កាណាដាគ្រោងចំណាយថវិកាជាង ៩១លានដុល្លារទិញសំលៀកបំពាក់ពីកម្ពុជា
បើតាមតំណាងក្រុមហ៊ុន Reitman's Global Sourcing on Garment ដៃគូពាណិជ្ជកម្មដ៏សំខាន់មួយរបស់កម្ពុជាបានឲ្យដឹងថា នៅក្នុងកំឡុងឆ្នាំ២០១៩-២០២០នេះ ប្រទេសកាណាដាគ្រោងនឹងចំណាយថវិកាប្រមាណជាង៩១លានដុល្លារអាមេរិក លើការទិញសំលៀកបំពាក់ពីប្រទេសកម្ពុជា ដែលទំហំនេះគឺខ្ពស់ជាងការបញ្ជាទិញពីប្រទេសចិនទៅទៀត។ នេះបើតាមការផ្សាយរបស់ក្រសួងពាណិជ្ជកម្ម។
តាមប្រភពខាងបានឲ្យដឹងថា កាលពីថ្ងៃទី១៧ ខែកក្កដា ឆ្នាំ២០១៩កន្លងទៅ នៅជំនួបជាមួយ ឯកឧត្ដម ឱក ប៊ុង រដ្ឋមន្ត្រីស្ដីទីក្រសួងពាណិជ្ជកម្ម ប្រធានក្រុមហ៊ុន Reitman លោក ហ្គារី រ៉ូស (Gary Ross) បានបង្ហាញពីចំណាប់អារម្មណ៍ចំពោះភាពរីកចម្រើននៃឧស្សាហកម្មកាត់ដេរនៅកម្ពុជា ព្រមទាំងបានកោតសរសើរចំពោះវិធានការថ្មីៗរបស់រាជរដ្ឋាភិបាលកម្ពុជា តាមរយៈការធ្វើឱ្យប្រសើរឡើងនូវបរិយាកាសធុរកិច្ច និងវិនិយោគ។
ឯកឧត្ដមរដ្ឋមន្ត្រីស្ដីទី បានជម្រាបភាគីកាណាដា អំពីវឌ្ឍនភាពសេដ្ឋកិច្ច និងកំណើននាំចេញរបស់កម្ពុជាក្នុងរយៈពេលពីរទសវត្សរ៍ចុងក្រោយ ដែលបានកើនចាប់ពីទឹកប្រាក់ ១ប៊ីលានដុល្លារអាមេរិក (២០០១) ដល់ ១៣ប៊ីលានដុល្លារអាមេរិក (២០១៨) ព្រមទាំងការប្ដេជ្ញាចិត្តរបស់រាជរដ្ឋាភិបាលកម្ពុជា ក្នុងការបន្តគាំទ្រគម្រោងរោងចក្រកាន់តែប្រសើរឡើងនៅកម្ពុជា (BFC) របស់អង្គការពលកម្មអន្តរជាតិ (ILO) ដើម្បីលើកស្ទួយលក្ខខណ្ឌការងារនៅក្នុងឧស្សាហកម្មវាយនភណ្ឌ និងកាត់ដេរសំលៀកបំពាក់៕
ដោយ៖ ជួប ស្រីរ័ត្ន
