លោក ហោ ចាន់រដ្ឋា៖ សម្អាងលើ ៣ចំណុចនេះធ្វើឲ្យខ្ញុំហ៊ានលក់សៀវភៅ «ភាពជាអ្នកមានកំពូល» តម្លៃ ៣០ដុល្លារ
លោក ហោ ចាន់រដ្ឋា អ្នកស្រាវជ្រាវភាពជាអ្នកដឹកនាំបានចំណាយរយៈពេល ៨ឆ្នាំនៅក្នុងការស្រាវជ្រាវនិងបានចងក្រងជាសៀវភៅ «ភាពជាអ្នកមានកំពូល» ក្នុងគោលបំណងសាបព្រោះនូវគោលគំនិតភាពជាអ្នកមានកំពូលលំដាប់ពិភពលោករបស់បុគ្គលជោគជ័យនិងល្បីល្បាញដែលមានស្នាដៃលេចធ្លោក្នុងសាកលលោកមកដល់កម្ពុជាក៏ដូចជាកូនខ្មែរជំនាន់ក្រោយ។
ក្នុងបទសម្ភាសន៍ជាមួយក្រុមការងារ BizKhmer លោក ចាន់រដ្ឋា បានលើកឡើងថា យើងដឹងហើយថាសៀវភៅភាគច្រើនដែលដាក់លក់នៅកម្ពុជាគឺមានតម្លៃត្រឹម ១០ដុល្លាទៅ២០ដុល្លាត្រូវបានគេចាត់ទុកជាសៀវភៅដែលមានតម្លៃខ្ពស់និងកម្រមានអ្នកហ៊ានទិញណាស់ ប៉ុន្តែលោក ហ៊ានលក់សៀវភៅរបស់ខ្លួនរហូតដល់ទៅ ៣០ដុល្លាក្នុងមួយក្បាល។ នេះជាហេតុផល ៣សំខាន់ៗ ដែលនាំឱ្យលោកសម្រេចចិត្តបែបនេះ៖ លោកបានលើកឡើងថាទី១ ៖ «សៀវភៅនេះគឺជាអត្តសញ្ញាណនៃគុណភាពដែលផ្តោតទៅលើខ្លឹមសារ និងសោភ័ណភាព យើងកំពុងតែសរសេរសៀវភៅមួយដែលអាចនិយាយបានថា ជាសៀវភៅចម្លើយ ឬជាគម្ពីដើម្បីក្លាយទៅជាអ្នកមាន ដែលមិនមែនត្រឹមតែជាអ្នកមានទេប៉ុន្តែគឺជាអ្នកមានកំពូលថែមទៀត ហើយនៅមុនពេលដែលសៀវភៅនេះចេញផ្សាយយើងបានឲ្យអ្នកដឹកនាំយើងចំនួន ៣៣រូប អានថាតើសៀវភៅនេះពិតជាល្អមែនឬទេសម្រាប់កូនខ្មែរ ហើយល្អឬទេសម្រាប់អ្នកមានស្រុកខ្មែរដូច្នេះនៅពេលដែលគាត់មើលហើយគឺពួកគាត់គាំទ្រ នៅពេលដែលលក់សៀវភៅនេះថោកពេកខ្ញុំខ្លាចថាវានឹងក្លាយទៅជាសៀវភៅដែលគ្មានតម្លៃ ហេតុអ្វីយើងនិយាយពី៣០ដុល្លារ គឺមានន័យថាយើងយើងមានគុណភាពមួយដែលយើងហ៊ានលក់វា»។ ទី២៖ «យើងចង់ឲ្យតម្លៃ នៃការនិពន្ធផ្ដោតទៅលើគុណភាព និងចង់ឲ្យឃើញថាអ្នកនិពន្ធថ្ងៃក្រោយក៏អាចក្លាយទៅជាមនុស្សដែលអាចមានបានដោយសារសៀវភៅរបស់គាត់ដែរ បើមិនដូច្នេះទេអ្នកនិពន្ធយើងគឺគាត់និងគ្មានកម្លាំងនៅក្នុងការតែងនិពន្ធនោះទេ ដូច្នេះយើងត្រូវតែហ៊ានក្នុងការប្រកួតប្រជែង បើយើងខំសរសេរសៀវភៅមួយដ៏អស្ចារ្យប៉ុន្តែយើងបែជាមិនហ៊ានថ្លៃតើអ្នកនិពន្ធស្រុកខ្មែរនិងទៅជាយ៉ាងណា ប៉ុន្តែបើសិនជាយើងខំធ្វើឲ្យសៀវភៅនោះឲ្យមានគុណភាពហើយលក់ថ្លៃយើងនឹងអាចជួយផ្លូវអ្នកនិពន្ធខ្មែរឲ្យមានគុណភាពនិងលក់បានថ្លៃ»។ ទី៣៖ «ដោយសារខ្ញុំសរសេរសៀវភៅពីរបៀបធ្វើឲ្យមនុស្សក្លាយទៅជាអ្នកមាន ដោយនៅក្នុងសៀវភៅនេះវាមានជាគំរូ ឬក៏របៀបរហូតដល់ទៅ៣០ ដូច្នេះមួយគំរូឬក៏មួយរបៀបដើម្បីក្លាយទៅជាអ្នកមានមានតម្លៃត្រឹមតែមួយដុល្លាទេ បើសិនជាយើងមិនធ្វើឲ្យមនុស្សមានការវិនិយោគដូច្នេះទេ មានន័យថាអ្នកមានប្រហែលជាមិនមែនជារបស់ពួកគាត់ទេសូម្បីតែ៣០ដុល្លារ គាត់មិនហ៊ានវិនិយោគផង ហើយចង់ក្លាយជាអ្នកមានសួរថាតើគាត់អាចធ្វើអ្វីដែលកើត»។
ស្ថាបនិក Rotha Leading រូបនេះបាន មានប្រសាសន៍បន្ថែមទៀតថា ៖«ខ្ញុំមិនសូវខ្វល់ពីរឿងខ្លាចថាគេមិនជួយទិញសៀវភៅខ្ញុំទេ ការខ្វល់របស់ខ្ញុំគឺខ្ញុំខ្វល់ថាធ្វើយ៉ាងម៉េចដើម្បីឲ្យគេគាំទ្រ ធ្វើយ៉ាងម៉េចដើម្បីឲ្យសៀវភៅនេះមានគុណភាព តើធ្វើយ៉ាងម៉េចដើម្បីឲ្យសៀវភៅនេះក្លាយទៅជាសៀវភៅចម្លើយសំរាប់ឲ្យមនុស្សគ្រប់គ្នាអាចក្លាយជាអ្នកមាន ហើយពេលនេះគឺយើងមានភាពក្លាហានគ្រប់គ្រាន់នៅក្នុងការប្រកាស់ប្រាប់កម្ពុជាថា មនុស្សគ្រប់គ្នាគឺអាចក្លាយជាអ្នកមាន ដូច្នេះតើធ្វើយ៉ាងម៉េច? សៀវភៅនេះគឺជាចម្លើយ ប្រសិនបើអ្នកមើលសៀវភៅនេះហើយ អ្នកមិនអាចរកឃើញចម្លើយថាធ្វើម៉េចដើម្បីអាចក្លាយជាអ្នកមានទេ ពួកគាត់អាចទំនាក់ទំនងមកកាន់ខ្ញុំដែលជារដ្ឋាលីដឌីងបាន ព្រោះក្នុងនាមខ្ញុំជាអ្នកសរសេរសៀវភៅនេះខ្ញុំពិតជារកឃើញថាសៀវភៅនេះគឺពិតជាមានវិធីសម្បូរបែបណាស់នៅក្នុងការធ្វើឲ្យមនុស្សក្លាយជាអ្នកមានបានយ៉ាងពិតប្រាកដ»។ លោក ហោ ចាន់រដ្ឋា បានប្រាប់ BizKhmer មុនបញ្ចប់បទសម្ភាសន៍ដូច្នេះថា ៖ "ខ្ញុំជឿថា បើកម្ពុជាមានសៀវភៅនេះគ្រប់គ្នានោះកម្ពុជានឹងគ្មានលេសតទៅទៀត ដែលនិយាយថា មិនដឹងធ្វើម៉េចដើម្បីក្លាយជាអ្នកមាន".៕
