ផ្សារភាគហ៊ុនសកលកំពុងមានកំណើនឡើងវិញបន្ទាប់ពី ដូណាល់ត្រាំដាក់បំរាមលើ Huawei
បន្ទាប់ពីលោកដូណាល់ត្រាំដាក់បំរាមលើក្រុមហ៊ុន Huawei និងដាក់ក្រុមហ៊ុននេះទៅក្នុងបញ្ជីខ្មៅ គេសង្កេតឃើញថាទីផ្សារភាគហ៊ុនសកលកំពុងមានកំណើនគិតចាប់ពីថ្ងៃអង្គារសប្តាហ៍នេះ។
ទីផ្សារភាគហ៊ុននៅសហរដ្ឋអាមេរិក អឺរ៉ុប និងនៅតំបន់អាស៊ីហាក់មានការកើនឡើង នេះបើយោងតាមការចេះផ្សាយដោយសារព័ត៌មាន Market Insider។ ដូចដែលបានដឹងមកហើយយថា ការដាក់ក្រុមហ៊ុន Huawei ក្នុងបញ្ជីខ្មៅនេះ សហរដ្ឋអាមេរិកបានហាមប្រាមក្រុមហ៊ុនក្នុងប្រទេសរបស់ខ្លួន ក៏ដូចជាក្រុមហ៊ុនមួយចំនួនទៀតដែលស្ថិតក្នុងប្រទេសមានសម្ព័ន្ធមិត្តជាមួយអាមេរិកត្រូវផ្អាកសកម្មភាពអាជីវកម្មជាមួយក្រុមហ៊ុន Huawei នេះស្ទើរតែទាំងស្រុង។ ទាំងការផ្គត់ផ្គង់បច្ចេកវិទ្យា បរិក្ខារ និង គ្រឿងបង្គុំនានា អ្វីៗផ្សេងៗដែលជាផលិតផលរបស់អាមេរិក ឬផលិតផលដែលនាំវត្ថុធាតុពីអាមេរិកទៅផលិតក៏ត្រូវបានគេហាមឃាត់ដែរ។
ខាងក្រោមនេះជាការបង្ហាញពីការកើនឡើងនូវភាគហ៊ុនសកលមួយចំនួន៖
ក) សម្រាប់ទីផ្សារសហរដ្ឋអាមេរិក៖
- Dow Jones Industrial Average មានការកើនឡើង ០.៥%
- S&P 500 កើនឡើង ០.៨%
- Nasdaq មានការលោតឡើង ១.១%
ខ) សម្រាប់ទីផ្សារអឺរ៉ុប៖
- DAX របស់ប្រទេសអាឡឺម៉ង់ កើនឡើង ០.៩%
- FTSE 100 របស់អង់គ្លេសលោតឡើង ០.៣%
- និង Euro Stoxx 50 ក៏មានការកើនឡើង ០.៥% ដូចគ្នាដែរ។
គ) ចំណែកឯទីផ្សារនៅអាស៊ីវិញ
- Shanghai Composite មានការកើនឡើង ១.២% ខណៈដែល
- SZSE Component លោតឡើងខ្ពស់រហូតទៅដល់ ១.៩% ហើយ
- Hang Seng របស់ហុងកុងក៏មានកំណើន ១.៣%ដែរ។
គួរបញ្ជាក់ផងដែរថា ការដាក់បម្រាមលើក្រុមហ៊ុន Huawei នេះធ្វើឡើងបន្ទាប់ពីការតំឡើងពន្ធនាំចូលទំនិញរបស់ប្រទេសចិនទៅកាន់សហរដ្ឋអាមេរិក ដែលអាមេរិកធ្វើការកំណត់ពន្ធនាំចូលនេះជាលើកទីពីរលើទឹកប្រាក់ចំនួន ២០០ ប៊ីលានដុល្លារក្នុងមួយឆ្នាំ ហើយក៏គំរាមថានឹងអាចបន្តតំឡើងរហូតទៅដល់ ៣០០ ប៊ីលានដុល្លារក្នុងមួយឆ្នាំ។ ជាការឆ្លើយតបចិនក៏ធ្វើការបង្កើនពន្ធសម្រាប់ទំនិញរបស់សហរដ្ឋអាមេរិកដូចគ្នាដែlគិតជាទឹកប្រាក់ប្រមាណ ៦០ ប៊ីលានដុល្លារដែលនឹងចាប់អនុវត្តពីខែមិថុនាខាងមុខនេះ។
ពេលនេះគ្មាននរណាម្នាក់អាចទស្សន៍ទាយបានទេថា សង្គ្រាមពាណិជ្ជកម្មរវាងប្រទេសសេដ្ឋកិច្ចយក្សទាំងពីរនៅពេលនេះ អ្នកណាចាញ់ ហើយអ្នកណាឈ្នះឲ្យពិតប្រាកដ អ្វីៗមានតែចាំតាមដានទាំងអស់គ្នាថាតើនឹងមានអ្វីកើតឡើងជាបន្ត៕
ដោយ៖ យ៉ាយ៉ា
