លោក Warren Buffett ប្រាប់ថា ក្នុងមួយថ្ងៃអ្នកត្រូវប្ដេជ្ញាចិត្តបង្កើតឲ្យបានទម្លាប់ជាក់លាក់មួយនេះ​



លោក Warren Buffett ត្រូវ​បាន​គេ​ទទួលស្គាល់​ថា ​​ជា​អ្នក​វិនិយោគ​កំពូល​ក្នុង​លោក​ដែល​សំបូរ​ទៅ​ដោយ​ដំបូន្មាន មតិយោបល់ និង​គំនិត​ល្អៗ​សម្រាប់​អប់រំ​ដល់​មនុស្ស​​ជុំវិញ​ពិភពលោក​ជា​ពិសេស​​ពី​របៀប​ធ្វើ​ឲ្យ​ជីវិត​រស់​នៅ​មាន​សុភមង្គល និង​ជោគជ័យ។

គេ​នៅ​ចាំ​បាន​ថា មហាសេដ្ឋី​វ័យ ៨៨ ឆ្នាំ​រូប​នេះ​​ធ្លាប់​និយាយ​ថា ភាព​ខុសគ្នា​រវាង​បុគ្គល​ជោគជ័យ និង​បុគ្គល​ជោគជ័យ​ពិតប្រាកដ​គឺ​នៅ​ត្រង់​​ថា បុគ្គល​ជោគជ័យ​ពិតប្រាកដ​​​​ចូលចិត្ត​បដិសេធន៍​ស្ទើរតែ​​អ្វីៗ​គ្រប់យ៉ាង​ទាំងអស់។ តើ​ឃ្លា​មួយ​នេះ​មាន​​ន័យ​ដូចម្តេច? 

សម្រាប់​មហាសេដ្ឋី  Buffett  ឃ្លា​ដែល​លោក​​លើក​ឡើង​ថា "បុគ្គល​ជោគជ័យ​ពិតប្រាកដ​​​​ចូលចិត្ត​បដិសេធន៍​ស្ទើរតែ​​អ្វីៗ​គ្រប់យ៉ាង​ទាំងអស់” នោះ គឺ​លោក​ចង់​មានន័យ​ថា លោក​ចង់​ដាក់​កំហិត​ខ្លួន​លោក​មិន​ឲ្យ​​បង្កើត​ទម្លាប់​មិន​ល្អ​តាមតែ​អំពើ ចិត្ត​នូវ​អ្វី​ដែល​លោក​យល់​ថា វា​នឹង​ធ្វើ​ឲ្យ​លោក​អាច​ធ្លាក់​ខ្លួន​កាន់តែ​ជ្រៅ​។ ទម្លាប់​មិន​ល្អ​ទាំង​នោះ​ហើយ​ដែល​ជា​ឧបសគ្គ​​បង្អាក់​ដំណើរ​​អ្នក​មិន​ឲ្យ​ដើរ​ទៅ​មុខ​បាន​​​វែងឆ្ងាយ​ជាង​នេះ ឬ​ទាញ​ទម្លាក់​អ្នក​ឲ្យ​បរាជ័យ ខាត​​ទាំង​ពេលវេលា លុយកាក់ និង​ថាមពល​​របស់​អ្នក​ឥតប្រយោជន៍​។ ​

តាម​ការ​លើក​ឡើង​របស់​​​​លោក  Buffett  មាន​​​សកម្មភាព​មួយ​ចំនួន​ខាងក្រោម​នេះ​ដែល​អ្នក​ត្រូវ​ "បដិសេធន៍​”​ដែល​ក្នុង​នោះ​រួមមាន៖ 

​​១. បដិសេធន៍​ចំពោះ​គោលដៅ និង​ការងារ​អាទិភាព​ច្រើន​​ពេក 
ក្បូន​រៀបចំ​គោលដៅ​របស់​មហាសេដ្ឋី Buffett ​គឺ​មាន​ ៣ ជំហាន​គឺ៖
-សរសេរ​គោលដៅ​​អាជីព​ការងារ​​សំខាន់ៗ​របស់​អ្នក​ឲ្យ​បាន ២៥ មុខ​
-បន្ទាប់​មក​ជ្រើសរើស​គោលដៅ​ដែល​អ្នក​យល់​ថា ​​សំខាន់​ជាងគេ និង​ចាំបាច់​ជាងគេ​បំផុត​​​ឲ្យ​បាន​ ៥ 
-ហើយ​ចុងក្រោយ គូសចោល​គោលដៅ​មិន​សំខាន់​ចំនួន ២០​ទៀត​បើ​ទោះបី​ជា​វា​សំខាន់​សម្រាប់​អ្នក​ខ្លះៗ​ក៏ដោយ។

​មហាសេដ្ឋី​មាន​ប្រាក់​ជាង ៨៤ ពាន់​លាន​ដុល្លារ​រូប​នេះ​យល់​ថា គោលដៅ​ចំនួន ២០ ដែល​អ្នក​គូសចោល​នោះ ​វា​មិន​មាន​តម្លៃ ហើយ​ក៏​មិនមែន​ជា​រឿង​អាទិភាព​សម្រាប់​អ្នក​ដែរ។ អ្នក​​មិន​ត្រូវ​ចំណាយ​ពេល​ឥតប្រយោជន៍​លើ​គោលដៅ​ទាំង​នោះ​ទេ ហើយ​គួរ​យក​ពេលវេលា​ និង​ថាមពល​ផ្ដោត​លើ​គោលដៅ​៥​ធំៗ​ដែល​សំខាន់ និង​ចាំបាច់​បំផុត​​សម្រាប់​អ្នក​វិញ។

២. បដិសេធន៍​ចំពោះ​​ភាព​ល្អ​ឥតខ្ចោះ​របស់​អ្នក
ភាព​ល្អ​ឥតខ្ចោះ​គឺ​ជា​គោលការណ៍​មួយ​ប្រៀប​ដូច​ជា​​ថ្នាំពុល​​​ដ៏​មាន​ប្រសិទ្ធភាព​ដែល​អាច​បណ្តាល​ឲ្យ​ក្រុម​ការងារ​​​​ទាំងមូល​របស់​អ្នក​ស្លាប់​​​បាន។  គោលការណ៍​នេះ ​វា​មាន​តែ​ត្រឹម​ទ្រឹស្ដី​ប៉ុណ្ណោះ ខណៈ​ដែល​គោលការណ៍​ពិតប្រាកដ​​​សម្រាប់​មនុស្ស​ម្នាក់ៗ គឺ​ធ្វើ​អ្វី​ក៏​ដោយ​ឲ្យ​តែ​បាន​ប្រសើរ​​ជាង​ថ្ងៃ​ម្សិលមិញ ឬ​លទ្ធផល​ល្អ​បាន​ជាង​មុន​ គឺ​ចាត់​ទុក​ថា ​ជា​រឿង​ល្អ​បំផុត​ហើយ។

៣. បដិសេធន៍​ចំពោះ​​​ទម្លាប់​​ពន្យារពេល
វា​ជា​រឿង​មួយ​គួរឲ្យ​ចាប់អារម្មណ៍​ដែរ​ ពីព្រោះ​ថា ការ​ពន្យារពេល​គឺ​ជា​​ប្រភេទ​ជំងឺ​មួយ​របស់​ទ្រឹស្ដី​អ្នក​ដែល​ចង់​បាន​ភាព​ល្អ​ឥតខ្ចោះ​និយម។ នៅពេល​អ្នក​មាន​ការ​ព្រួយបារម្ភ​ឥត​ឈប់ឈរ​ដើម្បី​ធ្វើ​អ្វី​មួយ​ចង់​ឲ្យ​បាន​ល្អ​ឥតខ្ចោះ អ្នក​នឹង​ជាប់ គាំង​នៅ​មួយ​កន្លែង ហើយ​ទីបំផុត​មិន​អាច​ចាប់ផ្តើម​ធ្វើ​អ្វី​​មួយ​បាន​ទាល់តែសោះ​។  ​​រឿង​នេះ​វា​កាន់តែ​អាក្រក់​​ទៅ​ប្រសិន​បើ​គ្រួសារ និង​មិត្តភក្ដិ​ជា​អ្នក​ធ្វើ​ឲ្យ​​​អ្នក​ចេះ​តែ​រក​លេស​​ពន្យារពេល​រហូត​។ 

៤. បដិសេធន៍​ចំពោះ​​​​ភាព​ភ័យខ្លាច​ទៅ​នឹង​ការ​បរាជ័យ
អ្នក​មិន​គួរ​ធ្វើ​ឲ្យ​ខ្លួនឯង​ភ័យខ្លាច​ទៅ​នឹង​ការ​បង្កើត​កំហុស​ណាមួយ​នោះ​ឡើយ។ អ្នក​គួរ​​មើល​បញ្ហា ឬ ភាព​បរាជ័យ​ទៅ​ជ្រុង​ម្ខាង​ទៀត​ដែល​វា​បាន​ផ្តល់​មេរៀន​ដ៏​មាន​តម្លៃ​សម្រាប់​ស្វាគមន៍​អម​ដំណើរ​ជីវិត​របស់​អ្នក។ ប៉ុន្តែ​មុន​ដំបូង​ អ្នក​ត្រូវ​មាន​ភាព​ក្លាហាន​​ឲ្យ​ខ្លាំង​បន្តិច ដើម្បី​​​យក​ឈ្នះ​ការ​ភ័យខ្លាច​ទៅ​នឹង​ការ​បរាជ័យ​នេះ។ បន្ទាប់​មក​រៀន​ពី​កំហុស​​ទាំង​នោះ ហើយ​ទីបំផុត​អ្នក​នឹង​ទទួល​បាន​លទ្ធផល​ល្អ​មួយ​ដែល​​ល្អ​ប្រសើរ​ជាង​មុន។

៥. បដិសេធន៍​ចំពោះ​​​​​គំនិត​អវិជ្ជមាន
តាមរយៈ​ការ​ស្រាវជ្រាវ​អស់​ជាច្រើន​ទសវត្សរ៍ អ្នក​ចិត្តវិទ្យា​​លោកស្រី Carol Dweck បាន​អះអាង​ថា ​ផ្នត់គំនិត​របស់​​មនុស្ស​ពោល​គឺ​របៀប​ដែល​មនុស្ស​ម្នាក់ៗ​មើល​មក​ខ្លួនឯង​ គឺ​មាន​ឥទ្ធិពល​យ៉ាង​ខ្លាំង​ទៅ​​លើ​ទង្វើ​របស់​ខ្លួន។ មិន​ចំពោះ​ថា គោលដៅ​របស់​អ្នក​​​ជា​អ្វី ឧបសគ្គ​របស់​អ្នក​ជា​អ្វី ហើយ​ផ្លូវ​ជោគជ័យ​របស់​អ្នក​ជា​អ្វី ឧបសគ្គ​​ដែល​ពិបាក​យកឈ្នះ​បំផុត​គឺ​ដោយសារតែ​ខ្លួនឯង។ អ្នក​ជា​អ្នក​បង្កើត​ផ្លូវ​បរាជ័យ​ឲ្យ​ខ្លួនឯង។ អ្វី​ៗ​ដែល​អ្នក​ទទួល​បាន​នៅ​ថ្ងៃ​នេះ ​គឺ​​ដោយសារតែ​ទង្វើ​ដែល​កើត​ចេញ​ពី​ការ​គិត​របស់​អ្នក​ពី​មុន​មក។ បើ​អ្នក​គិត​បែប​វិជ្ជមាន ទង្វើ​របស់​អ្នក​នឹង​បង្កើត​បាន​លទ្ធផល​វិជ្ជមាន៕

ប្រភព៖ Inc 

X
5s