នាដើមខែថ្មីនេះ កម្ពុជាទទួលបានគម្រោងវិនិយោគបន្ថែមចំនួន៨ សរុបទុនវិនិយោគប្រមាណជិត៥០លានដុល្លារ
សម្រាប់ដើមខែកុម្ភៈនេះ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍកម្ពុជាបានផ្ដល់ការអនុញ្ញាត និងបានផ្ដល់វិញ្ញាបនប័ត្រចុះបញ្ជីជាស្ថាពរជូនដល់ក្រុមហ៊ុនចំនួន៨លើគម្រោងសាងសង់រោងចក្រ ដែលមានទីតាំងភូមិសាស្រ្តស្ថិតនៅ រាជធានីភ្នំពេញ ខេត្តកំពង់ស្ពឺ និងក្នុងតំបន់សេដ្ឋកិច្ចពិសេស ខេត្តក្រចេះ ខេត្តស្វាយរៀង និងខេត្តព្រះសីហនុ ដោយសរុបទុនវិនិយោគប្រមាណ ៤៩,០៤ លានដុល្លារអាមេរិក និងផ្ដល់ឱកាសការងារប្រមាណ ៧៣១៦កន្លែង។
ក្រុមហ៊ុន “SHINING (CAMBODIA) BELT & BAG CO.,LTD.” គម្រោងបង្កើតរោងចក្រផលិតខ្សែក្រវាត់ និងកាបូបគ្រប់ប្រភេទ ដែលមានទីតាំងវិនិយោគស្ថិតនៅដីឡូត៍ A ភូមិព្រៃខ្វាវ ឃុំរកាកោះ ស្រុកគងពិសី ខេត្តកំពង់ស្ពឺ មានទុនវិនិយោគប្រមាណ ៣,៣៦លានដុល្លារអាមេរិក និងអាចបង្កើតការងារបានចំនួន ៧៣៥កន្លែង។
ក្រុមហ៊ុន “FIDELITY (CAMBODIA) HANDBAG FACTORY CO.,LTD.” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅ ភូមិព្រែកតាកែ សង្កាត់បឹងធំ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ៣,៦០លានដុល្លារអាមេរិក និងអាចបង្កើតការងារបានចំនួន ១ ៧៤៥កន្លែង។
ក្រុមហ៊ុន “PARTAGE (CAMBODIA) CO.,LTD.” គម្រោងបង្កើតរោងចក្រផលិតកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិសង្គ្រោះជាតិ ឃុំត្រពាំងគង ស្រុងសំរោងទង ខេត្តកំពង់ស្ពឺ មានទុនវិនិយោគប្រមាណ ៥,៦៨លានដុល្លារអាមេរិក និងអាចបង្កើតការងារបានចំនួន ២ ០៥៩កន្លែង។
ក្រុមហ៊ុន “JIN BAO LI (CAMBODIA) CO.,LTD.” គម្រោងបង្កើតរោងចក្រផលិតកាបូប និងគ្រឿងបន្សំកាបូបគ្រប់ប្រភេទ ដែលមានទីតាំងវិនិយោគស្ថិតនៅភូមិកន្ទោកជើង សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ២,៣៧លានដុល្លារអាមេរិក និងអាចបង្កើតការងារបានចំនួន ១ ១២២កន្លែង។
ក្រុមហ៊ុន “FASHION HOUSEWARE (CAMBODIA) CO.,LTD”: គម្រោងបង្កើតរោងចក្រផលិតសម្ភារៈក្នុងផ្ទះ គ្រឿងតុបតែងក្នុងពិធីបុណ្យណូអែល សម្ភារៈសម្រាប់ម៉ាស៊ីនដេរ និងសម្ភារៈផ្សេងៗទៀត មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ មានទុនវិនិយោគចំនួន ១០លានដុល្លារអាមេរិក និងអាចបង្កើតការងារបានចំនួន ៤៦៤កន្លែង។
ក្រុមហ៊ុន “TUBAO (CAMBODIA) DECORATION MATERIAL CO.,LTD”: គម្រោងបង្កើតរោងចក្រផលិតក្តារប៉ាកេ និងក្តារបន្ទះ មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសក្រុងព្រះសីហនុ ខេត្តព្រះសីហនុ មានទុនវិនិយោគចំនួន ១,៥លានដុល្លារអាមេរិក និងអាចបង្កើតការងារបានចំនួន ១០០កន្លែង។
ក្រុមហ៊ុន “ZHONGQI LIHUI CABLE CO.,LTD”: គម្រោងបង្កើតរោងចក្រផលិតខ្សែភ្លើង និងខ្សែកាប មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសយូ ប៊ី អ៊ី ស្នួល ខេត្តក្រចេះ មានទុនវិនិយោគចំនួន ២០,១លានដុល្លារអាមេរិក និងអាចបង្កើតការងារបានចំនួន ៤៣៩កន្លែង។
ក្រុមហ៊ុន “WINTIME (CAMBODIA) CO.,LTD”: គម្រោងបង្កើតរោងចក្រផលិតដើមណូអែល គ្រឿងលម្អ និងអំពូលភ្លើងលម្អគ្រប់ប្រភេទ មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសមេនហាតធេន ខេត្តស្វាយរៀង មានទុនវិនិយោគប្រមាណ ២,៤៣លានដុល្លារអាមេរិក និងអាចបង្កើតការងារបានចំនួន ៦៥១កន្លែង៕
អត្ថបទដោយ៖ ជួប ស្រីរ័ត្ន
