អជ្ញាធរជាតិអប្សរាគ្រោងសាងសង់ផ្លូវសម្រាប់ទេសចរជិះកង់ ប្រវែង២៣គីឡូម៉ែត្រនៅតំបន់អង្គរ
ដើម្បីសម្រួលដល់ការធ្វើដំណើររបស់ភ្ញៀវទេសចរដែលមានបំណងចង់ចូលទៅកម្សាន្តនៅតំបន់រមណីយដ្ឋានអង្គរដោយការជិះកង់ អជ្ញាធរជាតិអប្សរាគ្រោងនឹងសាងសង់ផ្លូវសម្រាប់កង់ដែលមានប្រវែង២៣គីឡូម៉ែត្រនាពេលអនាគត។ នេះបើតាមការចុះផ្សាយរបស់វិទ្យុជាតិកម្ពុជា។
លោក ឡុង កុសល អនុប្រធានផ្សព្វផ្សាយអជ្ញាធរជាតិអប្សរា ប្រាប់វិទ្យុជាតិកម្ពុជាថា ក្រុមជំនាញកំពុងសិក្សាលើលទ្ធភាពនៃការសាងសង់ផ្លូវ ដើម្បីបម្រើផលប្រយោជន៍របស់ប្រជាជនក្នុងតំបន់ ក៏ដូចជាសិស្សានុសិស្សដែលជិះកង់ទៅរៀន ភ្ញៀវទេសចរជាតិ និងអន្តរជាតិ ដែលធ្វើដំណើរទៅកាន់រមណីយដ្ឋានអង្គរផងដែរ។
លោកថា គម្រោងផ្លូវនេះគឺសាងសង់ដាច់ដោយឡែកពីផ្លូវម៉ូតូ-ឡានដែលជាផ្លូវទ្វេទិស មានទទឹង២ម៉ែត្រ និងមានចង្អូរផ្លូវទឹកសងខាង ដើម្បីកុំឲ្យមានទឹកដក់រដូវវស្សា ហើយផ្លូវនេះគឺស្របនឹងផ្លូវធ្វើដំណើរបច្ចុប្បន្ន។ ជាមួយនិងគម្រោងនេះដែរ រមណីយដ្ឋានអង្គរនាថ្ងៃអនាគតនឹងត្រូវឲ្យធ្វើដំណើរដោយមធ្យោបាយដែលមិនប៉ះពាល់ដល់បរិស្ថាន ផ្សែងពល និងសំឡេងរំញ័រប៉ះពាល់ដល់ប្រាង្គប្រាសាទ៕
រូបភាព៖ PhnomPenh Time
អត្ថបទ៖ ក្រសួងព័ត៌មាន
