សញ្ញាណទាំង ៥បញ្ជាក់ថាអាជីវកម្មរបស់អ្នកទំនងមិនអាចមានដង្ហើមរស់ឆ្លងផុតពី ១២ ខែដំបូង
តើអ្នកអាចផ្តល់ចម្លើយមួយឲ្យបានពិតប្រាកដបានទេថា តើអ្នកធ្វើដូចម្តេចដើម្បីឲ្យអាជីវកម្មរបស់អ្នកអាចមានដង្ហើមរស់បានក្នុងរយៈពេល ១២ខែដំបូង? ជាការពិតនៅមុនពេលអ្នកចាប់ផ្តើមធ្វើជំនួញ អ្នកប្រហែលជាមានក្តីរំពឹងទុកខ្លាំងថា ជំនួញរបស់អ្នកនឹងដើរបានវែងឆ្ងាយទៅមុខ និងអាចពង្រីកខ្លួនកាន់តែធំជាមួយនឹងអារម្មណ៍រំភើបរបស់អ្នក។
ប៉ុន្តែអ្នកក៏បានដឹងដែរថា អាជីវកម្មថ្មីថ្មោងច្រើនប៉ុណ្ណាដែលបានបើកហើយបរាជ័យទៅវិញភ្លាមៗ។ ការលើកឡើងនេះមិនមែនចង់បំបាក់ស្មារតីរបស់អ្នកនោះទេ ហើយការដែលអ្នកមានគំនិត ឬយុទ្ធសាស្ត្រល្អតែមួយមុខ វាមិនទាន់គ្រប់គ្រាន់ទេ។ អាជីវកម្មរបស់អ្នកមានហានិភ័យគ្រប់ទិសទី ហើយក្នុងចំណោមហានិភ័យទាំងនោះ មានសញ្ញាណ ៥ដែលអាចគំរាមកំហែងអាជីវកម្មរបស់អ្នកហែលឆ្លងមិនផុតក្នុងរយៈពេល ១២ខែដំបូង។
១. អ្នកវិនិយោគផ្អាកឈប់ផ្តល់ទុនបន្ថែម
ជាទូទៅ ដៃគូភាគហ៊ុន ឬអ្នកវិនិយោគ គឺជាអ្នកផ្តល់ទុនសំខាន់ដើម្បីចាប់ដៃគាំទ្រលើការចំណាយផ្សេងៗសម្រាប់អភិវឌ្ឍអាជីវកម្មរបស់អ្នកឲ្យកាន់តែរីកចម្រើនបានឆាប់រហ័សតាមដែលអាចធ្វើបាន។ យ៉ាងណាមិញ នៅក្នុងរយៈពេលមួយស្រាប់តែអ្នកទាំងនេះបានផ្អាកឈប់ផ្តល់ទុនបន្ថែមទៀត នោះជាសញ្ញាណអវិជ្ជមានមួយបញ្ជាក់ថា អាជីវកម្មរបស់អ្នកមានបញ្ហាហើយ។ ពួកគេអាចនឹងមិនបន្តរកស៊ី ឬចាប់អារម្មណ៍នឹងមុខជំនួញរបស់អ្នកបន្តទៀតឡើយ។ ហេតុដូច្នេះ អ្នកត្រូវប្តូរយុទ្ធសាស្ត្រថ្មីជាបន្ទាន់ បើមិនដូច្នេះទេ អាជីវកម្មរបស់អ្នកនឹងស្លាប់ជាមិនខាន។
២. អ្នកមិនទាន់រៀបចំគម្រោងសម្រាប់សាកល្បង ឬអភិវឌ្ឍអាជីវកម្មឲ្យកាន់តែប្រសើរឡើង
ដោយសារតែទីផ្សារនៅពេលអនាគតមានការប្រែប្រួលដែលធ្វើឲ្យអ្នកមិនអាចព្យាករណ៍បាន អ្នកត្រូវត្រៀមខ្លួនជាមុនដើម្បីរៀបចំគម្រោងអាជីវកម្ម យុទ្ធសាស្ត្រ ភាពច្នៃប្រឌិត និងកែប្រែអភិវឌ្ឍមុខមាត់អាជីវកម្មដើម្បីឲ្យដើរទាន់តាមបរិបទសម័យទំនើប។ អ្នកត្រូវធ្វើតេស្តគម្រោងយុទ្ធសាស្ត្រទាំងនេះ របៀបប្រតិបត្តិការ និងការវិភាគ ទៅលើបញ្ហាប្រឈមដូចជាគូប្រជែងជាដើមថា តើវាអាចជោគជ័យបានកម្រិតណា។ ផ្ទុយទៅវិញ បើអ្នកអវត្តមានក្នុងចំណុចនេះ សូមកុំដាក់ក្តីសង្ឃឹមពេកថាអាជីវកម្មរបស់អ្នកអាចនឹងដើរទៅមុខយ៉ាងរលូននោះ។
៣. អាជីវកម្មរបស់អ្នកគ្មានវិធីសាស្ត្រថ្មីដើម្បីដំណោះស្រាយបញ្ហាដែលមានស្រាប់នៅលើបញ្ហាទីផ្សារ
សូមចាំថា របាំងនៃការប្រកួតប្រជែងនៅលើទីផ្សារមិនមែនសុទ្ធតែធ្វើឲ្យអាជីវកម្មរបស់អ្នកបរាជ័យនោះឡើយ។ តាមការពិត គូប្រជែងរបស់អ្នកប្រៀបដូចជាកញ្ចក់ឆ្លុះមួយដើម្បីបញ្ជាក់ឲ្យឃើញថា តើអ្នកមានចំណុចខ្លាំង និងចំណុចខ្សោយអ្វីខ្លះ? គូប្រជែងរបស់អ្នកអាចខ្លាំងជាងអ្នក រឹងមាំ ជាងអ្នក ឬមានទីផ្សារធំជាងអ្នកក៏ពិតមែន ក៏ប៉ុន្តែប្រសិនបើអ្នកមានយុទ្ធសាស្ត្រ ឬគន្លឹះថ្មីដែលអាចដោះស្រាយបញ្ហានានារបស់អតិថិជនដែលមានស្រាប់យ៉ាងមានប្រសិទ្ធភាពជាងគូប្រជែងរបស់អ្នក នោះគឺជាចំណុចពិសេសមួយនៃអាជីវកម្មរបស់អ្នករួចទៅហើយ។ យ៉ាងណាមិញ បើអាជីវកម្មរបស់អ្នកគ្រាន់តែធ្វើឡើងដូចគេដូចឯង នោះវានឹងធ្វើឲ្យអ្នកពិបាកងើបមុខយកឈ្នះគូប្រជែងរបស់អ្នកណាស់។
៤. រកចំណូលបានយ៉ាងត្រដាបត្រដួស
គោលការណ៍ធ្វើជំនួញគឺសាមញ្ញទេ។ បើអ្នកចង់បានលុយ អ្នកត្រូវតែចំណាយលុយ ហើយត្រូវធ្វើឲ្យចំនួនលុយដែលអ្នកបានចំណាយនោះរកលុយចូលមកវិញឲ្យបានច្រើនជាងចំនួនលុយដែលអ្នកចំណាយ។ និយាយឲ្យស្រួលយល់គឺថា ការករស៊ីដាច់ខាតត្រូវតែចំណេញ។ បើមិនចំណេញទេ មុខជំនួញអ្នកនឹងក្ស័យជាមិនខាន។ ទន្ទឹមនឹងគ្នានេះ ប្រសិនបើអ្នកសង្កេតឃើញថា អាជីវកម្មរបស់អ្នកអាចរកចំណូលឲ្យអ្នកត្រឡប់មកវិញបានតិចតួចប៉ុណ្ណោះ ឬពេលខ្លះតិចជាងចំណាយទៀតនោះ ជម្រើសគឺមានតែ២ប៉ុណ្ណោះ គឺ (១) ត្រូវប្តូរយុទ្ធសាស្ត្រថ្មី បើមិនដូច្នេះទេ (២) មានតែបិទអាជីវកម្មចោលតែម្តង។
៥. អាជីវកម្មរបស់អ្នកដើរក្រោយបរិបទបច្ចេកវិទ្យា
ពិភពលោកមានការប្រែប្រួលឥតឈប់ឈរ ហើយគ្មានអ្វីដែលធ្វើឲ្យការផ្លាស់ប្ដូរនេះមានភាពឆាប់រហ័សជាងបច្ចេកវិទ្យានោះឡើយ។ ប្រព័ន្ធបច្ចេកវិទ្យាដែលប្រើប្រាស់នៅក្នុងអាជីវកម្មដូចជា Fintech (បច្ចេកវិទ្យាហិរញ្ញវត្ថុ) ព័ត៌មានវិទ្យា (IT) បណ្ដាញដំណភ្ជាប់អ៊ីនធឺណិត (IoT) រួមទាង បច្ចេកវិទ្យាឆ្លាតវៃ (AI) ជាដើមសុទ្ធតែពេញនិយម និងអាចត្រូវបានគេប្រើប្រាស់យ៉ាងមានសក្ដានុពលនៅពេលអនាគត។ ដើម្បីឲ្យអាជីវកម្មរបស់អ្នក អាចពង្រីកខ្លួនចូលប្រឡូកទៅក្នុងវិថីអាជីវកម្មនៅពេលខាងមុខបានយូរអង្វែង អ្នកត្រូវតែត្រៀមខ្លួនចាប់ពីថ្ងៃនេះតទៅ។ ប្រសិនបើអ្នកមិនផ្លាស់ប្តូរតាមបរិបទនេះទេ អាជីវកម្មរបស់អ្នកនឹងស្លាប់ជាមិនខាន៕
ប្រភព៖ Inc
