Warren Buffett ថា៖ អភិវឌ្ឍ​ជំនាញ​នេះ អ្នក​នឹង​​មាន​អំណាច​រកលុយ​កាន់តែ​ខ្លាំង​ឡើង​



ប្រសិន​បើ​អ្នក​ចង់​ដើរ​​ទៅមុខ​ឲ្យ​បាន​ឆ្ងាយ​ជាង​បច្ចុប្បន្នភាព​របស់​អ្នក អ្នក​ត្រូវ​ផ្ដោត​លើ​​ជំនាញ​ទំនាក់ទំនង​របស់​អ្នក។ នេះ​ជា​​ដំបូន្មាន​​របស់​មហាសេដ្ឋី​អាមេរិក លោក  Warren Buffett។

​ថ្លែង​នៅ​ក្នុង​បទសម្ភាសន៍​មួយ​​​នៅ​ពេល​កន្លង​ទៅ មហាសេដ្ឋី​វ័យ ៨៩​ឆ្នាំ​រូប​នេះ​បាន​លើកឡើង​ដូច្នេះ​ថា៖« ការ​កែលំអ​បន្តិចបន្តួច​នៅ​ថ្ងៃ​នេះ​​អាច​ធ្វើ​ឲ្យ​​អំណាច​នៃ​ការ​​រក​ប្រាក់​ចំណូល​​របស់​អ្នក​ក៏​ដូចជា​​ធ្វើ​អ្វី​ៗ​ផ្សេង​ជា​ច្រើន​ទៀត​នៅ​ក្នុង​ជីវិត​របស់​​​នឹង​ មាន​​​ការ​ប្រែប្រួល​ខុស​ប្លែក​គ្នា​​យ៉ាង​ខ្លាំង​​​​»។ 

លោក​បន្ត​ថា ការ​អភិវឌ្ឍ​ជំនាញ​ទំនាក់ទំនង​នឹង​ធ្វើ​ឲ្យ​ទ្រព្យសម្បត្តិ​របស់​អ្នក​អាច​កើន​ឡើង​ដល់​ទៅ ៥០% នេះ​បើ​​ផ្អែក​លើ​សម្ដី​របស់​លោក​ដែល​បាន​ចែករំលែក​នៅ​ក្នុង​បណ្ដាញ​ទំនាក់ទំនង​សង្គម  LinkedIn កាល​ពី​ឆ្នាំទៅមិញ។ 

«នេះ​ក៏​ដោយសារតែ​ការ​ធ្វើ​ឲ្យ​អ្នកដទៃ​ដើរតាម​គំនិត​របស់​អ្នក​គឺ​ជា​រឿង​ចាំបាច់​។ ឧទាហរណ៍​ថា បើ​អ្នក​ធ្វើ​ជា​អ្នក​លក់ អ្នក​​​​ប្រាកដ​ជា​ចង់​ឲ្យ​អតិថិជន​ជឿ​តាម​អ្នក។ បើ​អ្នក​ជា​អ្នក​គ្រប់គ្រង​គេ អ្នក​​ប្រាកដ​ជា​ចង់​ឲ្យ​អ្នក​ទាំង​នោះ​ដើរតាម​គំនិត​របស់​​អ្នក​​»។ ប្រធាន​ក្រុមហ៊ុន  Berkshire Hathaway រូប​នេះ​បាន​បញ្ជាក់​បន្ថែម។

​" នេះ​ក៏​ដោយសារតែ​ការ​ធ្វើ​ឲ្យ​អ្នកដទៃ​ដើរតាម​គំនិត​របស់​អ្នក​គឺ​ជា​រឿង​ចាំបាច់"

នៅ​មុន​លោក​ឈាន​ដល់​អាយុ ២០ ឆ្នាំ  លោក Warren Buffett មិនមែន​ជា​មនុស្ស​ដែល​ពូកែ​ទំនាក់ទំនង​នោះ​ឡើយ។ លោក​ធ្លាប់​បាន​សារភាព​ថា សូម្បីតែ​ឡើង​និយាយ​ជា​សាធារណៈ​ក៏​លោក​មិន​ចេះ​ផង រហូត​ដល់​លោក​ប្ដេជ្ញាចិត្ត​​ចំណាយ​លុយ​ ១០០ ដុល្លារ​រៀន​វគ្គ​និយាយ​ជា​សាធារណៈ​នេះ​នៅ​សាលា  Columbia Business School។ 

លោក​បាន​​ចែករំលែក​បទពិសោធន៍​របស់​លោក​ដូច្នេះ​ថា៖«នៅ​ពេល​ខ្ញុំ​រៀន​ចប់​វគ្គ​នេះ ​ខ្ញុំ​ក៏​បាន​ទៅ​សាកលវិទ្យាល័យ Homaha។ នៅ​ទី​នោះ​ខ្ញុំ​ចាប់​ផ្តើម​បង្រៀន​និស្សិត​ក្មេងៗ។ ខ្ញុំ​ដឹង​ថា​បើ​ខ្ញុំ​អត់​ចេះ​និយាយ​នៅ​មុខ​ហ្វូង​មនុស្ស​​បាន​ទេ ខ្ញុំ​​នឹង​ត្រឡប់​ទៅ​រក​កន្លែង​ដើម​​របស់​ខ្ញុំ​មិនខាន។ ខ្ញុំ​បាន​ព្យាយាម​រហូត​មក រហូត​មក​ដល់​ឥឡូវ អ្នក​មិន​អាច​បញ្ឈប់​ខ្ញុំ​មិន​ឲ្យ​និយាយ​បាន​ទេ»

​មហាសេដ្ឋី​មាន​ប្រាក់​ជិត ៨០ ពាន់​លាន​ដុល្លារ​រូប​នេះ​​បាន​ចាត់ទុក​ថា វគ្គសិក្សា ១០០ ដុល្លារ​នេះ គឺ​ជា​ការ​វិនិយោគ​ល្អ​បំផុត​ដែល​លោក​មិន​​ធ្លាប់​បាន​ជួប​នៅ​ក្នុង​​មួយ​ជីវិត​របស់​លោក ពីព្រោះ​វា​បាន​​ជួយ​លោក​ប្រែក្លាយ​ទៅ​ជា​បុគ្គល​ម្នាក់​ពូកែ​ដែល​ទំនាក់ទំនង​រហូត​មក​ដល់​សព្វថ្ងៃ​នេះ៕

ប្រភព៖ CNBC 

X
5s