យុទ្ធសាស្ត្រ ៦ ចំណុចជួយដល់ការគ្រប់គ្រងបុគ្គលិកយ៉ាងមានប្រសិទ្ធភាពនិងប្រសិទ្ធផល
ផ្នែកមួយធំបំផុតនៃការគ្រប់គ្រងបុគ្គលិកគឺការគ្រប់គ្រងលើដំណើរការការងាររបស់បុគ្គលិក។ បង្កើតចន្លោះឬនូវអ្វីមួយ ឬរៀបចំចំនុចណាមួយដែលអាចឲ្យបុគ្គលិកផលិតចេញនូវការងារដែលល្អប្រសើរមួយដល់អង្គភាព ផ្អែកតាមសមត្ថភាពនិងជំនាញរបស់ពួកគេម្នាក់ៗ។
វាមិនមែនជារឿងងាយស្រួលឬលេងសើចទេក្នុងការគ្រប់គ្រងមនុស្ស គ្រប់គ្រងបុគ្គលិកឲ្យដំណើរបានទៅដោយរលូនតាមអ្វីដែលអង្គភាពចង់បាននោះទេ។ ក្នុងនាមជាអ្នកគ្រប់គ្រងអ្នកត្រូវជួបជាមួយបញ្ហាជាច្រើនដោយចៀសមិនផុត។ តែទោះជាយ៉ាងណាយុទ្ធសាស្ត្រ ៦ ចំនុចខាងក្រោមនេះជួយអ្នកពិចារណាក្នុងការគ្រប់គ្រងបុគ្គលិកឲ្យបានកាន់តែប្រសើរ៖
១) ធ្វើការកំណត់ និងផ្សារភ្ជាប់គោលដៅរបស់ក្រុមហ៊ុននិងគោលដៅនៃការអនុវត្ត
បុគ្គលិកមិនអាចដឹងទេថា គេត្រូវធ្វើអ្វីឲ្យប្រាកដទេសម្រាប់ការបំពេញការងារប្រចាំថ្ងៃ ប្រសិនបើគេមិនបានដឹងបានយល់ច្បាស់ពីគោលដៅរបស់ក្រុមហ៊ុន។ ដូចនេះក្នុងនាមជាអ្នកគ្រប់គ្រងម្នាក់យើងត្រូវធ្វើការកំនត់ និងបង្ហាញឲ្យច្បាស់លាស់ទៅដល់បុគ្គលិកឬអ្នកនៅក្រោមបង្គាប់ថាយើងចង់បានអ្វី អង្គភាពចង់បានអ្វី។ មួយវិញទៀតការដែលដាក់ការងារត្រូវតាមជំនាញបុគ្គលិកក៏ជាផ្នែកមួយជួយដល់ភាពជោគជ័យក្នុងការគ្រប់គ្រងបុគ្គលិកដូចគ្នា។
២) ប្រើប្រាស់កម្មវិធីគ្រប់គ្រងការងារ
ការប្រើប្រាស់កម្មវិធី Software សម្រាប់គ្រប់គ្រងលើការងារបុគ្គលិកជារឿងមួយល្អបំផុត។ វាចំនេញពេលវេលា អាចឲ្យអ្នកនិងបុគ្គលិកឬអ្នកនៅក្រោមបង្គាប់ភ្ជាប់ទំនាក់ទំនងជាមួយគ្នាបានច្រើនជាងមុន។ អ្នកអាចទទួលរបាយការណ៍ឬប្រាប់ពីការងារបន្ទាប់ដល់បុគ្គលិកបានរហ័សជាជាងការចាំជួបគ្នាផ្ទាល់។ ហើយវានៅមានអត្ថប្រយោជន៍ផ្សេងៗជាច្រើនទៀត។
៣) ទាញយកមតិយោបល់ពីបុគ្គលិកជារឿយៗ
នៅពេលដែលចៅហ្វាយនិងកូនចៅមានទំនាក់ទំនងការងារល្អជាមួយគ្នា ទាំងអស់គ្នាអាចដឹងពីគោលដៅដែលត្រូវដើររួមគ្នាដើម្បីសម្រេចសមិទ្ធផលមួយ នោះគ្រប់គ្នាមិននៅឆ្ងាយពីគ្នាឡើយ។ ទន្ទឹមនឹងការផ្សារភ្ជាប់ទំនាក់ទំនងល្អជាមួយគ្នានេះ អ្នកគ្រប់គ្រងក៏ត្រូវបើកផ្លូវទុកឱកាសដល់បុគ្គលិកធ្វើការផ្តល់មតិយោបល់ ឬរាយការណ៍ពីផលលំបាកក្នុងការងារដេលពួកគេបានជួបប្រទះ។ ឬពេលខ្លះអាចជាការសំណូមពរនានាដែលបុគ្គលិកចង់បាន ហើយអ្នកគ្រប់គ្រងគួរជួយស្វែងរកដំណោះស្រាយ ឬការណែនាំការងារដល់បុគ្គលិកតាមដែលអាចធ្វើទៅបាន។
៤) ការប្រើប្រាស់ Peer Reviews
Peer Reviews ត្រូវបានគេស្គាល់ថាជាយុទ្ធសាស្រ្តពិនិត្យ ៣៦០ដឺក្រេ ដែលជាយុទ្ធសាស្រ្តមួយល្អដែរក្នុងការគ្រប់គ្រងបុគ្គលិក។ នេះគឺជាលក្ខណៈពិសេសមួយដែលអាចរកបាននៅលើកម្មវិធី software គ្រប់គ្រងភាគច្រើន។ Peer Reviews មានប្រយោជន៍ព្រោះពួកគេអនុញ្ញាតឱ្យអ្នករួមការងារលើកសរសើរអ្នករួមការងារដទៃទៀតពីចំនុចល្អ និងគូសបញ្ជាក់នូវទិដ្ឋភាពវិជ្ជមាននៃការបំពេញការងាររបស់ពួកគេ ក៏ដូចជាចង្អុលបង្ហាញពីកន្លែងដែលអាចធ្វើឱ្យប្រសើរឡើងបាន។
៥) ការគ្រប់គ្រងមុននិងការទទួលស្គាល់
មធ្យោបាយមួយដើម្បីធានាលទ្ធផលនៅកន្លែងធ្វើការគឺ ដើម្បីការអនុវត្តរង្វាន់និងអនុវត្តការគ្រប់គ្រងមុន មានន័យថាបុគ្គលិករបស់យើងសុទ្ធតែបានដឹងថាការដែលពួកគេខិតខំបំពេញការងារមិនមែនខំដោយឥតប្រយោជន៍ទេ គេអាចធ្វើការរំពឹងទុកថាគេធ្វើការគឺត្រូវបានអ្វីលើកទឹកចិត្ត ឬរង្វាន់ត្រលប់មកវិញជាក់ជាមិនខាន។
៦) កំណត់នូវកិច្ចប្រជុំទៀងទាត់ដើម្បីពិភាក្សាពីលទ្ធផល
ជាធម្មតាការងារត្រូវមានការតាមដាននូវលទ្ធផលជាប្រចាំ ដូចនេះជាអ្នកគ្រប់គ្រងត្រូវមានការជួបប្រជុំជាមួយកូនចៅជារឿយៗ ដើម្បីដឹងពីលទ្ធផលនៃក្រុមការងារនីមួយៗថាតើធ្វើទៅតាមផែនការដែលបានដាក់ចេញឬទេ។ ពេលមានកិច្ចប្រជុំត្រូវប្រាកដថាវាធ្វើឡើងដោយច្បាស់លាស់ ហើយគួរមានកម្មវត្ថុដូចខាងក្រោម៖
ក) តាមដានលើ Peer Reviews
ខ) ពិភាក្សាពីការលើកសរសើរបុគ្គល ឬក្រុមណាមួយហើយផ្តល់ជាការណែនាំដល់បុគ្គល ឬក្រុមដទៃទៀត
គ) ទទួលស្គាល់សមាជិកក្នុងក្រុមដែលសកម្មក្នុងការងារ ផ្តល់ជូនការលើកទឹកចិត្ត ឬជារង្វាន់សម្រាប់ការខិតខំប្រឹងប្រែង
ឃ) ពិភាក្សាពីផែនការបន្ទាប់នៃគម្រោងដែលត្រូវធ្វើ
ង) ពិភាក្សាពីទិន្ន័យរបស់ក្រុមហ៊ុន ប្រាក់ចំណូល ការពាក់ព័ន្ធរបស់អតិថិជន ការធ្វើទីផ្សារ -ល- ដើម្បីទទួលបានភាពជោគជ័យទាំងអស់គ្នា។
ចៀសវាងការរៀបចំកិច្ចប្រជុំដែលជួបគ្នាសម្រាប់តែការចាប់ដៃហើយ ក៏បំបែកជួរដោយគ្មានបានលទ្ធផលអ្វីសោះ។ ត្រូវចាំថានៅពេលដែលអ្នកមានទំនាក់ទំនងការងារជាមួយបុគ្គលិកល្អ ភាពស្និទ្ធស្នាលកាន់តែមានរវាងមេនិងកូនចៅ ការគោរពពីសំណាក់បុគ្គលិករបស់អ្នកកាន់តែច្រើន ភាពជោគជ័យនៃការគ្រប់គ្រងអ្នកក៏កាន់តែប្រសើរឡើងដែរ៕
ដោយ៖ យ៉ាយ៉ា
