ក្រុមហ៊ុនធំៗបរទេសកំពុងសម្លឹងឃើញការវិនិយោគសំខាន់៣នៅខេត្តព្រះសីហនុ
ក្នុងឱកាសនៃការជួបសម្ដែងការគួរសមជាមួយឯកឧត្ដម គួច ចំរើន អភិបាលខេត្តព្រះសីហនុ លោក DATO MAH KASENG ប្រធានក្រុមហ៊ុន RIC NATURAL DEVELOPMEBT PLC និងក្រុមហ៊ុនវិនិយោគ បរទេសសិង្ហបុរី និងម៉ាឡេស៊ី បានបង្ហាញពីបំណងក្នុងការវិនិយោគកែច្នៃសំរាម ផលិតជាថាមពលអគ្គិសនី គម្រោងជីវឥន្ធនៈ និងគម្រោងអភិវឌ្ឍន៍កំពង់ផែទូកទេសចរណ៍ទំនើបនៅខេត្តព្រះសីហនុ។
លោក DATO MAH KASENG បានបញ្ជាក់ថា ក្រុមហ៊ុនរបស់លោក មានគម្រោងវិនិយោគលើការកែច្នៃសំរាម ផលិតថាមពលអគ្គិសនី ព្រោះដោយការមើលឃើញពីការវិនិយោគក្នុងខេត្តព្រះសីហនុ មានសន្ទុះកើនឡើង សំរាមក៏វាមានការកើនឡើងផងដែរ។ ទន្ទឹមនឹងការកែច្នៃសំរាម ក៏មានគម្រោងវិនិយោគជីវឥន្ធនៈនៅខេត្តព្រះសីហនុ ដោយក្រុមហ៊ុន ម៉ាឡេស៊ី និងគម្រោងអភិវឌ្ឍន៍កំពង់ផែទូកទេសចរណ៍ទំនើប ដោយក្រុមហ៊ុនរបស់ប្រទេសសិង្ហបុរី។
ជាការឆ្លើយតប ឯកឧត្ដម គួច ចំរើន ស្វាគមន៍ចំពោះគម្រោងវិនិយោគនៅខេត្តព្រះសីហនុ ព្រោះសំរាមនាពេលបច្ចុប្បន្ន ក្នុងមួយថ្ងៃមានជាង ១.០០០ តោន ហើយវានឹងអាចកើនឡើងបន្ថែមទៀត ក៏ប៉ុន្តែក្រុមហ៊ុនត្រូវសិក្សាគម្រោងឱ្យបានស៊ីជម្រៅអំពីទីផ្សារ ដើម្បីឈានទៅសម្រេចគោលដៅក្នុងការវិនិយោគកែច្នៃសំរាម ជាថាមពលអគ្គិសនីឱ្យមានប្រសិទ្ធភាព ហើយមន្ត្រីរបស់យើងនឹងធ្វើការពិភាក្សាតាមជំនាញនីមួយៗ ដើម្បីឈានទៅអនុវត្តគម្រោងទាំង ០៣ខាងលើ៕
ដោយ៖ ជួប ស្រីរ័ត្ន
