ដើម្បីរៀនពីអនាគតអាជីវកម្ម អ្នកក៏ត្រូវត្រឡប់មើលអតីតកាលផងដែរ
ប្រវត្តិសាស្ត្រ ឬអតីតកាលគឺជាគ្រូដ៏មានឥទ្ធិពលបំផុតមួយសម្រាប់មនុស្សគ្រប់គ្នា ត្បិតអីវាបានបង្កប់នូវមេរៀនទាំងល្វីងជូរចត់ និងផ្អែមល្ហែមនៅទីនោះ។ នៅពេលបច្ចុប្បន្ននេះ មានមនុស្សច្រើនណាស់ដែលមើលរំលង ហើយគេចការទទួលខុសត្រូវមិនព្រមរៀនសូត្រពីវាដើម្បី បញ្ចៀសកំហុសឆ្គងសម្រាប់បង្កើតភាពជោគជ័យរបស់ខ្លួន។ ខណៈដែលអតីតកាលមិនអាចផ្លាស់ប្ដូរបាន អ្វីដែលអ្នកគួរសម្លឹងមើលរឿងរ៉ាវជាច្រើនដែលកន្លងផុត គឺដើម្បីធានាថា ប្រវត្តិសាស្ត្រដ៏អាក្រក់ទាំងនោះ នឹងមិនកើតឡើងវិញទៀតទេនៅពេលអនាគត។
រឿងធ្វើជំនួញរកស៊ីក៏មិនខុសពីរឿងរ៉ាវជីវិតរបស់មនុស្សម្នាក់ៗដែរ។ មើលទៅវាគ្មានគ្រូណាល្អប្រសើរជាងបទពិសោធន៍នោះទេ។ ក៏ប៉ុន្តែមិនមែនមនុស្សគ្រប់គ្នាសុទ្ធតែឆ្លងកាត់បទពិសោធន៍ក្នុងជំនួញនោះឡើយ។ អ្នកដឹកនាំជំនួញសម័យថ្មី ត្រូវមានទំនួលខុសត្រូវក្នុងការសិក្សារៀនសូត្រពីលទ្ធផលធ្វើជំនួញរបស់ខ្លួននៅពេលកន្លងមកដើម្បីបង្កើតភាពជោគជ័យឲ្យបានកាន់តែច្រើន និងបង្រួមហានិភ័យឲ្យកាន់តែតិច។
ដើម្បីទទួលបានលទ្ធផលល្អ វាមិនមែនជារឿងមួយងាយស្រួលឡើយ។ ក៏ប៉ុន្តែអ្នកត្រូវចងចាំថា អ្នកត្រូវព្យាយាមបើកចិត្តទូលាយរៀនសូត្រពីអតីតកាល និងចំណេះដឹងថ្មីៗឲ្យបានកាន់តែច្រើន។ នៅក្នុងអត្ថបទនេះ នឹងនាំអ្នកទៅស្វែងយល់នូវសម្រង់សម្ដីប្រកបដោយគតិបណ្ឌិតរបស់បុគ្គលល្បីៗជាច្រើនរូបដែលទាក់ទងទៅនឹងប្រធានបទរៀនសូត្រពីអតីតកាលនេះ។
១.អ្នកជំនួញ និងអ្នកនយោបាយជនជាតិចាម៉ៃកាលោក Marcus Garvey
“មនុស្សដែលមិនបានស្គាល់អតីតកាល ដើមកំណើត និងវប្បធម៌របស់ខ្លួន ប្រៀបដូចជាដើមឈើមួយដើមដែលគ្មានឫស”។
២.ប្រវត្តិវិទូជនជាតិអង់គ្លេសលោកDavid G. Chandler
“គ្មាននរណាម្នាក់អាចបដិសេធថា រាល់សង្គ្រាម និងការប្រយុទ្ធគ្នា គឺជាទង្វើមិនគួរឲ្យសោកស្តាយ ឈឺចាប់ និងវេទនាដែលជារឿងអយុត្តិធម៌ចំពោះយុទ្ធជន និងជនស៊ីវិលនោះឡើយ។ ដូច្នេះបើគ្រាន់តែសិក្សាស្វែងយល់ពីប្រវត្តិសាស្ត្រដែលកន្លងហួសដើម្បីបញ្ចៀសកំហុសឆ្គង និងសោកនាដកម្មមិនឲ្យកើតឡើងវិញ នោះសកម្មភាពនេះមិនគួរត្រូវបានគេរារាំងទេ"។
៣.លោក Dwight D. Eisenhower ប្រធានាធិបតីទី ៣៤របស់អាមេរិក
“ទាំងមនុស្សឆ្លាត និងមនុស្សអង់អាចគង់តែដេកសម្រាកលើគន្លងផ្លូវប្រវត្តិសាស្ត្រដើម្បីរង់ចាំរថភ្លើងមកដល់បរកាត់លើទ្រូងពួកគេ”។
៤.លោកBoris Becker អតីតកីឡាករវាយតេនីសលំដាប់ពិភពលោករបស់អាល្លឺម៉ង់
“ខ្ញុំមិនអាចផ្លាស់ប្ដូរអតីតកាលបានទេ។ ខ្ញុំក៏មិនចង់ផ្លាស់ប្ដូរអតីតកាលដែរ។ អ្វីដែលខ្ញុំអាចផ្លាស់ប្ដូរបាន គឺមានតែអនាគតកាលរបស់ខ្ញុំតែប៉ុណ្ណោះ។ ឥឡូវនេះ ខ្ញុំកំពុងធ្វើវាហើយ”។
៥. កវីនិពន្ធ និងសិល្បករអាមេរិកលោកស្រី Maya Angelou
“ទោះបីជាអតីតកាលមានការឈឺចាប់ខ្លាំង ក៏មិនអាចបំភ្លេចវាបានដែរ។ ប៉ុន្តែបើជីវិតជួបតែរឿងល្អ គួរតែមិនចាំបាច់រស់ម្តងទៀតល្អជាង”។
៦.លោក Colin Powell អ្នកនយោបាយអាមេរិក
“គ្មានឡើយអាថ៌កំបាំងដើម្បីជោគជ័យ។ វាជាលទ្ធផលកើតចេញពីការត្រៀមខ្លួន ខិតខំប្រឹងប្រែង និងរៀនសូត្រពីការបរាជ័យ”។
៧.អ្នកប្រាជ្ញអាល្លឺម៉ង់លោក Albert Einstein
“រៀនសូត្រពីថ្ងៃម្សិលមិញ រស់នៅសម្រាប់ថ្ងៃនេះ សង្ឃឹមសម្រាប់ថ្ងៃស្អែក។ មិនត្រូវបញ្ចប់ចម្ងល់ចំពោះរឿងសំខាន់ៗឡើយ” ។
៨.សកម្មជននយោបាយជនជាតិអៀរឡង់លោក George Bernard Shaw
“ប្រសិនបើប្រវត្តិសាស្ត្រអាចកើតឡើងដោយឯកឯងបាន ហើយការរំពឹងទុកសុទ្ធតែអាចកើតមានឡើង តើមនុស្សម្នាក់ៗចាំបាច់រៀនសូត្រពីបទពិសោធន៍ទាំងនោះធ្វើអី?”។
៩.អ្នកនយោបាយអង់គ្លេសលោក Lord Byron
“ព្យាការី (អ្នកព្យាករ) ដ៏ល្អបំផុតនៃអនាគតកាល គឺអតីតកាល”។
១០.លោកស្រី Michelle Obama
“ជីវិតរបស់អ្នកប្រហែលមិនសុខស្រួលនោះទេ ហើយអ្នកក៏មិនអាចដោះស្រាយបញ្ហាទាំងអស់របស់ពិភពលោកបាននៅក្នុងពេលតែមួយដែរ។ ប៉ុន្តែសូមកុំមើលស្រាលសារៈសំខាន់ដែលអ្នកមាន ព្រោះប្រវត្តិសាស្ត្របានបង្ហាញយើងថា ភាពក្លាហានអាចឲ្យយើងហែលឆ្លងផុតឧបសគ្គទាំងឡាយបាន”៕
ប្រភព៖ Inc
