នៅ​ក្នុង​កិច្ច​ប្រជុំ​គណកម្មការ​មូល​បត្រ​កម្ពុជា (គ.ម.ក)​លើក​ទី​៥៥ កាល​ពី​ថ្ងៃ​ទី​០៣ ខែ​មេសា ឆ្នាំ​២០១៩ កន្លង​ទៅ​ ក្រោម​អធិបតី​ឯកឧត្តម​អគ្គបណ្ឌិត​សភាចារ្យ អូន ព័ន្ធមុនីរ័ត្ន ឧប​នាយករដ្ឋមន្រ្តី រដ្ឋម​ន្រ្តីក្រសួងសេដ្ឋកិច្ចនិង​ហិរញ្ញវត្ថុ និង​ជា​ប្រធាន​គណៈកម្មការ​មូល​បត្រកម្ពុជា ដោយ​ក្នុង​នោះ​អង្គ​ប្រជុំ​បាន​ពិភាក្សា​ផ្លាស់​ប្ដូរ​យោបល់ និង​បាន​សម្រេច​ផ្ដល់​ការ​អនុញ្ញាត​ដល់​គ្រឹះ​ស្ថាន​មីក្រូហិរញ្ញវត្ថុ​និង​ក្រុមហ៊ុន​ចំនួន​១០​តាម​សំណើរ​ដូច​ខាង​ក្រោម៖

របៀប​វិរៈ​ទី​១៖ អនុម័ត​ដោយ​ផ្តល់​ការ​អនុញ្ញាត​ជាគោលការណ៍​លើ​សំណើ​សុំ​បោះផ្សាយលក់​មូលបត្រ​បំណុល​ជា​សាធារណៈ​របស់​គ្រឹះស្ថាន​មីក្រូហិរញ្ញវត្ថុ​អិលអូអិលស៊ី (ខេមបូឌា) ភីអិលស៊ី។ គ្រឹះស្ថាន​ស្នើ​សុំ​បោះផ្សាយ​លក់​មូលបត្រ​បំណុល​ដែល​ជា​ប្រភេទ (១) សញ្ញា​បណ្ណ​ធម្មតា​មាន​អាទិភាព​ខ្ពស់ គ្មាន​វត្ថុធានា និង​គ្មាន​ការការពារហានិភ័យ ​អត្រា​ប្តូរប្រាក់ (សញ្ញា​បណ្ណ​ធម្មតា​ប្រភេទ “ក”) ក្នុង​អត្រា​គូប៉ុង​ប្រចាំ​ឆ្នាំ​ចន្លោះ​ពី ៨%-៩% និង (២) សញ្ញា​បណ្ណ​ធម្មតា​មាន​អាទិភាព​ខ្ពស់ គ្មាន​វត្ថុ​ធានា និង​មាន​ការការពារ​ហានិភ័យ​អត្រា​ប្តូរប្រាក់ (សញ្ញាប័ណ្ណធម្មតាប្រភេទ “ខ”) ក្នុង​អត្រា​គូប៉ុង​ប្រចាំ​ឆ្នាំ​ចន្លោះ​ពី ៧,៥%-៨% ក្នុង​មួយ​ឆ្នាំ។

គ្រឹះស្ថាន​គ្រោង​បោះផ្សាយ​ក្នុង​ទំហំ​ប្រាក់​សរុប ៨០ ប៊ីលានរៀល (ប្រហែល២០ លានដុល្លារ) មាន​តម្លៃ​ចារឹក​ក្នុង​មួយ​ឯកតា​មូលបត្រ​បំណុល ១០០.០០០ រៀល។ គ្រឹះស្ថាន​ត្រូវ​បន្ត​នីតិវិធី​នៃ​ការ​បោះផ្សាយ​លក់​មូលបត្រ​បំណុល​អនុលោម​តាម​ច្បាប់ និង​បទប្បញ្ញត្តិ​ជា​ធរមាន មុន​ទទួល​បាន​ការ​អនុញ្ញាត​ជា​ផ្លូវការ​ក្នុង​ការ​ចុះបញ្ជី​លើ​ទីផ្សារ​មូលបត្រ​កម្ពុជា។

របៀបវិរៈទី២៖ អនុម័ត​ជា​គោលការណ៍​លើ​សំណើ​សុំ​ការ​អនុញ្ញាត​បន្ថែម​ផលិតផល​ឧបករណ៍​និស្សន្ទ​ដែល​ត្រូវ​ធ្វើ​ការ​ជួញ​ដូរ​របស់ (១) ក្រុមហ៊ុន ខេមបូឌាន ដេរីវ៉េទីវ អ៊ិចឆេង ឯ.ក (Cambodian Derivatives Exchange Co., Ltd) និង (២) ក្រុមហ៊ុន រ៉ូយ៉ាល់ ហ្វាយ​នែន​សល ខបភើរេសិន (Royal Financial Corporation)។

របៀបវារៈទី ៣៖ អនុម័ត​ជា​គោលការណ៍​លើ​ការ​ស្នើ​សុំ​អាជ្ញាបណ្ណ​ឈ្មួញ​ជើង​សាឧបករណ៍​និស្សន្ទ​របស់ (១)ក្រុមហ៊ុន វីយូនៀន អ៊ិនវេសម៉ិន ឯ.ក (Vunion Investment Co., Ltd) (២) ក្រុមហ៊ុន ជីខេអេហ្វអិកស៍ (ខេមបូឌា) ឯ.ក (GKFX (Cambodia) Co., Ltd) និង (៣) ក្រុមហ៊ុន ហ៊្វូល អឹសសេនសិន ប្រូកឃើរ ឯ.ក (Full Ascension Broker Co., Ltd)។

របៀបវារៈទី ៤៖ អនុម័ត​ជា​គោល​ការណ៍​លើ​ការ​ស្នើ​សុំ​អាជ្ញាបណ្ណ​ក្រុមហ៊ុន​គ្រប់គ្រង​មូលនិធិ​របស់ (១) ក្រុមហ៊ុន ហ្គោល វេល ឯ.ក (Gold Whale Co., Ltd), (២) ក្រុមហ៊ុន ហ៊ុង តុង ហ្វ័រឈូន ហ្វាន់ អ៊ិនវេសម៉ិន ឯ.ក (Hung Tong Fortune Fund Investment Co., Ltd) (៣) ក្រុមហ៊ុន ស៊ីអ៊ីអូ ម៉ាស្ទ័រក្លឹប អ៊ិនវេសម៉ិន ម.ក (CEO Master Club Investment Plc.) និងក្រុមហ៊ុន ខេមបូឌាន អ៊ីនវេសស្ទ័រ ឃែភីថល ផាតនើរ ម.ក. (Cambodian Investors Capital Partners Plc.)។

របៀប​វារៈទី ៥៖  អនុម័ត​ជា​គោលការណ៍​លើ​ការ​ស្នើ​សុំការ​ទទួល​ស្គាល់​ធ្វើ​ជា​ក្រុមហ៊ុន​ផ្តល់​សេវា​សវនកម្ម​របស់​ក្រុមហ៊ុន បេក​ឃើរ ធីលលី (ខេមបូឌា) ឯ.ក (Baker Tilly (Cambodia) Co., Ltd)។

របៀប​វារៈទី ៦៖ អនុម័ត​លើ​សេចក្តី​ព្រាង​វិសោធនកម្ម​ប្រកាស​ស្តី​ពី​ការ​ដាក់​ឱ្យ​អនុវត្ត​វិធាន​សមាជិកភាព​របស់​ក្រុមហ៊ុន​ផ្សារ​មូល​បត្រ​កម្ពុជា៕

ប្រភព៖ គណៈកម្មការ​មូលបត្រ​កម្ពុជា

ដោយ៖ ស្រីរ័ត្ន