ក្នុងនាមជាម្ចាស់ក្រុមហ៊ុន តើអ្នកគួរធ្វើយ៉ាងណាដើម្បីឲ្យក្រុមការងារមានការគ្រប់គ្រងល្អ?
ក្រុមការងារគឺជាស្នូលរបស់ក្រុមហ៊ុន ដរាបណាក្រុមហ៊ុនមួយមានកម្លាំងជាក្រុមខ្លាំងក្លាហើយនោះ ទោះមានបញ្ហាអ្វីក៏ឡើង ក៏មិនអាចមកបំបាក់បានដែរ។ ហេតុដូចនេះហើយក្នុងនាមខ្លួនអ្នកជាម្ចាស់ក្រុមហ៊ុនមួយរូបនោះ តើអ្នកគួរតែមានយុទ្ធសាស្ត្របែបណាខ្លះដើម្បីបង្កើនសមត្ថភាពគ្រប់គ្រងក្រុមការងាររបស់ខ្លួន?
១) ជ្រើសរើសអ្នកណាដែលឆ្លាតជាងអ្នក៖ ពេលខ្លះអ្នកអាចរវល់ ដល់ថ្នាក់ខ្វះពេលវេលាក្នុងការគ្រប់គ្រងក្រុមហ៊ុន។ ដូចនេះអ្នកអាចជួលនរណាម្នាក់មកក៏បានដែលពួកគេអាចមានសមត្ថភាពគ្រប់គ្រាន់ក្នុងការដឹកនាំ ប្រកបដោយភាពឆ្លាតវាងវៃ និងមានដំណោះស្រាយល្អៗ ជានិច្ចសម្រាប់ប្រធានក្រុមហ៊ុន ។
២) មានគោលដៅច្បាស់លាស់៖ កាលណាអ្នកកំណត់គោលដៅច្បាស់លាស់មួយ អ្នកងាយនឹងដឹកនាំក្រុមឲ្យទៅរកភាពជោគជ័យណាស់។ ម្នាក់ៗគឺសុទ្ធតែដឹងថាត្រូវធ្វើដំណើរទៅទិសដៅណាទាំងអស់។
៣) គួរតែឧស្សាហ៍ប្រជុំ៖ ការប្រជុំគឺជាការត្រួសត្រាយផ្លូវ ក្នុងការឈានទៅរកគោលដៅ។ រាល់បញ្ហានិងវិបត្តិទាំងឡាយអាចនឹងត្រូវដោះស្រាយក្នុងអង្គប្រជុំ។ ប៉ុន្តែ បុគ្គលិកខ្លះហាក់ដូចជាមិនសូវចូលចិត្តការប្រជុំទាល់តែសោះ ដោយសារពួកគេលើកឡើងថា ការប្រជុំច្រើនគឺនាំឲ្យខាតបង់ពេលវេលា ម្យ៉ាងទៀតពួកគាត់ត្រូវយកពេលវេលានោះមកធ្វើការងារដែលនៅសេសសល់គឺល្អជាង។ ប៉ុន្តែនេះគ្រាន់តែជាលេសប៉ុណ្ណោះ។ បើលោកអ្នកជាប់អន្ទាក់នៃការគិតបែបនេះហើយនោះ រាល់ការប្រជុំមិនថាសំខាន់ប៉ុណ្ណោះ វានឹងប្រែក្លាយទៅជាអត់ប្រយោជន៍៕
ប្រែសម្រួល៖ ព្រំ សុវណ្ណកណ្ណិកា ប្រភព៖ Forbes.com
