈប់ពីក្រុមហ៊ុនរបស់អ្នក ហើយអ្នកក៏ត្រូវជួលបុគ្គលិកថ្មីមកទៀត គឺជារឿងធម្មតាសម្រាប់គ្រប់ក្រុមហ៊ុននោះទេ។ យ៉ាងណាមិញបើសិនជាបុគ្គលិកចាកចេញពីក្រុមហ៊ុនរបស់អ្នកមានច្រើនខុសពីធម្មតា នោះអ្នកប្រហែលជាបានសាងនូវកំហុសណាមួយដែលអ្នកមិនបានយកចិត្តទុកដាក់ត្រួតពិនិត្យមើលបញ្ហានោះឲ្យបានដិតដល់ហើយ។ តើបញ្ហាទាំងនោះអាចជាបញ្ហាអ្វីខ្លះ ?
១) អ្នកមិនបានផ្ដល់ឱកាសសម្រាប់ឲ្យបុគ្គលិកទទួលបានការអភិវឌ្ឍសមត្ថភាពរបស់ពួកគេ៖ វាអាចមានឫសគល់ចេញមកពីរបៀបដែលអ្នកដឹកនាំគ្រប់គ្រងពួកគេ។ អ្នកអាចនឹងគ្រប់គ្រងត្រួតត្រាពួកគេជ្រុលហួសហេតុពេករហូតទាល់តែមិនមានសេសសល់ចន្លោះអ្វីសោះសម្រាប់ឲ្យពួកគេបានបញ្ចេញនូវសក្ដានុពលពិតប្រាកដរបស់ខ្លួន។ អ្នកអាចនឹងជាអ្នកដឹកនាំមួយរូបដែលចូលចិត្តបង្គាប់បញ្ជាឲ្យបុគ្គលិកធ្វើការទៅតាមរបៀបរបស់ខ្លួនពីដើមរហូតដល់ចប់ ដោយមិនមានចន្លោះសម្រាប់ភាពច្នៃប្រឌិតរបស់បុគ្គលិកលេចឡើងមកបាន។ នៅពេលអ្នកដោះស្រាយបញ្ហាទៅតាមរបៀបចាស់កំរិលដដែលៗ ដោយរំពឹងទុកនូវលទ្ធផលជាសមិទ្ធផលអស្ចារ្យ នោះវានឹងមិនអាចទៅរួចនោះឡើយ។ នៅពេលបុគ្គលិកមិនមានការអភិវឌ្ឍសមត្ថភាពរបស់ខ្លួន នោះភាពរីកចម្រើនរបស់ក្រុមហ៊ុនអ្នកក៏មានការប៉ះពាល់ដូចគ្នាដែរ។
២) អ្នកមិនខ្វាយខ្វល់ពីសុខទុក្ខក្នុងជីវិតផ្ទាល់ខ្លួនរបស់ពួកគេ៖ ថ្វីត្បិតតែការងារនិងរឿងផ្ទាល់ខ្លួនត្រូវចែកឲ្យដាច់នៅពេលអ្នកត្រូវបំពេញបេសកកម្មសំខាន់ៗ ប៉ុន្តែឥរិយាបថដែលអ្នកមិនខ្វាយខ្វល់ពីសុខទុក្ខកូនចៅអ្នក នឹងបង្កើតនូវភាពល្អក់កករនៅក្នុងទំនាក់ទំនងអ្នកជាមួយនឹងពួកគេ។ នៅពេលរឿងនេះកើតឡើង វាក៏ប៉ះពាល់ដល់ទឹកចិត្តនិងកម្លាំងចិត្តដែលពួកគេប្រឹងប្រែងធ្វើការដើម្បីសម្រេចភាពជោគជ័យឲ្យអ្នកផងដែរ។ អ្នកអាចជាមេដឹកនាំដ៏មានទេពកោសល្យនិងឈ្លាសវៃមួយរូបក្នុងក្រុមហ៊ុនរបស់អ្នក ប៉ុន្តែបើសិនជាអ្នកមិនអាចសូម្បីតែយល់ពីអ្នកដទៃផងនោះ នោះវាក៏នឹងទាញទម្លាក់នូវភាពអស្ចារ្យរបស់អ្នកដែលមាននៅក្នុងសមត្ថភាពណាមួយនោះដែរ។
៣) អ្នកមិនចេះស្ដាប់អ្នកដទៃ៖ មនុស្សជាច្រើនគិតថាមនុស្សដែលពូកែវោហារច្រើន សុទ្ធតែជាមនុស្សឆ្លាតនិងមានការចេះដឹងច្រើន។ ប៉ុន្តែការពិតគឺមិនមែនសុទ្ធតែបែបនេះទាំងអស់នោះទេ។ មនុស្សដែលចេះដឹងស៊ីជម្រៅច្រើន អាចជាមនុស្សដែលមិនពូកែវោហារច្រើនដូចអ្នកដទៃទៀត តែពួកគេជាមនុស្សពូកែស្ដាប់និងចាំរៀនសូត្រស្វែងយល់ពីគំនិតរបស់អ្នកដទៃទៅវិញ។ បើទោះអ្នកជាមេដឹកនាំគេ តែក៏មិនប្រាកដថាអ្នកចេះជាងពួកគេគ្រប់រឿងទាំងអស់ ឬក៏គំនិតរបស់អ្នកល្អនិងត្រឹមត្រូវជាងពួកគេគ្រប់កាលៈទេសៈទាំងអស់នោះដែរ។ ដូច្នេះអ្នកត្រូវចេះស្ដាប់គេផង។ នៅពេលអ្នកចេះស្ដាប់ពួកគេ នោះអ្នកមិនត្រឹមតែអាចរៀនអ្វីម្យ៉ាងពីពួកគេប៉ុណ្ណោះទេ តែអ្នកថែមទាំងទទួលបានការគោរពស្រឡាញ់ពីពួកគេផងដែរ៕
ដោយ៖ ស្រីពៅ
