តើអ្នកធ្វើម៉េចបើមិត្តភ័ក្ដិចង់ចាប់ដៃរកស៊ីជាមួយអ្នក?
ប្រសិនបើអ្នកជាសហគ្រិនម្នាក់ដែលមានប្រវត្តិជោគជ័យ និងកេរ្តិ៍ឈ្មោះល្អ មនុស្សជាច្រើននឹងចាប់អារម្មណ៍ ហើយចង់មករកស៊ីជាមួយអ្នកជាមិនខាន។ តើពិតឬមិនពិត? ពួកគេនឹងនិយាយថា "អ្នកជោគជ័យណាស់ សមត្ថភាពក៏ពូកែ ខ្ញុំចាប់ អារម្មណ៍ចង់ធ្វើការជាមួយអ្នក។ តើអ្នកត្រូវការអ្នកលក់? អ្នកគ្រប់គ្រង? ទីប្រឹក្សាដែរទេ?”។
នៅពេលដែលបានស្តាប់ឭសំនួរទាំងនេះ អ្នកអាចសើចបន្តិច។ ប៉ុន្តែអ្នកប្រាកដជាពិបាកឆ្លើយបន្តិចបើអ្នកចង់បដិសេធន៍សំណើពួកគេដោយនិយាយត្រង់ៗថា "សុំទោស ក្រុមហ៊ុនរបស់ខ្ញុំ មានបុគ្គលិកពេញហើយ” ហើយជំនួសមកវិញដោយភាសាបែបការទួតថា "ប្រសិនបើអ្នកចង់ធ្វើការជាមួយខ្ញុំ អ្នកអាចផ្ញើប្រវត្តិរូបសង្ខេប ឬ CV មកខ្ញុំមក ព្រោះខ្ញុំអាចត្រូវការនៅពេលអនាគត” ។
យ៉ាងណាក៏ដោយ សំណើទាំងនេះវាមិនលំបាកដូចកាលដែលមិត្តភ័ក្ដិរបស់អ្នកចង់បាន/សង្ឃឹមទុកមុន/រំពឹងទុកមុនក្នុងការចូលរួមធ្វើជាស្ថាបនិក និងដំណើរការអាជីវកម្មជាមួយអ្នកនោះឡើយ។ ពួកគេអាចមានវត្តមានចង់រកស៊ីជាមួយអ្នកនៅខណៈដែលអ្នកកំពុងមានគំនិតដ៏អស្ចារ្យរួចទៅហើយ។ ប៉ុន្តែប្រសិនបើអ្នកសង្កេតឃើញថា ពួកគេពិតជាមានសមត្ថភាព អាចជួយលើកទឹកចិត្តអ្នក និងយល់ឃើញថា ពួកគេគឺជាផ្នែកមួយដ៏សំខាន់អាចធ្វើដំណើរជាមួយអ្នកបាននៅពេលអនាគត អ្នកក៏គួរតែពិចារណាដែរ។
ទោះបីជាបែបនេះក្តីក្នុងករណីដែលអ្នកសង្កេតឃើញថា ពួកគេទាំងនោះបានបង្ហាញធាតុពិតមួយគឺអ្វីដែលពួកគេចង់មករកស៊ីជាមួយអ្នកដើម្បីតែផលប្រយោជន៍ម្យ៉ាង ចង់ដើរលើអ្នក ឬ ចង់កេងចំណេញលើមុខជំនួញរបស់អ្នក នោះវាគ្មានអ្វីគួរឲ្យសោកស្ដាយដែលអ្នកត្រូវបោះបង់សំណើពួកគេចោលនោះទេ។
ឥឡូវនេះមុននឹងសម្រេចចិត្តបែបណានោះ Bizkhmer បានបង្ហាញពីវិធីសាស្ត្រមួយចំនួនដើម្បីស្វែងយល់ដោយខ្លួនឯងថា តើអ្នកត្រូវធ្វើដូចម្តេចពេលមានមិត្តភ័ក្ដិស្នើសុំធ្វើជំនួញជាមួយអ្នក?
១៖ ពិចារណាសិន
ប្រហែលជាមិត្តភ័ក្ដិរបស់អ្នក អាចជាដៃគូដ៏ល្អពិតប្រាកដមួយរបស់អ្នក។ នេះទាមទារឲ្យអ្នកសាកសួរខ្លួនឯងសំនួរខាងក្រោមនេះ៖
-តើទស្សនវិស័យខុសគ្នារវាងអ្នក និងពួកគេនៅតែអាចធ្វើឲ្យមានជំហរក្នុងការយោគយល់ ឬលើកទឹកចិត្តឲ្យមានការពិភាក្សា និងផ្ដល់មតិយោបល់ជាមួយគ្នាបានដែរទេ? តើអ្នកអាចចំណាយពេលច្រើនធ្វើការជាមួយមិត្តភ័ក្ដិរបស់អ្នកដោយគ្មានការធុញទ្រាន់ ឬស្អប់ខ្ពើមដែរទេ? តើមិត្តភ័ក្ដិរបស់អ្នកអាចធ្វើការអ្វីខ្លះបាន? តើមិត្តភ័ក្ដិរបស់អ្នកមានបុគ្គលិកលក្ខណៈជាដៃគូយុទ្ធសាស្ត្រជំនួញយូរអង្វែង មានការទទួលខុសត្រូវ គួរឲ្យទុកចិត្ត មានភាពស្មោះត្រង់ អាចធ្វើការងារលំបាកៗ ឬមានទំនាក់ទំនងល្អជាមួយអ្នកដទៃដែរឬទេ?
២.ត្រូវមានភាពយុត្តិធម៌
តើវាអាចទៅរួចដែរទេដែលថា រាល់គំនិតល្អៗ និងគម្រោងការងារទាំងអស់នោះពិតជាផ្ដួចផ្ដើមឡើងដោយអ្នកទាំងពីរ? សូមពិចារណាបន្តិចប្រសិនបើអ្នកត្រូវបានមិត្តភ័ក្ដិរបស់អ្នកចង់កេងប្រវ័ញ្ច ឬយកមុខមាត់ជំនួសឲ្យការខិតខំប្រឹងប្រែងរបស់អ្នក នេះគឺជាការធ្វើជំនួញដោយគ្មានភាពយុត្តិធម៌ឡើយ។ ប៉ុន្តែប្រសិនបើពួកគេបានលះបង់ឲ្យអ្នកច្រើនជាងពួកគេ ទទួលបាននោះមានន័យថា ពួកគេជាដៃគូដ៏ល្អមួយរបស់អ្នកហើយ។ ទោះបីជាបែបនេះក្តី អ្នកត្រូវចាំថា ដៃគូជំនួញដែលអាចនៅជាមួយគ្នាបានយូរអង្វែងគឺត្រូវលេងដោយយុត្តិធម៌ បើមិនដូច្នេះទេ អ្នកនឹងបរាជ័យ។
៣.ឧស្សាហ៍ពិនិត្យមើលពាក្យពេចន៍ដែលអ្នកទាំងពីរប្រើ
តើអ្នកធ្លាប់និយាយថា "ខ្ញុំ” ឬ "យើង” ដែរទេ? ចុះពាក្យ "ពួកយើងទាំងអស់គ្នា” ឬ "របស់ពួកយើងទាំងអស់គ្នា” វិញ? តើមិត្តភ័ក្ដិរបស់អ្នកមានបំណងក្នុងការផ្លាស់ប្ដូរប្រើប្រាស់ពាក្យសព្វនាម "របស់យើង” ជំនួសឲ្យ "របស់អ្នក” ដែរទេ? នៅក្នុងមុខជំនួញ ភាសាដែលស័ក្ដិសមបំផុត អ្នកមិនគួរប្រើប្រាស់ពាក្យ "ក្រុមហ៊ុនរបស់ខ្ញុំ” ឬ " ខ្ញុំ” តំណាងឲ្យក្រុមហ៊ុនរបស់អ្នកនៅចំពោះមុខដៃគូជំនួញ អតិថិជន ឬសាធារណជនទូទៅនោះឡើយ។ ទាំងអ្នកទាំងមិត្តភ័ក្ដិរបស់អ្នកត្រូវបង្ហាញពីជំហររួមមួយដែលធ្វើឲ្យមានអារម្មណ៍ថា ទាំងអ្នក និងពួកគេគឺជាផ្នែកមួយដ៏សំខាន់នៃក្រុមហ៊ុនទាំងមូល។
៣.ការពិភាក្សាគ្នា
នេះជាជម្រើសចុងក្រោយមួយសម្រាប់អ្នកសម្រាប់ការពារនៅពេលដែលអ្នក និងមិត្តភ័ក្ដិរបស់អ្នកមានភាពល្អក់កករជាមួយគ្នា។ នៅថ្ងៃណាមួយការទំនាក់ទំនងរបស់អ្នកអាចមើលមុខគ្នាមិនចំ ហើយអាចបាត់បង់ការជឿជាក់គ្នាទៅវិញទៅមក។ យ៉ាងណាមិញ បើទោះបីជាស្ថានភាពនេះវាអាចធ្ងន់ធ្ងរជាងអ្វីដែលអ្នករំពឹងទុក ភាពស្មោះត្រង់រវាងអ្នក និងមិត្តភ័ក្ដិរបស់អ្នកគឺជារឿងចាំបាច់បំផុតដែលត្រូវមាននៅពេលនេះ។ វាជារឿងល្អដែលអ្នកត្រូវនិយាយគ្នាមុននៅមុនពេលអ្នកចាប់ដៃគ្នាបើកជំនួញ។ សូមចាំថា ការចាប់ដៃគ្នារកស៊ីជាមួយគ្នាប្រៀបដូចជាការរៀបអាពាហ៍ពិពាហ៍មួយអញ្ចឹង! អ្នកពិតជាមិនចង់ឲ្យមិត្តភាពរបស់អ្នកបញ្ចប់ទៅយ៉ាងជូរចត់ដោយសារភាពមិនចុះសម្រុងគ្នានៅក្នុងមុខជំនួញនោះឡើយ៕
ប្រភព៖ Entrepreneur
