ឯកសារមិនប្រក្រតីជាង ៣ ម៉ឺនច្បាប់ បានដកហូតពីជនបរទេសជាង៦៩ម៉ឺននាក់
យោងតាមឯកសាររបស់អគ្គនាយកដ្ឋានអន្តោប្រវេសន៍បានឲ្យដឹងថា រហូតមកដល់ពេលនេះអាជ្ញាធរបានដកហូតឯកសាររដ្ឋបាលកម្ពុជាមិនប្រក្រតីដែលកាន់កាប់ និងប្រើប្រាស់ដោយជនបរទេសគឺមានចំនួន ៣៧,៤៤១ច្បាប់ ក្នុងចំនួន ២០,០៩៣គ្រួសារ មនុស្សចំនួន ៦៩,៨៧១នាក់ ដែលភាគច្រើនជាជនជាតិវៀតណាម។ ឯកសារមិនប្រក្រតីទាំងនោះរួមមាន៖ អត្តសញ្ញាណប័ណ្ណសញ្ជាតិខ្មែរ សៀវភៅគ្រួសារ និងសៀវភៅស្នាក់នៅជាដើម។
រូបភាព៖ http://daily-khmer.com
តាមប្រសាសន៍សម្ដេចក្រឡាហោម ស ខេង បានលើកឡើងថា ចាប់ពីពេលនេះតទៅត្រូវតែលុបបំបាត់ចំពោះការផ្ដល់នូវឯកសារ ឬអត្តសញ្ញាណដល់ជនបរទេសដោយគ្មានអនុក្រឹត្យ ឬរាជក្រឹត្យ។ សម្ដេចបានគូសបញ្ជាក់ថា «កន្លងមកមានករណីនេះច្រើនណាស់ចំពោះការផ្ដល់នូវឯកសារគ្មានរាជក្រឹត្យត្រឹមត្រូវដល់ជនបរទេស ហើយក្នុងនាមជាមន្ត្រីអនុវត្តន៍ច្បាប់ត្រូវ បញ្ឈប់ដាច់ខាត់បើពុំដូច្នេះទេនឹងត្រូវទទួលទោសទៅតាមច្បាប់»។
សម្ដេច អះអាងថា ចាប់ពីពេលនេះតទៅនឹងគ្មានការលើកលែងចំពោះមន្ត្រីណាដែលផ្ដល់នូវឯកសារសញ្ជាតិកម្ពុជាមិនត្រឹមត្រូវដល់ជនបរទេសនោះឡើយ ខណៈរហូតមកដល់ពេលនេះការដកហូតឯកសាររដ្ឋបាលកម្ពុជាមិនប្រក្រតី ដែលកាន់កាប់ដោយជនបរទេសបានចំនួន ៣៧,៤៤១ច្បាប់ និងបណ្ដេញទៅប្រទេសគេវិញជិតពីរម៉ឺននាក់ហើយនោះ៕
ដោយ៖ ជួប ស្រីរ័ត្ន
