Warren Buffett ថា នេះជាកំហុសមួយដែលឪពុកម្តាយធ្វើចំពោះកូនៗនៅពេលបង្រៀនពីលុយកាក់
នៅពេលគេនិយាយពីឪពុកម្តាយដែលបានស្វែងយល់ច្បាស់ពីសារសំខាន់នៃការបង្រៀនកូនៗពីរបៀបរៀនទទួលខុសត្រូវផ្នែកហិរញ្ញវត្ថុ មហាសេដ្ឋី Warren Buffett គឺជាបុគ្គលល្បីល្បាញម្នាក់ដែលស្ថិតនៅក្នុងចំណោមឪពុកម្តាយប្រភេទនេះ។
មុនពេលលោកក្លាយជានាយកប្រតិបត្តិក្រុមហ៊ុន Berkshire Hathaway កំពូលអ្នកវិនិយោគរូបនេះបានចាប់ផ្តើមចេញរកលុយដោយខ្លួនឯងដោយផ្តើមចេញពីការទិញលក់ភេសជ្ជៈកូកាកូឡា។ ទន្ទឹមនឹងនេះលោកក៏ដើរលក់ទស្សនាវដី្ត និងស្ករកៅស៊ូពីផ្ទះមួយទៅផ្ទះមួយផងដែរនូវអ្វីដែលលោកយល់ថា ជាបទពិសោធន៍ដំបូងគេមួយដ៏ល្អបំផុតសម្រាប់រូបលោកស្ដីពីចំណេះដឹងហិរញ្ញវត្ថុ។
នៅក្នុងបទសម្ភាសន៍មួយទៅកាន់សារព័ត៌មាន CNBC លោកបានលើកឡើងដូច្នេះថា៖« ឪពុកខ្ញុំគឺជាមនុស្សអស្ចារ្យម្នាក់ដែលបានជួយជំរុញខ្ញុំ។ អ្វីដែលខ្ញុំបានរៀនពីគាត់តាំងពីដឹងក្តីមក គឺមានទម្លាប់ល្អតាំងពីតូចមក។ ការសន្សំលុយគឺជាមេរៀនសំខាន់បំផុតមួយដែលគាត់បានបង្រៀនខ្ញុំ»។
នៅពេលត្រូវបានគេសួរថា តើអ្វីទៅជាកំហុសធំបំផុតរបស់ឪពុកម្តាយចំពោះកូនៗស្ដីពីមេរៀនលុយកាក់នេះ មហាសេដ្ឋី វ័យ ៨៨ ឆ្នាំរូបនេះបានឆ្លើយដូច្នេះថា៖« ពេលខ្លះឪពុកម្ដាយទុកបណ្តោយឲ្យកូនៗចាំដល់អាយុ ១០ឆ្នាំ ឬរហូតចាស់ជាងនេះ បានបង្រៀនពួកគេពីរបៀបគ្រប់គ្រងលុយកាក់។ តាមពិតទៅ ឪពុកម្តាយគួរបង្រៀនពួកគេតាំងពីពួកគេនៅរៀនសាលាមត្តេយ្យមកម្ល៉េះ»។
ពេលវេលាគឺជាកត្តាសំខាន់មួយ
ការលើកឡើងរបស់លោក Warren Buffett ដែលថា ឪពុកម្តាយគួរបង្រៀនកូនៗពីចំណេះដឹងគ្រប់គ្រងលុយតាំងពីពួកគេរៀនសាលាមត្តេយ្យគឺជារឿងត្រឹមត្រូវពីព្រោះការស្រាវជ្រាវនានាបានបង្ហាញថា ៨០% នៃខួរក្បាលរបស់មនុស្សយើងចាប់ផ្តើមលូតលាស់នៅពេលឈានដល់អាយុ ៣ឆ្នាំ។
ការស្រាវជ្រាវរបស់សាកលវិទ្យាល័យ Cambridge បានរកឃើញថា ក្មេងៗអាចចាប់បានមូលដ្ឋានគ្រឹះស្ដីពីលុយកាក់នៅពេលដែលពួកគេមានអាយុចន្លោះពី ៣ ទៅ ៤ឆ្នាំ។ បន្ទាប់មកនៅពេលឈានដល់អាយុ ៧ឆ្នាំ ឥរិយាបថហិរញ្ញវត្ថុនាពេលអនាគតរបស់ពួកគេនឹងមានការរីកចម្រើនទៅមុខជាធម្មតា។
«ឪពុកម្តាយភាគច្រើនបានដឹងហើយថា ការបង្រៀនកូនៗពីចំណេះដឹងលុយកាក់ និងរបៀបគ្រប់គ្រងវាសំខាន់ប៉ុណ្ណា។ ប៉ុន្តែអ្វីដែលជាបញ្ហានៅត្រង់ថា វាមានភាពខុសគ្នារវាងត្រឹមតែដឹង និងការអនុវត្ត»។ លោក Warren Buffett បន្ត។
ក្រុមហ៊ុន T. Rowe Price ក៏បានធ្វើការស្រាវជ្រាវផងដែរដើម្បីស្ទាបស្ទង់មតិលើឪពុកម្ដាយ និងអាណាព្យាបាលប្រមាណ ១ ០១៤ នាក់ដែលមានកូនៗអាយុចន្លោះពី ៨ ទៅ ១៤ ឆ្នាំ និងមនុស្សវ័យជំទង់ចំនួន ១ ០០០ នាក់ដែលមានអាយុចន្លោះពី ១៨ ទៅ ២៤ ឆ្នាំ។
លទ្ធផលបានបង្ហាញថា មានឪពុកម្ដាយត្រឹមតែ ៤% ប៉ុណ្ណោះ ដែលសារភាពថា បានលើកយកប្រធានបទលុយកាក់និយាយជាមួយកូនៗរបស់ខ្លួនដែលមានអាយុក្រោម ៥ឆ្នាំ ខណៈដែល ៣០% ចាប់ផ្តើមបង្រៀនកូនៗនៅអាយុ ១៥ ឆ្នាំ ឬច្រើនជាងនេះ។ ដោយឡែក ១៤% ទៀតបានអះអាងថា មិនដែលបានបង្រៀនកូនៗរបស់ខ្លួនទាល់តែសោះទាក់ទងទៅនឹងលុយកាក់នេះ។
ចំណេះដឹងហិរញ្ញវត្ថុពីមហាសេដ្ឋី Warren Buffett ដែលអ្នកគួរបង្រៀនកូនៗ
១.បង្រៀនកូនៗរបស់អ្នកមានគំនិតបត់បែន
អ្នកត្រូវលើកទឹកចិត្តកូនៗរបស់អ្នក កុំឲ្យឆាប់ចុះចាញ់ ឬបោះបង់ដោយសារតែអ្វីមួយមិនដំណើរការ។ អ្នកត្រូវធ្វើឲ្យសមត្ថភាពនៃការគិតរបស់ពួកគេមានភាពច្នៃប្រឌិត។ ដើម្បីឲ្យពួកគេមានគំនិតច្នៃប្រឌិត អ្នកអាចបង្រៀនពួកគេចេះកែច្នៃរបស់របរចាស់ៗដែលបោះចោលទៅជាឧបករណ៍ផ្សេងៗ ឬលក់យកលុយមកវិញដែលនេះវាអាចបង្រៀនពួកគេពីរបៀបគិតឲ្យស៊ីជម្រៅ ចេះសន្សំសំចៃ និងការពារបរិស្ថានទៀតផង។
២. បង្រៀនកូនៗរបស់អ្នកឲ្យចេះសន្សំ
អ្នកអាចឲ្យប្រអប់ដាក់ប្រាក់ចំនួន ២ទៅឲ្យកូនៗរបស់អ្នក ដែលប្រអប់ទី១ សម្រាប់ដាក់ប្រាក់សន្សំ និងប្រអប់មួយទៀតសម្រាប់ដាក់ប្រាក់សម្រាប់ចំណាយ។ រាល់ពេលដែលពួកគេទទួលបានប្រាក់ដែលបានមកពីដូចជា អំណោយ ឬជួលឲ្យធ្វើអ្វីមួយជាថ្នូរនឹងបានប្រាក់ អ្នកអាចណែនាំពួកគេពីររបៀបប្រាក់ដែលត្រូវសន្សំទុក និងប្រាក់សម្រាប់ការចំណាយ។
ឧទាហរណ៍មួយទៀត អ្នកអាចផ្គុំរូបភាពរបស់របរផ្សេងៗដែលបានមកពីទស្សនាវដី្ត កាសែត ឬសៀវភៅ ឲ្យបានចាប់ពី ៥ រហូតដល់ ១០ ហើយសួរពួកគេពីរបស់ណាមួយដែលពួកគេចង់ទិញ។ បន្ទាប់មកនៅពេលពួកគេជ្រើសរើសរបស់ណាមួយដែលពួកគេចង់ទិញ អ្នកត្រូវប្រាប់ពួកគេពីរបស់ណាដែលចាំបាច់ត្រូវទិញ និងរបស់ណាដែលមិនចាំបាច់ត្រូវទិញ។
៣.បង្រៀនកូនៗរបស់អ្នកឲ្យយល់ពីភាព ខុសគ្នារវាងតម្លៃ (Price) និងគុណតម្លៃ (Value)
ក្នុងនាមជាឪពុកម្ដាយ អ្នកប្រហែលជាបានបង្កើតកំហុសជាច្រើនដោយពេលខ្លះអាចទិញរបស់ថ្លៃនៅហាងប្រេនដ៏ៗ ខណៈដែលរបស់ដូចគ្នា និងមានគុណភាពដូចគ្នានេះ អ្នកអាចរកបាននៅកន្លែងផ្សេងដែលមានតម្លៃធូរថ្លៃជាងនេះ។ ឥឡូវដល់ពេលដែលអ្នកត្រូវប្រាប់កូនៗរបស់អ្នកមិនឲ្យយកតាមគំរូមួយនេះ។
អ្នកអាចឆែកមើលតម្លៃរបស់មុខទំនិញមួយដែលមានលក់នៅហាងផ្សេងៗគ្នាមកឲ្យកូនៗរបស់អ្នកធ្វើការប្រៀបធៀបគ្នា។ បន្ទាប់មកអ្នកត្រូវសួរពួកគេថា តើហាងណាមួយដែលពួកគេគួរទិញទំនិញនោះ? ហេតុអ្វី?
៤.បង្រៀនកូនៗរបស់អ្នកឲ្យចេះធ្វើការសម្រេចចិត្តឲ្យបានត្រឹមត្រូវ
កត្តាសំខាន់បំផុតមួយក្នុងការសម្រេចចិត្តប្រកបដោយភាពឆ្លាតវៃនោះ គឺរបៀបដែលការសម្រេចចិត្តនីមួយៗ អាចជះឥទ្ធិពលដល់លទ្ធផលនាពេលអនាគត។ អ្នកត្រូវធ្វើឲ្យកូនៗរបស់អ្នកមានទម្លាប់ក្នុងការសម្រេចចិត្តដ៏ល្អមួយពីវិធីសន្សំប្រាក់។ ពួកគេប្រហែលជាចង់បានស្បែកជើងថ្មី ប៉ុន្តែវាល្អទេប្រសិនបើពួកគេបោកសម្អាតស្បែកជើងចាស់របស់ពួកគេឲ្យថ្មីឡើងវិញ ហើយទុកលុយទិញសៀវភៅរូបភាពថ្មីៗដ៏គួរឲ្យទាក់ទាញ?
ប្រភព៖ CNBC
