សេដ្ឋី ៤នាក់ លាតត្រដាងថា តើធ្វើការថ្ងៃចុងសប្តាហ៍ធ្វើឲ្យអ្នកកាន់តែជោគជ័យដែរឬអត់?
ជាទូទៅ សម្រាប់ជីវិតអ្នកធ្វើការឲ្យគេ តែងមានពេលសម្រាក ២ ឬ ១ថ្ងៃនៅថ្ងៃចុងសប្តាហ៍។ ក៏ប៉ុន្តែមានសំនួរមួយគឺថា តើធ្វើការថ្ងៃចុងសប្តាហ៍ធ្វើឲ្យអ្នកកាន់តែជោគជ័យដែរឬអត់? ទាក់ទងទៅនឹងប្រធានបទនេះ មានសេដ្ឋី ៤ រូបចូលមកពន្យល់ ក៏ដូចជាផ្តល់ដំបូន្មានដល់អ្នកដើម្បីស្វែងយល់បន្ថែមលើទស្សនៈខាងលើនេះ។
១. “របៀបដែលអ្នកចំណាយពេលនឹងប្រាប់ពីអ្វីៗដែលអ្នកបានផ្តល់តម្លៃឲ្យ”
“ក្នុងនាមជាអ្នកដឹកនាំម្នាក់ អ្នកត្រូវយល់ឲ្យច្បាស់ពីការងារអាទិភាព និងសមត្ថភាពដើម្បីនិយាយបដិសេធន៍ទៅកាន់អ្វីៗផ្សេងទៀត។ ការងារអាទិភាពរបស់ខ្ញុំ គឺគ្រួសារ និងការងារ។ សម្រាប់ការងារ នៅពេលណាក៏ដោយ ខ្ញុំមានបញ្ជីការងារចំនួន ៣ ដែលត្រូវធ្វើដែលជួយផ្តល់គុណតម្លៃដល់អតិថិជន ក្រុមការងារ និងដៃគូរកស៊ីរបស់យើង។ ខ្ញុំមានកូន ៣ នាក់។ ដោយសារខ្ញុំរវល់ធ្វើការ និងឧស្សាហ៍ចេញក្រៅចាប់ពីច័ន្ទដល់សុក្រ ដូច្នេះខ្ញុំយកពេលថ្ងៃចុងសប្តាហ៍នៅជាមួយក្រុមគ្រួសាររបស់ខ្ញុំ និងទទួលទានអាហារជុំគ្នានៅល្ងាចថ្ងៃសុក្រ។ ខ្ញុំជឿថា ជម្រើសរបស់យើងនាំឲ្យយើងធ្វើសកម្មភាព សកម្មភាពរបស់យើងនាំឲ្យយើងបង្កើតបានជាទម្លាប់ ហើយទម្លាប់បង្ហាញពីអត្តចរិតរបស់យើង។ ខ្ញុំជឿថា របៀបដែលអ្នកចំណាយពេលលើធ្វើអ្វីមួយ គឺបានបង្ហាញថា សកម្មភាពនោះវាសំខាន់សម្រាប់អ្នក”។
លោកស្រី Marla Beck ជាស្ថាបនិករួម និងនាយកប្រតិបត្តិក្រុមហ៊ុន CEO of Bluemercury។
២. “តុល្យភាពជីវិត និងការងារ គ្រាន់តែជារឿងព្រេងតែប៉ុណ្ណោះ”
“តុល្យភាពរវាងជីវិត និងការងារគឺគ្រាន់តែជារឿងព្រេងប៉ុណ្ណោះ។ ខ្ញុំមិនបើក និងបិទច្រកផ្លូវក្នុងជីវិតការងារឡើយ។ វាកើតឡើងក្នុងពេលដំណាលគ្នា។ ខ្ញុំមិនដាក់កំហិតខ្លួនឯងឲ្យត្រូវតែធ្វើការតិចឬច្រើនឡើយ។ ខ្ញុំចំណាយពេលធ្វើការនៅពេលណាដែលចាំបាច់ ហើយមិនចំណាយពេលលើវានៅពេលណាដែលមិនចាំបាច់។ ខ្ញុំជួបប្រពន្ធខ្ញុំគ្រប់ពេលព្រោះគាត់ជាផ្នែកមួយយ៉ាងសំខាន់នៃក្រុមហ៊ុនរបស់ខ្ញុំ។ ខ្ញុំដើរកម្សាន្ត ប៉ុន្តែមិនមែនមានន័យថា ខ្ញុំបោះបង់ការងារទាំងស្រុងទេ។ ជីវិត និងការងារខ្ញុំត្រូវតែពេញចិត្តវា ហើយត្រូវតែធ្វើឲ្យវាមានប្រសិទ្ធភាពបំផុត មិនមែនចេះតែរវល់លើរឿងដែលឥតបានការទេ។ ខ្ញុំបែងចែកពេលបានច្បាស់លាស់ណាស់ ដូចជា មិនលើកទូរស័ព្ទពេលកំពុងបើកបរ ប៉ុន្តែខ្ញុំក៏អាចឆ្លើយតបបានដែរបើអ្នកណាម្នាក់ដូចជាក្រុមការងាររបស់ខ្ញុំមានការចាំបាច់ជាមួយខ្ញុំនៅពេលខ្ញុំកំពុងសម្រាកលំហែកាយ”។
លោកPatch Baker ស្ថាបនិក និងជានាយកប្រតិបត្តិក្រុមហ៊ុន CEO of Mobius Media Solutions ។
៣. “ជោគជ័យទាមទារការកសាងទំនាក់ទំនងនៅជុំវិញទ្រនិចនាឡិការបស់អ្នក”
“នៅពេលអ្នកគ្រប់គ្រងជំនួញ អ្នកត្រូវកំណត់តម្រូវការរបស់អតិថិជនថា ជារឿងចាំបាច់។ វាអត់មានពេលត្រូវនិយាយថា ថ្ងៃនេះជាថ្ងៃសម្រាក អត់ធ្វើការទេ! ជាពិសេសអ្នករកស៊ីខាងអចលនទ្រព្យតែម្តង។ អ្នកចង់ទិញផ្ទះ គេមានពេលសម្រាកតែថ្ងៃចុងសប្តាហ៍។ អញ្ចឹង មិនធ្វើការថ្ងៃសៅ-អាទិត្យ មិនមែនជាជម្រើសល្អទេ។ ចង់ជោគជ័យក្នុងវិស័យអចលនទ្រព្យ ត្រូវធ្វើការ ២៤ ម៉ោងក្នុងមួយថ្ងៃ ៧ថ្ងៃក្នុងមួយសប្តាហ៍ និង ៣៦៥ ថ្ងៃក្នុងមួយឆ្នាំ។ ក្នុងជំនួញអីក៏ដោយ ដើម្បីជោគជ័យបាន ទាល់តែអ្នកអាចធ្វើឲ្យគេពឹងពាក់បាន ទំនាក់ទំនងបាន និងអាចឆ្លើយតបតម្រូវការអតិថិជនបាន។ មុនពេលខ្ញុំបញ្ចប់ការងារក្នុងថ្ងៃនីមួយៗ ខ្ញុំបានបែកចែកពេលមួយឆ្លើយតបសារដែលបានផ្ញើទៅអ៊ីមែល និងបណ្ដាញសង្គមរបស់ខ្ញុំ ។ ខ្ញុំប្រកាន់គោលការណ៍ថា រាល់ពាក្យពេចន៍ដែលខ្ញុំនិយាយទៅកាន់ពួកគេ គឺត្រូវផ្ដោតលើការកសាងទំនាក់ទំនងល្អទៅវិញទៅមកជាធំ។ ”
លោកស្រី Dottie Herman នាយកប្រតិបត្តិក្រុមហ៊ុន អចលនទ្រព្យ Douglas Elliman
៤. “យើងមិនគួរបែងចែករវាងថ្ងៃធ្វើការ និងថ្ងៃចុងសប្តាហ៍ទេ”
“ការបែងចែករវាងថ្ងៃធ្វើការ និងថ្ងៃសម្រាកចុងសប្តាហ៍ គឺជាផ្នែកមួយធ្វើឲ្យមានបញ្ហានៅក្នុងប្រធានបទនេះ។ ខណៈដែលយើងអាចកំណត់បានច្បាស់ថា តើពេលណាត្រូវធ្វើការ និងពេលណាវាមិនចាំបាច់ធ្វើ ការយល់ឃើញបែបនេះវាបានក្លាយជារឿងធម្មតាទៅវិញ។ តាមពិតទៅ តុល្យភាពរវាងជីវិត និងការងារ វាមិនមែនជាការបែងចែកច័ន្ទ-សុក្រ និងសៅ-អាទិត្យអីនោះទេ! វាគឺជាការស្វែងរកតុល្យភាពទៅលើរបៀបធ្វើការរបស់អ្នក។ សម្រាប់ខ្ញុំ មានន័យថា ថ្ងៃចុងសប្តាហ៍អត់កំណត់ទេ។ ប៉ុន្តែដើម្បីឆ្លើយតបទៅនឹងការយល់ឃើញនេះ ខ្ញុំដឹងថា ខ្ញុំមិនចាំបាច់ធ្វើការ ដល់ទៅ ៤០ ម៉ោងក្នុងមួយសប្តាហ៍ដែរ។ ជីវិតរបស់ខ្ញុំបានផ្ស៊ាំទៅនឹងទម្លាប់មួយគឺធ្វើការនៅពេលចាំបាច់ និងទុកវាចោលពេលដែលមិនចាំបាច់”។
លោក Dennis Najjar ស្ថាបនិករួមរបស់ក្រុមហ៊ុន AccountingDepartment៕
ប្រភព៖ cnbc
