ការបរាជ័យរបស់បុគ្គលជោគជ័យ ៣រូប ដែលបញ្ជាក់ថា អ្នកក៏អាចទទួលជោគជ័យដូចពួកគាត់ដែរ
១) លោក James Dyson មុនពេលលោក James Dyson បានក្លាយជាអ្នកច្នៃប្រឌិតវត្ថុដ៏ជោគជ័យមួយរូបរបស់ចក្រភពអង់គ្លេស លោកធ្លាប់បានប្រើពេលអស់១៥ឆ្នាំ និងបរាជ័យទៅលើគំរូជាង៥ពាន់ទម្រាំតែអាចបង្កើតម៉ាស៊ីនបូមធូលីលំដាប់ពិភពលោក។ លោកគឺជាម្ចាស់ក្រុមហ៊ុន Dyson Company ដែលមិនត្រឹមតែផលិតម៉ាស៊ីនបូមធូលីប៉ុណ្ណោះទេ តែនៅផលិតម៉ាស៊ីនសម្ងួតដៃ និងម៉ាស៊ីនកម្ដៅទៀតផង ហើយបើយោងតាមប្រភពរបស់ Forbes គាត់គឺជាមហាសេដ្ឋីដែលមានទ្រព្យសម្បត្តិចំនួន៥.៥ពាន់លានដុល្លារ។ កាលពីឆ្នាំ២០១៧ ក្រុមហ៊ុនរបស់គាត់បានធ្វើការទៅលើរថយន្តដើរដោយអគ្គិសនីរបស់ពួកគេ ហើយវានឹងត្រូវបានដាក់ដំណើរការជាសាធារណនៅឆ្នាំ២០២០ខាងមុខនេះ។
២) លោកស្រី Arianna Huffington បើអ្នកធ្លាប់បានអានសារព័ត៌មានបែបឌីជីថលដ៏ល្បីឈ្មោះមួយរបស់ពិភពលោកដែលមានឈ្មោះថា The Huffington Post នោះគឺលោកស្រី Huffington នេះឯងដែលជាស្ថាបនិកដែលបានបង្កើតសារព័ត៌មាននេះឡើងក្នុងឆ្នាំ២០០៥។ វាគឺជាសារព័ត៌មានដែលសរសេរទាំងព័ត៌មានក្នុងស្រុកនិងអន្តរជាតិ។ ប៉ុន្តែ HuffPost ត្រូវបានលក់ឲ្យ AOL ដែលជាក្រុមហ៊ុនផ្ដល់សេវាកម្មអនឡាញ ក្នុងតម្លៃ ៣១៥លានដុល្លារ ហើយបានឲ្យលោកស្រីធ្វើជាប្រធានផ្នែកកែសម្រួលរបស់សារព័ត៌មាននេះ។ ទោះជាយ៉ាងណាក៏ដោយ មុនពេលលោកស្រីបានជោគជ័យក្នុងការបង្កើតសារព័ត៌មានដែលត្រូវបានគេទទួលស្គាល់ពេញពិភពលោកមួយនេះឡើង លោកស្រីធ្លាប់បាននិពន្ធសៀវភៅមួយ និងធ្លាប់ត្រូវបានអ្នកចេញផ្សាយចំនួន ៣៦នាក់បដិសេធ។
៣) លោក Milton Hershey កើតនៅឆ្នាំ១៨៥៧និងស្លាប់ក្នងឆ្នាំ១៩៤៥ លោក Hershey គឺជាស្ថាបនិករបស់រោងចក្រឧស្សាហកម្មផលិតសូកូឡាដ៏ល្បីឈ្មោះជាងគេមួយរបស់ពិភពលោក ដែលមានឈ្មោះថា The Hershey Company។ សូកូឡា Heyshey របស់លោកត្រូវបានបន្តចែកចាយលក់នៅជាង៦០ប្រទេសជុំវិញពិភពលោក។ នៅមុនពេលសូកូឡារបស់លោកទទួលបានការគាំទ្រពីមនុស្សជាច្រើនបែបនេះ លោកធ្លាប់បានបើកក្រុមហ៊ុនផលិតស្ករគ្រាប់ចំនួន៣ក្រុមហ៊ុនដាច់ៗពីគ្នា តែជាអកុសលក្រុមហ៊ុនទាំង៣នេះបានទទួលនូវភាពបរាជ័យទាំងអស់៕
ដោយ៖ ស្រីពៅ សូមអាន៖ មហាសេដ្ឋីពិភពលោក ៣ រូបដែលជោគជ័យ តែធ្លាប់ហែលឆ្លងភាពក្រីក្រនិងជូរចត់ជាច្រើន
