អនុវត្តដំបូន្មានជីវិតនិងជំនួញទាំង ១០ របស់លោក Bill Gates ធានាថាអ្នកនឹងជោគជ័យច្រើន
លោក Bill Gates ត្រូវបានគេទទួលស្គាល់ថា ជាអ្នកមានជាងគេបំផុតទី២ក្នុងលោក និងជាមហាសេដ្ឋីសប្បុរសបំផុតមួយក្នុងដែលបានបរិច្ចាគប្រាក់រាប់សិបពាន់លានដុល្លារដើម្បីសកម្មភាពមនុស្សធម៌នៅជុំវិញពិភពលោក។ ជាមួយនឹងទ្រព្យសម្បត្តិប្រមាណជិត ១០០ ពាន់លានដុល្លារ មហាសេដ្ឋីវ័យ ៦៣ ឆ្នាំរូបនេះទទួលបានជោគជ័យខ្លាំងណាស់លើមុខជំនួញពីក្រុមហ៊ុន Microsoft របស់លោក។ ទន្ទឹមនឹងភាពជោគជ័យនេះ លោកបានចែករំលែកដំបូន្មានចំនួន ១០ ដ៏មានតម្លៃសម្រាប់ភាពជោគជ័យក្នុងជីវិត និងជំនួញ។
១.ចង់បង្កើតក្រុមហ៊ុនមួយពីបាតដៃទទេ អ្នកត្រូវការថាមពលច្រើនណាស់ អ្នកត្រូវការកម្លាំងថាមពលច្រើនដើម្បីលុបបំបាត់ចោលនូវភាពមន្ទិលសង្ស័យដែលមានជាប់នៅក្នុងខួរក្បាលរបស់អ្នក និងដើម្បីយកឈ្នះភាពភ័យខ្លាចដែលនឹងកើតមានឡើងជាមួយនឹងហានិភ័យធំៗជាច្រើន។ អ្វីដែលសំខាន់ជាងនេះទៀតទៅនោះ គឺពេលវេលាគ្រប់គ្រងលើថាមពលរបស់អ្នក។ នៅពេលអ្នកដើរចេញពីមហាវិទ្យាល័យ ដើម្បីចាប់អាជីពជាអ្នកជំនួញ អ្នកនៅមានចំណុចខ្វះខាតក្នុងការអនុវត្តជំនាញរបស់អ្នក ចំណេះដឹង និងទំនាក់ទំនងជាដើម។ អ្នកត្រូវធ្វើផង ដកស្រង់បទពិសោធន៍ផង ហើយប្រសិនបើជំនួញនោះធ្វើឲ្យអ្នកមានអារម្មណ៍ល្អប្រសើរជាងមុន អ្នកត្រូវពង្រឹងភាពជាសហគ្រិនរបស់អ្នកបន្តិចម្តងៗ។ នៅពេលអ្នកមានបទពិសោធន៍ច្រើនហើយ ត្រូវបង្កើនថាមពលរបស់អ្នកឲ្យកាន់តែខ្លាំងឡើងៗដើម្បីភាពជោគជ័យខាងមុខ។
២.ឥទ្ធិពលល្អពីអ្នកដទៃមិនគ្រប់គ្រាន់ទេ អ្នកក៏ត្រូវការឥទ្ធិពលមិនល្អដែរ នៅត្រង់នេះមានន័យថា បើអ្នកចង់បានឥទ្ធិពលមិនល្អពីអ្នកដទៃ អ្នកមិនចាំបាច់ត្រូវការមនុស្សដែលប្រាប់អ្នកឲ្យធ្វើអ្វីដែលគ្រោះថ្នាក់ដល់ខ្លួនឯង ឬអ្នកដទៃ។ នៅក្នុងជីវិតរបស់អ្នក អ្នកត្រូវការនរណាម្នាក់ដែលជឿជាក់លើអ្នក ហើយជំរុញអ្នកឲ្យចេះចាប់យកឱកាសការងាររបស់អ្នក។ ប៉ុន្តែអ្នកក៏ត្រូវការរៀនសូត្រពីមនុស្សមិនល្អដែរ ពីព្រោះថា បើគ្មានឧបសគ្គ ឬរឿងមិនល្អកើតមានឡើងមកលើអ្នកនោះទេ អ្នកមិនអាចទទួលបានរង្វាន់កាដូគួរឲ្យភ្ញាក់ផ្អើលអ្វីនោះដែរ។ អ្នកចង់បានបទពិសោធន៍ ឬឥទ្ធិពលអាក្រក់ដែលនឹងនាំអ្នកដើរចេញពីភាពទន់ខ្សោយ និងចង្អុលបង្ហាញអ្នកអំពីហានិភ័យដែលនាំទៅរកភាពជោគជ័យ។
៣.ខិតខំប្រឹងប្រែងឲ្យអស់ពីលទ្ធភាព ប្រសិនបើអ្នកចង់ជោគជ័យ អ្នកពិតជាត្រូវការខិតខំប្រឹងប្រែងខ្លាំងណាស់។អ្នកត្រូវខំជាងអ្នកដទៃឲ្យបានច្រើនដង គេងតិចម៉ោងជាងអ្នកដទៃ។ ប្រសិនបើអ្នកធ្វើជាសហគ្រិន ពេលវេលាធ្វើការពី ៩ មក ៥ ម៉ោងក្នុងមួយថ្ងៃពិតជាមិនអាចទៅរួចនោះទេ។ ស្របពេលដែលអ្នកចំណាយពេលលើគ្រួសាររបស់អ្នក អ្នកក៏ត្រូវចំណាយពេលច្រើនផងដែរលើមុខជំនួញរបស់អ្នក។ ចំណុចពីរនេះ អ្នកត្រូវធ្វើវាឲ្យមានតុល្យភាព បើមិនដូច្នេះទេ អ្នកអាចជោគជ័យក្នុងជំនួញ ប៉ុន្តែមិនជោគជ័យក្នុងជីវិតគូ ឬជោគជ័យក្នុងជីវិតគូ ប៉ុន្តែមិនជោគជ័យក្នុងជំនួញ។ ការខិតខំប្រឹងប្រែងវាមិនប៉ះពាល់ដល់អ្នកណានោះទេ អ្នកខិតខំបានកាន់តែខ្លាំងគឺកាន់តែល្អសម្រាប់អ្នក។
៤.កុំសម្លឹងការងាររបស់អ្នកត្រឹមថ្ងៃនេះ សម្លឹងមើលវាដើម្បីអនាគតខាងមុខ ភាពច្នៃប្រឌិត គឺមានសារៈសំខាន់ណាស់ចំពោះភាពជោគជ័យ។ ទោះមានអ្នក ឬគ្មានអ្នក ពេលវេលាដើរទៅ មុខជានិច្ច។ ប្រសិនបើអ្នកចង់បានភាពជោគជ័យនៅក្នុងមុខជំនួញណាមួយរបស់អ្នក អ្នកត្រូវការក្រោកឈរឡើង នឹងសម្លឹងមើលទៅមុខឲ្យបានវែងឆ្ងាយ។ ការបង្កើតជំនួញ ឬធ្វើអ្វីមួយសម្រាប់ថ្ងៃនេះ វាអាចរស់បានត្រឹមតែពេលនេះ ហើយវានឹងបរាជ័យនៅពេលខាងមុខ។ ប៉ុន្តែបើអ្នកបង្កើតវាឡើងសម្រាប់ថ្ងៃស្អែក អ្នកនឹងអាចជោគជ័យបានយ៉ាងយូរអង្វែង។
៥.អ្នកត្រូវស្រលាញ់អ្វីដែលអ្នកធ្វើ អ្នកត្រូវស្រលាញ់ពេញចិត្តទៅនឹងការយកឈ្នះលើបញ្ហាប្រឈមធំៗដែលនឹងកើតមានឡើង និងត្រូវដោះស្រាយបញ្ហាទាំងនោះ ហើយអ្វីដែលសំខាន់បំផុតគឺរបៀបថា តើអ្នកចំណាយពេលរាល់ថ្ងៃដោយរបៀបណា? នេះមិនទាន់គ្រប់គ្រាន់នៅឡើយទេ នៅក្នុងមុខជំនួញក្តី ការងារផ្សេងក្តី អ្នកត្រូវស្រលាញ់មនុស្សដែលរួមដំណើរការងារជាមួយអ្នកផងដែរ។ ដូចពាក្យចាស់ពោលថា ប្រសិនបើអ្នកធ្វើការដើម្បីតែលុយ អ្នកត្រឹមតែរត់រកលុយរហូត។ ប៉ុន្តែបើអ្នកធ្វើអ្វីដែលអ្នកស្រលាញ់ លុយនឹងរត់មករកអ្នក។
៦.រៀនលេងល្បែងបៀ ស្តាប់ទៅដូចជារឿងមួយគួរឲ្យអស់សំណើច ប៉ុន្តែតើអ្នកមានដឹងទេថា ល្បែងមួយនេះអាចនាំអ្នកឆ្ពោះទៅរកភាពជោគជ័យដោយរបៀបណា? ការពិតមានគុណសម្បត្តិមួយចំនួនដែលល្បែងប្រភេទនេះរួមចំណែកនៅក្នុងជីវិតជាក់ស្តែងរបស់អ្នក ជាពិសេសនៅក្នុងមុខជំនួញតែម្តង។ ល្បែងបៀបង្រៀនអ្នកអាចចេះផ្ដោតអារម្មណ៍លើការងារចំពោះមុខ និងគិតដោយយុទ្ធសាស្ត្រ។ វាជួយដុសខាត់ខួរក្បាលរបស់អ្នកឲ្យកាន់តែមានភាពសកម្ម និងគំនិតរបស់អ្នកកាន់តែមុតស្រួច។ លើសពីនេះដោយសារតែល្បែងនេះអាចលេងបានច្រើនអ្នក ទើបវាបង្រៀនអ្នកឲ្យចេះប្រើយុទ្ធសាស្ត្រទំនាក់ទំនង និងហ៊ានប្រឈមមុខទៅនឹងគូប្រជែងគ្រប់ប្រភេទនៅក្នុងពេលតែមួយ ពោលគឺភាពក្លាហាននេះឯង។
៧.ស្វែងរកដំបូន្មានពីមនុស្សដែលឆ្លាតជាងអ្នក ប្រសិនបើអ្នកពិតជាចង់ជោគជ័យមែននោះ អ្នកត្រូវរាប់អានមនុស្សដែលឆ្លាត និងជោគជ័យជាងអ្នក។ វាជារឿងល្អណាស់ដែលអ្នកអាចបង្កើតមិត្តភាពបានជាមួយក្រុមមនុស្សទាំងនេះ។ ប៉ុន្តែអ្នកមិនគួរស្ទាក់ស្ទើរក្នុងការសុំយោបល់ ឬដំបូន្មានណាមួយពីមនុស្សទាំងនេះឡើយ។ បុគ្គលទាំងនេះស្គាល់អ្នកច្បាស់ ហេតុដូច្នេះហើយពួកគេទំនងជាមនុស្សពូកែនៅក្នុងចំណុចខ្សោយណាមួយជារបស់អ្នក។ អ្នកមិនចាំបាច់ត្រូវការពួកគេគ្រប់ពេលនោះទេ ប៉ុន្តែអ្នកគួរបង្កើតក្រុមពិភាក្សាចែករំលែកចំណេះដឹងទៅវិញទៅមកជាមួយបុគ្គលទាំងនេះ អ្នកនឹងអាចទទួលបានពន្លឺជាច្រើនពីពួកគេ។
៨.ជ្រើសរើសមនុស្សត្រូវមកធ្វើការជាមួយអ្នក អ្នកត្រូវជ្រើសរើសមនុស្សដែលផ្តល់ទំនុកចិត្តឲ្យអ្នក មនុស្សដែលមានការប្ដេជ្ញាចិត្តខ្ពស់លើបេសកកម្មរបស់អ្នក និងមនុស្សដែលចែករំលែកទស្សនវិស័យរួមគ្នាជាមួយអ្នកដើម្បីកសាងក្រុមហ៊ុនមួយឡើង។ បុគ្គលិកដែលមានគំនិតវៃឆ្លាត គួរតែជួលពួកគេមកធ្វើការ ប៉ុន្តែគួរតែមានជំនាញខុសពីអ្នកដើម្បីឲ្យអ្នកចេះបំពេញគ្នាទៅវិញទៅមក។ ការជួលមនុស្សត្រូវមកធ្វើការ មិនមែនត្រឹមតែឲ្យអ្នកជោគជ័យប៉ុណ្ណោះទេ ប៉ុន្តែថែមទាំងធ្វើឲ្យការងារប្រចាំថ្ងៃរបស់អ្នកប្រព្រឹត្តទៅដោយរីករាយគួរឲ្យពេញចិត្តបំផុត។
៩.បើអ្នកជាមនុស្សចូលចិត្តពន្យារពេល ត្រូវបញ្ឈប់ឥឡូវនេះភ្លាម ការពន្យារពេលគឺជាទម្លាប់ដ៏អាក្រក់បំផុតដែលអ្នកត្រូវតែបញ្ឈប់វាឥឡូវនេះ បើបានកាន់តែឆាប់ កាន់តែល្អ។ ដើម្បីសម្រេចកិច្ចការធំមួយ អ្នកត្រូវរៀបចំពេលវេលាឲ្យបានត្រឹមត្រូវ និងប្រើប្រាស់វាឲ្យមានប្រសិទ្ធភាពបំផុត។ ការងារអ្វីក៏ដោយ អ្នកមិនត្រូវរង់ចាំធ្វើវារហូតដល់វិនាទីចុងក្រោយនោះឡើយ។ អ្នកត្រូវបែងចែកពេលវេលាដើម្បីធ្វើការងារតាមអាទិភាព និងអាចបញ្ចប់បានតាមពេលកំណត់។
១០.បង្កើតភាពសប្បាយៗក្នុងជីវិត រឿងការងារជារឿងសំខាន់។ ប៉ុន្តែពេលខ្លះ អ្នកក៏ត្រូវការចន្លោះពេលផ្ទាល់ខ្លួនដើម្បីធ្វើរឿងឯកជនខ្លះដែលមើលទៅឆ្កួតៗដើម្បីឲ្យជីវិតរបស់អ្នករីករាយ។ អ្នកមិនគួរអង្គុយធ្វើការពេញមួយជីវិតគ្មានថ្ងៃសម្រាកនោះឡើយ។ ជីវិតមានពេលលំហែខ្លះ ទុកខ្លះ សប្បាយខ្លះ ទើបវាមានតម្លៃ៕
ប្រភព៖ moneyinc.com
