តើគួរធ្វើយ៉ាងណា ពេលមានគំនិតខ្វែងគ្នានៅកន្លែងធ្វើការ?
តាមពិតទៅ នៅកន្លែងណាក៏ដោយជម្លោះគឺជៀសមិនផុត តែម្ដង។ តែជម្លោះអស់ទាំងនោះ ពេលខ្លះវានាំទៅរកភាពវិជ្ជមាន ហើយពេលខ្លះទៀតក៏នាំទៅរកភាពអវិជ្ជមានដូចគ្នា។ ដូចនេះហើយ ដើម្បីចៀសវាងកុំឲ្យវាឈានទៅរកភាពអវិជ្ជមានបាន លុះត្រាអ្នកចេះពីរបៀបក្នុងការគ្រប់គ្រងរាល់ពេលមានគំនិត វិវាទគ្នា! តើក្នុងនោះមានអ្វីខ្លះ?
១) សួរគំនិតពីមនុស្សម្នាក់ទៅមនុស្សម្នាក់ទៀត៖ ក្នុងនាមអ្នក ជាអ្នកសម្របសម្រួល កុំឲ្យមានវិវាទការងារ មុនដំបូងបង្អស់ អ្នកគួរដើរសួរក្រុមការងារម្ដងម្នាក់ ម្ដងម្នាក់ ថាតើពេលណាដែលពួកគេគិតថាសមស្របក្នុងការប្រជុំមួយ។ បន្ទាប់មក ជ្រើសរើសទីកន្លែងស្ងប់ស្ងាត់ណាមួយដើម្បីប្រជុំពីបញ្ហាដែលកើតមាន កុំឲ្យមានភាពរញ៉េរញ៉ៃ។
២) ផ្ដោតសំខាន់លើអាកប្បកិរិយា មិនមែនអត្តចរិត៖ មានន័យថា ក្នុងនាមជាអ្នកសម្របសម្រួល ការវិវាទគ្នានៅកន្លែងធ្វើការ អ្នកគួរតែមើលអាកប្បកិរិយា របស់បុគ្គលិកម្នាក់ៗ ថា តើពួកគេសម្ដែងភាពពេញចិត្តឬមិនពេញចិត្តនៅកន្លែងធ្វើការ។ មែនមែនសម្លឹងមើលអត្តចរិតរបស់គាត់ ទេ ព្រោះថាអត្តចរិតគឺជាអ្វីដែលពួកគេមានតាំងពីកំណើតមកហើយ មិនមែនមកពីមជ្ឈដ្ឋានការងារដែលជះមកលើគាត់នោះឡើយ។
៣) ស្ដាប់ឲ្យបានច្បាស់៖ អ្នកគួរតែត្រៀមខ្លួន ទៅស្ដាប់ មតិយោបល់ របស់ពួកគាត់។ មិនមែន ទៅស្ដាប់ ដូចមិនចង់ស្ដាប់នោះឡើយ ម្យ៉ាងទៀត គួរតែជៀសវាងការរំខានឬកាត់សម្ដីពួកគេ ដើម្បីជៀសវាងកុំឲ្យវិវាទការងារកាន់តែរីកធំទៅៗ ។
៤) បង្កើតគោលការណ៍ហើយដើរតាមវាភ្លាម៖ វាជាចំណុចសំខាន់ ហើយក៏ជាចំណុចចុងក្រោយ ។ អ្នកគួរតែព្យាយាមប្រជុំ រហូតទាល់តែបានដំណោះស្រាយ បន្ទាប់មក គូសផ្លូវដើរតាមតែអាចធ្វើបាន រួចសឹមនាំគ្នាដើរតាម។ កាលណាអ្នកទាំងអស់គ្នាបានព្រមព្រាងថានឹងដើរតាមផ្លូវណាហើយនោះ វិវាទការងារក៏នឹងលែងមានតទៅទៀត ៕
ប្រែសម្រួល៖ ព្រំ សុវណ្ណកណ្ណិកា ប្រភព៖ blink.com
