បើអ្នកមិនអាចឆ្លើយសនួរ ៦ នេះបានទេ អ្នកទំនងមិនមែនជាអ្នកដឹកនាំល្អម្នាក់ដូចអ្នកគិតឡើយ
មនុស្សគ្រប់គ្នាសុទ្ធតែជាមេដឹកនាំ គ្រាន់តែអ្នកខ្លះជាអ្នកដឹកនាំខ្លួនឯងដើម្បីឆ្ពោះទៅរកគោលដៅមួយ រីឯអ្នកខ្លះជាអ្នកដឹកនាំក្រុមដែលមានមនុស្សច្រើននាក់ ដើម្បីធ្វើកិច្ចការអ្វីមួយឲ្យទទួលបានលិទ្ធផលអ្វីមួយដែលពួកគេពេញចិត្ត។ ប្រសិនជា មិនមានគន្លឹះឬវិធីសាស្ត្រដឹកនាំទេនោះ នោះអ្នកមិនអាចទទួលបានភាពជោគជ័យឡើយ។
ដើម្បីក្លាយជាអ្នកដឹកនាំល្អគឺទាមទារឲ្យមានលក្ខណសម្បត្តិជាច្រើន។ ក៏ប៉ុន្តែប្រសិនបើអ្នកចង់ដឹងថា អ្នកមានសមត្ថភាពធ្វើជាអ្នកដឹកនាំគេដែរឬអត់ អ្នកអាចសាកល្បងឆ្លើយសំនួរ ៦ ខាងក្រោមនេះក៏បាន។ ប្រសិនបើចម្លើយរបស់អ្នកអវិជ្ជមាន នោះមានន័យថា ភាពជាអ្នកដឹកនាំរបស់អ្នកនៅឆ្ងាយនៅឡើយ។
១.តើអ្នកយល់ពីអារម្មណ៍របស់អ្នក និងអ្នកដទៃដែរឬទេ?
អ្នកដឹកនាំដ៏អស្ចារ្យម្នាក់ ត្រូវមានឆន្ទៈដើម្បីឲ្យមានតម្លាភាព និងជាមនុស្សដែលអាចយល់ពីពីខ្លួនឯងច្បាស់។ ទន្ទឹមនឹងនេះ បុគ្គលប្រភេទនេះមិនមែនយល់តែអារម្មណ៍របស់ខ្លួនប៉ុណ្ណោះទេ ពោលគឺត្រូវយល់ពីអារម្មណ៍របស់អ្នកដទៃនៅជុំវិញខ្លួនដែរ។ បើអ្នកមានចំណុចមួយនេះ អ្នកត្រូវតែបើកចិត្តទូលាយ និងពេលខ្លះគិតប្រយោជន៍របស់អ្នកដទៃឲ្យលើសពីប្រយោជន៍របស់ខ្លួនទៀតផង។
២.តើអ្នកពិតជាឲ្យតម្លៃដល់អ្នកដទៃក្នុងនាមជាមនុស្សម្នាក់ដែរឬទេ?
អ្នកដឹកនាំល្អត្រូវឲ្យតម្លៃដល់អ្នកដទៃដោយការផ្តល់ទំនុកចិត្ត និងភាពជឿជាក់ទៅលើមនុស្សជុំវិញខ្លួន។ បុគ្គលប្រភេទនេះ ត្រូវបង្ហាញការគោរព និងភាពថ្លៃថ្នូរ ហើយរក្សាបាននូវគុណតម្លៃសម្រាប់បុគ្គលិក ឬមនុស្សក្រោមបង្គាប់របស់ខ្លួននៅក្នុងកម្រិតជាអតិបរមា។ ក្រៅពីនេះ អ្នកដឹកនាំល្អជាមនុស្សពូកែស្ដាប់ដោយយកចិត្តទុកដាក់ដោយវិនិច្ឆ័យបានគ្រប់ជ្រុងជ្រោយ និងជារឿយៗតម្កល់តម្លៃអ្នកដទៃមុនខ្លួនជានិច្ច។
៣.តើអ្នកមានចំណង់ចំណូលចិត្តពីកំណើតជាមនុស្សចង់រីកចម្រើន និងជួយឲ្យអ្នកដទៃមានការអភិវឌ្ឍដែរឬទេ?
ក្នុងនាមជាអ្នកដឹកនាំដ៏ល្អមួយរូប ការសិក្សារៀនសូត្រអភិវឌ្ឍសមត្ថភាពពិតជាសំខាន់ខ្លាំងណាស់។ ថ្វីត្បិតតែកំពុងដឹកនាំគេក៏ពិតមែន ក៏មនុស្សប្រភេទនេះលះបង់ពេលវេលាមួយចំនួនដើម្បីរៀនសូត្រជាប្រចាំ។ ទន្ទឹមនឹងនេះ ខ្លួនក៏ត្រូវចេះចែករំលែក បណ្តុះបណ្តាល លើកទឹកចិត្ត និងជួយជ្រោមជ្រែងឲ្យអ្នកដទៃទទួលបានចំណេះដឹងថ្មីៗ ព្រមទាំងទទួលបានការសិក្សាអភិវឌ្ឍសមត្ថភាពផងដែរ។
៤.តើអ្នកបានដឹកនាំពួកគេឲ្យមានភាពក្លាហាន និងមានភាពជឿជាក់នៅពេលអនាគតខាងមុខដែរឬទេ?
អ្នកដឹកនាំអស្ចារ្យម្នាក់មានការទទួលខុសត្រូវខ្ពស់ជាអ្នកបង្កើតចក្ខុវិស័យសម្រាប់ពេលអនាគត និងដឹកនាំមនុស្សក្រោមបង្គាប់ឲ្យធ្វើការជាធ្លុងមួយ។ មិនតែប៉ុណ្ណោះ មេដឹកនាំប្រភេទនេះ ជាអ្នកផ្ដួចផ្ដើម និងជំរុញឲ្យក្រុមការងារទាំងអស់សម្រេចបានសមិទ្ធផលប្រកបដោយភាពជឿជាក់ និងមានទំនុកចិត្តដូចបានគ្រោងទុក។
៥.តើអ្នកចេះចែករំលែកភាពជាអ្នកដឹកនាំរបស់អ្នកដែរឬទេ?
អ្នកដឹកនាំដ៏ល្អម្នាក់មិនអាចហៅថា ជាអ្នកដឹកនាំល្អបានទេប្រសិនបើខ្លួនមិនអាចចែករំលែក ឬ ផ្តល់សិទ្ធិអំណាចភាពជាអ្នកដឹកនាំរបស់ខ្លួនទៅកាន់អ្នកផ្សេងទៀតនៅក្រោមបង្គាប់ដើម្បីបន្តវេន។ តាមរយៈការចែករំលែកឋានៈ តួនាទី និងសិទ្ធិអំណាច អ្នកដឹកនាំល្អមានឥទ្ធិពលដល់អ្នកដទៃដោយការប្រើប្រាស់មធ្យោបាយត្រជាក់ជំនួសឲ្យការបង្ខិតបង្ខំ ឬវិធីសាស្ត្របែបអត្តនោម័តិ។
៦.តើអ្នកបានអនុញ្ញាតឲ្យមានភាពសំបូរបែបនៅក្នុងក្រុមការងារ ឬវប្បធម៌ការងារក្នុងស្ថាប័នដែរឬទេ?
អ្នកដឹកនាំដ៏អស្ចារ្យម្ចាស់ ត្រូវចេះលើកកម្ពស់ឲ្យមនុស្សក្រោមបង្គាប់ទទួលបានអារម្មណ៍ថា គុណតម្លៃ កម្មសិទ្ធិ និងការទំនាក់ទំនងនៅក្នុងក្រុមហ៊ុនត្រូវបានគោរព ផ្តល់ឲ្យ និងការពារក្នុងស្មារតីការងារជាក្រុម។ ពួកគេត្រូវទទួលស្គាល់ និងគោរពតម្លៃនៃភាពខុសគ្នារបស់ក្រុមការងារម្នាក់ៗទាំងសមត្ថភាព ទេពកោសល្យ ជីវិតផ្ទាល់ខ្លួន និងទស្សនៈនៅក្នុងកន្លែងការងារ៕
ប្រភព៖ Businessinsider
