ម៉ាឡេស៊ី​នឹង​ពង្រឹង​ការ​វិនិយោគ​បន្ថែម​លើ​វិស័យ​កសិកម្ម​កម្ពុជា​



ឯកឧត្តម Eldeen Hasaaini bin Mohd ឯកអគ្គរដ្ឋទូត​ម៉ាឡេស៊ី​ប្រចាំ​ព្រះរាជា​ណា​ចក្រ​កម្ពុជា ក្នុង​ជំនួប​ជា​មួយ​ឯកឧត្ដម  វេង សាខុន រដ្ឋមន្ត្រី​ក្រសួង​កសិកម្ម រុក្ខាប្រមាញ់ កាល​ពី​ពេល​ថ្មីៗ​កន្លង​ទៅ បាន​លើក​ឡើង​ពី​គោល​បំណង​ពង្រឹង​កិច្ច​សហប្រតិបត្តិ​ការ​រវាង​ប្រទេស​ទាំង​ពីរ​លើ​វិស័យ​កសិកម្ម ព្រម​ទាំង​បាន​បង្ហើប​ថា​ ក្នុង​អំឡុង​ខែ​កញ្ញា​ខាង​មុខ​នេះ​ ក្រុមហ៊ុន​វិនិយោគ​ម៉ាឡេស៊ី​មួយ​ចំនួន​នឹង​មក​ទស្សនកិច្ច​សិក្សា ស្វែង​យល់​បន្ថែម​អំពី​សក្ដានុពល​នៃ​វិស័យ​កសិកម្ម​កម្ពុជា។  

ក្នុង​ជំនួប​នេះ​ផង​ដែរ ឯកឧត្ដម​រដ្ឋមន្ត្រី​កម្ពុជា​បាន​បង្ហាញ​ពី​កិច្ច​សហប្រតិបត្តិការ​ល្អ​របស់​ប្រទេស​ទាំង​ពីរ ដោយ​គូស​បញ្ជាក់​ថា​កន្លង​មក​រដ្ឋាភិបាល​របស់​ម៉ាឡេស៊ី​តែង​គាំទ្រ​ដល់​ផលិតផល​កសិកម្ម​របស់​កម្ពុជា។ ក្នុង​នោះ​លោក​ក៏​បាន​បង្ហាញ​ដល់​ភាគី​ម៉ាឡេស៊ី​ ពី​ការ​នាំ​ចេញ​អង្ករ​របស់​កម្ពុជា​ទៅ​កាន់​ទីផ្សារ​ពិ​ភព​លោក​ប្រមាណ​ជិត​៤​លាន​តោន ហើយ​ឆ្នាំ​នេះ​កម្ពុជា​ក៏​បាន​នាំ​ចេញ​ផលិតផល​កសិកម្ម​សរុប​ជាង ២,៣៧ លាន​តោន។ ជា​មួយ​គ្នា​នេះ​លោក​រដ្ឋមន្ត្រី​ក៏​បាន​ស្នើ​ឲ្យ​រដ្ឋាភិបាល​ម៉ាឡេស៊ី​ពង្រឹង​បន្ថែម​នូវ​កិច្ច​សហប្រតិបត្តិការ​ក្នុង​វិស័យ​កសិកម្ម​និង​ឧស្សាហកម្ម។

ជា​ការ​ឆ្លើយ​តប​ចំពោះ​ការ​លើក​ឡើង​ខាង​លើ លោក​ឯកអគ្គរដ្ឋទូត​ម៉ាឡេស៊ី​បាន​កោតសរសើរ​ និង​គាំ​ទ្រ​ចំពោះ​ការ​លើក​ឡើង​របស់​ភាគី​កម្ពុជា លោក​ថា ភាគី​ម៉ាឡេស៊ី​រីករាយ​ចំពោះ​ការ​បង្កើន​បរិមាណ​នៃ​ពាណិជ្ជកម្ម​កសិកម្ម​រវាង​ប្រទេស​ទាំងពីរ ដោយ​ភាគី​ម៉ាឡេស៊ី​បាន​សម្រេច​បង្កើន​ការ​នាំ​ចូល​អង្ករ​ពី​កម្ពុជា ហើយ​កំពុង​មាន​ចំណាប់​អារម្មណ៍​ជា​ខ្លាំង​លើ​ផលិតផល​ដទៃ​ទៀត ដូច​ជា​ម្រេច តាង៉ែន និង​ប្រេងដូង៕

ដោយ៖ ជួប ស្រីរ័ត្ន

X
5s