សហគ្រិនស្រ្តីឆ្នើមម្នាក់ទម្លាយគន្លឹះ ៦ចំណុច ក្នុងការត្រៀមខ្លួនមុនចាប់ផ្ដើមបើកអាជីវកម្ម
តើអ្នកបានត្រៀមខ្លួនយ៉ាងណាខ្លះមុនសម្រេចចិត្តបើកអាជីវកម្មដោយខ្លួនឯង? ជាការពិតការបើកអាជីវកម្មមួយ ប្រាកដណាស់វាទាមទារឲ្យសហគ្រិនត្រូវត្រៀមលក្ខណៈឲ្យបានគ្រប់ជ្រុងជ្រោយជាមុនសិន។ ជាមួយគ្នានេះដែរ សហគ្រិនស្រ្តី កញ្ញា ណម ចំណា ម្ចាស់មន្ទីរព្យាបាលធ្មេញដ៏ធំនិងស្ដង់ដារមួយបានចែករំលែកនូវយុទ្ធសាស្រ្តផ្ទាល់ខ្លួនចំនួន៦ចំណុចរបស់កញ្ញា ក្នុងការត្រៀមខ្លួនមុនចាប់ផ្ដើមបើកអាជីវកម្ម។
ស្ថាបនិកនៃមន្ទីរព្យាបាលធ្មេញមែលវីនរូបនេះបានចែករំលែកថា
ចំណុចទីមួយដែលត្រូវត្រៀមខ្លួនគឺ សម្រាប់យុវជនដែលស្ថិតនៅក្នុងការសិក្សានៅមហាវិទ្យាល័យគឺចាំបាច់ត្រូវប្រឹងប្រែងរៀនសូត្រឲ្យអស់ពីលទ្ធភាពទាំងកម្លាំងកាយចិត្ត រៀននូវជំនាញរបស់យើងឲ្យបានច្បាស់លាស់។ ព្រោះនៅពេលដែលយើងមានជំនាញច្បាស់លាស់ យើងចេញមកធ្វើការអ្វីក៏ដោយយើងនឹងទទួលជោគជ័យច្រើន ព្រោះយើងគ្រាន់តែអនុវត្តយកតែម្ដង។
ចំណុចទី២ រៀនចប់ភ្លាមកុំទាន់បើកអាជីវកម្មភ្លាម៖ នៅពេលដែលរៀនចប់ភ្លាមយល់ល្អយើងគួរតែស្វែងរកកន្លែងការងារណាមួយដែលយើងគិតថាថ្ងៃក្រោយយើងអាចធ្វើអាជីវកម្មដែលស្រដៀងនឹងកន្លែងធ្វើការនោះ ដូច្នេះវាជាគន្លឹះមួយដែលអាចឲ្យយើងរៀនសូត្របានពីរបៀបនៃការធ្វើការងារនៅកន្លែងនោះ លើសពីនេះយើងអាចមានឱកាសសន្សំដើមទុននិងបង្កើតទំនាក់ទំនងជាមួយអតិថិជនដែលនៅទីនោះ។
ចំណុចទី៣ បន្តការរៀនសូត្របន្ថែម៖ យើងត្រូវរៀនសូត្របន្ថែម និងស្រាវជ្រាវនូវចំណេះដឹងថ្មីៗ ព្រោះនៅពេលដែលយើងចេញមកធ្វើការងារដំបូងអ្វីៗហាក់ដូចជាថ្មី ប៉ុន្តែនៅពេលដែលយើងធ្វើវាយូរៗទៅវានឹងលែងមានអ្វីថ្មីទៀតហើយ ដូច្នេះវាទាមទារឲ្យយើងត្រូវតែបន្តការរៀននូវអ្វីដែលថ្មីៗបន្ថែម។
ចំណុចទី៤ ពង្រឹងផ្នែកបច្ចេកទេសនិងភាសា៖ ជំនាញភាសាអង់គ្លេស និងកុំព្យូទ័រគឺសំខាន់ណាស់ ដូចដែលយើងបានដឹងហើយថាទីផ្សារការងារសព្វថ្ងៃគឺមានការប្រកួតប្រជែងច្រើន ហើយបើយើងមិនមានចំណេះដឹងផ្នែកនេះទេយើងអាចនឹងពិបាកក្នុងការប្រកួតប្រជែង។
ចំណុចទី៥ កុំមានមោទនភាពចំពោះខ្លួនឯងខ្លាំងពេក៖ នៅពេលដែលយើងចេញមកបើកអាជីវកម្មដំបូងយើងត្រូវទទួលស្គាល់ថាទោះយើងមានបទពិសោធន៍ធ្វើការឲ្យគេ១០ឆ្នាំក៏ដោយ ក៏ប៉ុន្តែយើងពិតជាមិនដែលដឹងទេថាមុនពេលដែលគេបានរឹងមាំបែបនេះ ដំបូងតើគេបានជួបឧបសគ្គអ្វីខ្លះ ឧបសគ្គរបស់គេមិនប្រាកដថាដូចឧបសគ្គរបស់យើង ដូច្នេះយើងត្រូវចេះដាក់ខ្លួន និងក្រឡេកមើលបុគ្គលជោគជ័យដែលធ្វើការក្នុងវិស័យដូចយើងហើយព្យាយាមទទួលបទពិសោធន៍ពីគាត់។
ចំណុចទី៦ ត្រូវដឹងពីគោលដៅរបស់អតិថិជន៖ បើយើងមានអាជីវកម្មហើយតែបែជាមិនដឹងថាអតិថិជនគោលដៅរបស់យើងជាអ្នកណាទេវាគឺជារឿងមួយដែលពិបាកព្រោះថា ដើម្បីឲ្យអាជីវកម្មមួយដំណើរការដោយនិន្តរភាពទាល់តែម្ចាស់អាជីវកម្មដឹងថាអតិថិជនគោលដៅរបស់យើងនៅទីណា មិនថាក្នុងស្រុកឬក្រៅតំបន់៕
ដោយ៖ ជួប ស្រីរ័ត្ន
