គម្រោង​រោងចក្រ​ផលិត​ស៊ីម៉ង់ត៍​ លើ​ទំហំ​ផ្ទៃ​ដី​៣២​ហិកតា របស់​ក្រុមហ៊ុន ស៊ីម៉ង់ត៍កម្ពុជា ចក្រីទីង ដែល​មាន​ទីតាំង​ស្ថិត​នៅ​ខេត្ត​កំពត ត្រូវ​បាន​ក្រសួង​អនុម័ត​គាំទ្រ​ចំពោះ​ការ​សាងសង់ បន្ទាប់​ពី​កិច្ច​ប្រជុំ​អន្តរ​ក្រសួង​វាយ​តម្លៃ​ពី​ផល​ប៉ះពាល់​បរិស្ថាន និង​សង្គម​ពេញលេញ (ESIA) ដោយ​ក្រុមហ៊ុន​ទីប្រឹក្សា SBK Research and Development Co., Ltd.  កាល​ពី​ថ្ងៃ​ទី២៣ ខែ​កក្កដា ឆ្នាំ​២០១៩ ក្រោម​អធិបតីភាព ឯកឧត្ដម ផៃ ប៊ុនឈឿន រដ្ឋលេខាធិការ​ប្រចាំការ​ក្រសួង​បរិស្ថាន។

ឯកឧត្ដម ផៃ ប៊ុនឈឿន រដ្ឋលេខាធិការ​ប្រចាំ​ការ​ក្រសួង​បរិស្ថាន មាន​ប្រសាសន៍​ថា គម្រោង​រោងចក្រ​ផលិត​ស៊ីម៉ង់​ខាង​លើ​មាន​ទីតាំង​ស្ថិត​នៅ​ក្នុង​ភូមិ​សាស្ត្រ ​ឃុំ​កណ្តោល ស្រុក​ទឹកឈូ ខេត្ត​កំពត ត្រូវ​បាន​គាំទ្រ និង​លើក​ទឹកចិត្ត​ដោយ​រដ្ឋាភិបាល​កម្ពុជា។

ជា​លទ្ធផល​នៃ​អង្គប្រជុំ​បាន​មាន​ដូចខាងក្រោម៖

1. គាំទ្រ​ចំពោះ​គម្រោង​បង្កើត​រោងចក្រ​ផលិត​ស៊ីម៉ងត៍

2. សូម​ក្រុមហ៊ុន​ចូលរួម​ដាំ​ដើម​ឈើ​ឲ្យ​បាន​ច្រើន​នៅ​ជុំវិញ​ទីតាំង​គម្រោង

3. សូម​ក្រុមហ៊ុន​មាន​ផែន​ការ​លើ​ការ​ប្រើប្រាស់​ទឹក​ក្រោម​ដី

4. ក្រុមហ៊ុន​ត្រូវ​គ្រប់គ្រង​សំណល់​រឹង-រាវ ឲ្យ​បាន​ល្អ និង​សំណូមពរ​មាន​អាង​ប្រព្រឹត្តកម្ម​សំណល់​រាវ

5. សូម​ក្រុមហ៊ុន​បំពាក់​ឧបករណ៍​ស្វ័យ​ត្រួត​ពិនិត្យ​គុណភាព​ខ្យល់ និង​ឧបករណ៍​ស្វ័យ​ត្រួត​ពិនិត្យ​គុណភាព​ខ្យល់ និង​ឧបករណ៍​ចាប់​យក​ភាគល្អិត​ចេញ​ពី​ចំហេះ 

6. ក្រុមហ៊ុន​ត្រូវ​មាន​ឧបករណ៍​សុវត្ថិភាព​សម្រាប់​បុគ្គលិក-កម្មករ​ប្រើប្រាស់

7. ការ​ដឹក​ជញ្ជូន​របស់​ក្រុមហ៊ុន​ត្រូវ​គោរព​ទៅ​តាម​បទដ្ឋាន​បច្ចេកទេស និង​ការ​បើកបរ​ត្រូវ​គោរព​ច្បាប់​ចរាចរណ៍

8. សូម​ក្រុមហ៊ុន​ពិនិត្យ​ពី​ការ​បង្កើន​មូនិធិ​បរិស្ថាន និង​សង្គម៕

រូបភាព៖ RFI

ដោយ៖ ជួប ស្រីរ័ត្ន