កុំ​​​ចាត់ទុកថា​ខ្លួន​ឯង​ជា​ម្ចាស់​អាជីវកម្ម​​ជោគជ័យ បើ​មិន​ទាន់​មាន​ទម្លាប់ទាំង​ ៥​នេះ!​



ដូចម្តេច​ដែល​ហៅ​ថា​ម្ចាស់​អាជីវកម្ម​ជោគជ័យ? នៅ​ពេល​អ្នក​អាច​រក​ចំណូល​បាន​កាន់តែ​​ច្រើន អាជីវកម្ម​ចេះ​តែ​រីកចម្រើន​ខ្លាំង​ឡើងៗ​ទើប​ហៅ​ថា ម្ចាស់​អាជីវកម្ម​ជោគជ័យ?  អ្នក​អាច​ប្រហែល​ជា​គិត​ដល់​ចំណុច​ទាំងពីរ​​នេះ។ ប្រសិន​បើ​អ្នក​គិត​ដូច្នេះ​មែន នេះ​មានន័យ​ថា កម្រិត​ជា​​ម្ចាស់​អាជីវកម្ម​ជោគជ័យ​របស់​អ្នក​នៅ​មិន​ទាន់​មាន​វិជ្ជាជីវៈ​នៅ​ឡើយ​ទេ។

តាម​ពិត​ទៅ​ក្នុង​នាម​ជា​ម្ចាស់​អាជីវកម្ម​ជោគជ័យ អ្នក​គួរ​បង្កើត​ទម្លាប់​៥​នេះ​ទុក​ជា​មូលដ្ឋាន​គ្រឹះ​នៅ​ក្នុង​ការ​កសាង​ក្រុមហ៊ុន​របស់​​អ្នក។ សូម​ពិនិត្យ​មើល​ម្តង​មួយៗ ហើយ​ប្រៀបធៀប​មើល៍ ​តើ​អ្នក​មាន​​ចំណុច​ទាំង​អស់​នេះ​ហើយ​ឬ​នៅ? ​

១.ការ​ស្នើ​សុំ​រក​ជំនួយ
ម្ចាស់​អាជីវកម្ម​​ដែល​ជោគជ័យ​មិន​​ភ័យខ្លាច​ក្នុង​ការ​ស្វែងរក​ជំនួយ​​​​ដើម្បី​​​វិជ្ជាជីវៈ​របស់​ខ្លួន​នោះ​ឡើយ។ ​​អ្នក​ត្រូវ​​ទទួលស្គាល់​ថា​  អ្នក​មិន​អាច​ចេះ​គ្រប់យ៉ាង ឬ​គ្រប់​ជំនាញ​បាន​ទេ។  មិន​ចំពោះ​ថា  ​របៀប​ដំណើរការ​ទិញ​លក់ ​ការ​ផ្តល់​​ទុន​​​ឡើងវិញ ឬ​មតិយោបល់​​ពី​អ្នក​ជំនាញ​រូប​ណា​​នោះ​ទេ សុទ្ធតែ​អាច​ធ្វើ​ឲ្យ​អាជីវកម្ម​របស់​អ្នក​ដើរ​ទៅ​កាន់​បរិបទ​ថ្មី មួយ​បាន​យូរ​អង្វែង។ 

ហេតុដូច្នេះ​ហើយ​ក្នុង​នាម​អ្នក​ជា​ម្ចាស់​អាជីវកម្ម​មួយ អ្នក​ត្រូវ​ប្រាកដ​ថា អ្នក​បាន​​បង្កើត និង​រក្សា​ទំនាក់ទំនង​​កាន់តែ​​រឹងមាំ​ជាមួយ​ក្រុម​មនុស្ស​ដែល​មាន​បទពិសោធន៍​​ និង​សមត្ថភាព​​ខ្ពស់​ ជា​ពិសេស​អ្នក​ជំនាញ​ដែល​ធ្លាប់​ប្រឡូក​នៅ​ក្នុង​វិស័យ​អាជីវកម្ម​របស់​អ្នក។

២.សុចរិត​ភាព
អាច​ហៅ​ថា ម្ចាស់​អាជីវកម្ម​ជោគជ័យ​ម្នាក់​ដរាបណា​ម្ចាស់​អាជីវកម្ម​នោះ​​បាន​ផ្ដោត​យកចិត្ត​ទុកដាក់​លើ​ការ​ផ្តល់​គុណតម្លៃ​​យ៉ាង​ពិតប្រាកដ​មួយ​ពី​ផលិតផល ឬ​សេវាកម្ម​របស់​ខ្លួន​ទៅ​កាន់​អតិថិជន​ទាំងអស់។ ទោះជាយ៉ាងណាក៏ដោយ​ នៅ​ពេល​ដែល​ក្រុមហ៊ុន​របស់​អ្នក​រីកចម្រើន វា​ប្រហែល​ជា​​ត្រូវ​កាត់​បន្ថយ​ ឬ​កែតម្រូវ​​ចំណុច​ជា​ច្រើន​​ដើម្បី​រក្សា​ប្រាក់ចំណេញ​​បន្ត​ទៀត​។ ជា​ការពិត កំណើន​ប្រាក់​ចំណូល​គឺ​ជា​រឿង​​ចាំបាច់ ប៉ុន្តែ​វា​មិន​គួរ​​ក្លាយ​​ជា​គោលដៅ​ចុងក្រោយ​របស់​អ្នក​ឡើយ។ 

តាម​ពិត​ កេរ្តិ៍ឈ្មោះ​ល្អ​​ក្រុមហ៊ុន​របស់​អ្នក​គឺ​អាស្រ័យ​ទៅ​លើ​ថា តើ​អ្នក​បាន​​ផ្តល់​គុណតម្លៃ​​ច្រើន​កម្រិត​ណា​ដល់​អតិថិជន​​របស់​អ្នក? ​នៅ​ពេល​ដែល​អ្នក​រក​ឃើញ​ហើយ​នោះ លុយ​នឹង​រត់​មក​តាម​ក្រោយ។  សូម​​ដាក់​បញ្ចូល​សុចរិត​ភាព​និង​គុណតម្លៃ​នៅ​ក្នុង​ជំនួញ​របស់​អ្នក ​តាម​រយៈ​ការ​ជួយ​អតិថិជន​ សហគមន៍ ឬ​ចូលរួម​​កម្មវិធី​សប្បុរសធម៌​​នានា​ឲ្យ​បាន​កាន់តែ ច្រើន​ដើម្បី​បញ្ជាក់​ថា ជំនួញ​អ្នក​មិន​បាន​គិតតែ​រឿង​លុយ​តែមួយ​មុខ​ឡើយ។

​​​​៣.មាន​មហិច្ឆតា​ធំ
ម្ចាស់​អាជីវកម្ម​ម្នាក់​អាច​ត្រូវ​បាន​គេ​ចាត់ទុក​ថា ជោគជ័យ​​ត្រូវ​​មាន​មហិច្ឆតា​ធំ។ មិន​មែន​ដោយសារតែ​លុយ​ទើប​ធ្វើ​ឲ្យ​ខ្លួន​មាន​មហិច្ឆតា​ចង់​បើក​ជំនួញ​ឡើយ។ មហិច្ឆតា​នេះ​ហើយ​បាន​ធ្វើ​ឲ្យ​អ្នក​លះបង់​ពេលវេលា កម្លាំងកាយ​កម្លាំងចិត្ត​ ​ខិតខំ​​ប្រឹងប្រែង និង​ដឹកនាំ​​​អាជីវកម្ម​បើ​ទោះបី​ជា​ជួប​ឧបសគ្គ​រាប់មិនអស់​ក៏ដោយ។ អ្នក​នៅ​តែ​ពេញចិត្ត​ធ្វើ​វា អ្នក​ជឿជាក់ និង​មាន​សុទិដ្ឋិនិយម​ថា ​អាជីវកម្ម​របស់​អ្នក​នឹង​ដើរ​ទៅ​មុខ​កាន់តែ​​ប្រសើរ​ជាង​នេះ។

ដោយសារតែ​​​អ្នក​មាន​​ចំណង់​ចំណូលចិត្ត​ ក្តី​ស្រលាញ់​ និង​មាន​មហិច្ឆតា​​ក្នុង​មុខ​ជំនួញ​របស់​អ្នក វា​បាន​​លើកទឹកចិត្ត​​អ្នក​មិន​ឲ្យ​បោះបង់ ព្រម​ទាំង​ធ្វើ​វា​ឲ្យ​បាន​ល្អ​បំផុត​ដោយ​មិន​ខ្លាច​នឿយហត់។ 

៤.​រៀបចំ​គម្រោង​ត្រៀម​ទុកមុន​ជា​ស្រេច
ពេល​ខ្លះ វា​មាន​ការ​លំបាក​ដើម្បី​អាច​មើល​ធ្លុះ​ពី​រឿង​ដ៏​គួរ​ឲ្យ​ចាប់​អារម្មណ៍​ជា​ច្រើន​នៅ​ក្នុង​វិថី​ជំនួញ ហើយ​អាច​​ធ្វើ​វា​ឲ្យ​ក្លាយ​ទៅ​ជា​ទម្លាប់​របស់​អ្នក។ ទោះបី​ជា​បែប​នេះ​ក្តី ម្ចាស់​អាជីវកម្ម​ជោគជ័យ​ត្រូវ​គិត​ពី​គម្រោង​​អនាគត​ជាមុន​ជាមួយ​នឹង​រឿងរ៉ាវ​ដ៏​គួរឲ្យ​ចាប់​អារម្មណ៍​ទាំង​នោះ​។ អ្នក​ត្រូវ​មាន​​ហិរញ្ញវត្ថុ​ដ៏​រឹងមាំ និង​ផែនការ​រៀបចំ​បាន​​យ៉ាង​ល្អ​​សម្រាប់​អាជីវកម្ម​របស់​អ្នក​នៅ​ពេល​គ្រា​អាសន្ន​តូច ឬ​ធំ​ដែល​នឹង​កើត​មាន​ឡើង​ដោយ​យថាហេតុ។ 

ក្រៅ​តែ​ពី​ការ​ធ្វើ​ផែនការ​​​ទាំង​នេះ អ្នក​ក៏​គួរតែ​បង្កើត​ផែនការ​ជោគជ័យ​មួយ​ដើម្បី​ធ្វើ​ឲ្យ​ជំនួញ​របស់​អ្នក​កាន់តែ​មាន​ភាព​ងាយស្រួល​សម្រាប់​អ្នក​បន្ត​វេន បុគ្គលិក និង​អ្នក​ពាក់ព័ន្ធ​ផ្សេងៗ​ទៀត​នៅ​ពេល​អនាគត។ ប្រការ​នេះ​អាច​ធានា​បាន​ថា ជំនួញ​របស់​អ្នក​នឹង​មិន​ងាយ​ធ្លាក់​ចូល​ទៅ​ក្នុង​កណ្ដាប់ដៃ​របស់​អ្នក​បន្តវេន​ដែល​ទន់ជ្រាយ​ ​ឬ​​បរាជ័យ​ដោយ​គ្មាន​​វត្តមាន​របស់​អ្នក​នៅ​ពេល​អនាគត។ 

៥.លៃលក​ពេលវេលា​សម្រាប់​ខ្លួន​ឯង
ការ​គ្រប់គ្រង​ជំនួញ​មិនមែន​ជា​រឿង​មួយ​ងាយស្រួល​នោះ​ឡើយ ហើយ​ការ​ធ្វើ​ឲ្យ​ជំនួញ​​របស់​មាន​ស្ថិតិភាព​យូរអង្វែង និង​រីកចម្រើន​ទៅ​មុខ​គឺ​កាន់តែ​ក្លាយ​ជា​រឿង​មួយ​​គួរ​ឲ្យ​ឈឺក្បាល​​ទៅ​ទៀត​សម្រាប់​អ្នក​។ យ៉ាងណាមិញ អ្នក​មិន​​អាច​​អង្គុយ​​ឈ្ងោក​ធ្វើការ​នៅ​ការិយាល័យ​ពេញ​មួយ​ឆ្នាំ​នោះ​ដែរ។ អ្នក​ត្រូវការ​ពេល​សម្រាក ត្រូវការ​ពេលវេលា​សម្រាប់​​ជួបជុំ​គ្រួសារ ​មិត្តភក្ដិ ដំណើរ​កម្សាន្ត​ និង​កម្មវិធី​ផ្សេងៗ​ទៀត។

ហេតុដូច្នេះ​ហើយ​បើ​ទោះបី​ជា​ជំនួញ​របស់​អ្នក​សំខាន់​យ៉ាងណាក៏ដោយ អ្នក​ត្រូវ​លៃលក​ពេលវេលា​សម្រាប់​​ធ្វើ​សកម្មភាព​​ខាងលើ​នេះ។ បើ​អ្នក​បរាជ័យ​លើ​រឿង​នេះ ជីវិត​ជោគជ័យ​ក្នុង​ជំនួញ​របស់​អ្នក​ក៏​គ្មានន័យ​អ្វី​ដែរ។ អ្នក​​អាច​ជោគជ័យ​ក្នុង​ជំនួញ ប៉ុន្តែ​បរាជ័យ​លើ​រឿង​ផ្សេង​សុភមង្គល​ខ្លួន​ឯង ឬ​គ្រួសារ​​។ នេះ​មិន​គួរ​ជា​គោលដៅ និង​បុព្វហេតុ​ជីវិត​ដែល​គួរ​ឲ្យ​មោទនភាព​នោះ​ឡើយ៕

ប្រភព៖ Inc 

 

X
5s