ស្ថាបនិក Alarm Clock ប្រាប់តិកនិកអួតឲ្យអតិថិជនជឿនិងទិញផលិតផលយើង
តើធ្វើយ៉ាងណាទើបអាចឲ្យអតិថិជនទិញផលិតផលរបស់យើង? ប្រាកដណាស់ បើយើងមិននិយាយអួតសរសើរពីផលិតផលរបស់យើងប្រាប់គេទេ ធ្វើមិចគេនឹងស្គាល់ហើយព្រមទិញផលិតផលយើង! ប៉ុន្តែការអួត មិនមែនគ្រាន់តែយើងនិយាយទៅ គេគ្រប់គ្នានឹងជឿនោះទេ ពោលគឺត្រូវមានវិធីសាស្ត្រ រួមនឹងតិកនិកជាច្រើនទៀតដែលនឹងជំរុញចិត្តឲ្យអតិថិជនងាកមកទិញផលិតផលយើង។ ខាងក្រោមនេះ ជាការចែករំលែករបស់លោក វី ច័ន្ទ្ររង្សី ស្ថាបនិក Alarm Clock នូវតិកនិកក្នុងការអួតពីផលិតផល៖
នៅក្នុងសិក្ខាសាលានៃកម្មវិធី “Believe” កាលពីថ្ងៃទី០៨ ខែកញ្ញា ឆ្នាំ២០១៩កន្លងទៅ លោក វី ច័ន្ទ្ររង្សី បានចែករំលែកថា ដើម្បីអួតពីផលិតផល យើងត្រូវសិក្សាឲ្យបានច្បាស់ពីប្រភេទអតិថិជន៖ យើងត្រូវដឹងពីរបៀបនៃការនិយាយជាមួយអតិថិជន ព្រោះមនុស្សម្នាក់ៗមានចរិតលក្ខណៈខុសៗគ្នា ដូច្នេះរាល់ផលិតផលដែលយើងយកមកលក់ ត្រូវដឹងថាប្រភេទណាស័ក្តិសមជាមួយអតិថិជនបែបណា។ មួយវិញទៀតយើងត្រូវចាំ កាលណាដែលយើងអាចក្ដាប់ទិន្នន័យបានច្រើនពីអតិថិជនយើងនឹងមានឱកាសច្រើនក្នុងការលក់។
ចំណុចសំខាន់មួយទៀត គឺត្រូវព្យាយាមរកវិធីទាក់ទងនឹងស្គាល់អតិថិជន៖ យើងអាចឆាតទៅនិយាយលេងជាមួយអតិថិជន។ ចេះនិយាយសរសើរគាត់បន្តិច ដើម្បីធ្វើឲ្យគាត់សប្បាយចិត្តជាមួយយើង នៅពេលនោះគាត់នឹងរីករាយចែករំលែកព្រមទាំងរាប់អានជាមួយយើង ប៉ុន្តែភ្លាមៗសូមកុំប្រញាប់លក់ឲ្យពួកគាត់ យើងអាចចំណាយពេលបន្តិចឲ្យពួកគាត់ស្គាល់យើង ហើយនៅពេលដែលពួកគាត់ស្គាល់យើងហើយ ពេលនោះយើងប្រាកដជាអាចលក់បានហើយ។
ស្ថាបនិកវ័យក្មេងរូបនេះចែករំលែកបន្ថែមថា កុំអួតហួសពីអ្វីដែលជាការពិត៖ មានផលិតផលមួយចំនួននៅលើទីផ្សារគឺជាផលិតផលបោកបញ្ឆោត ដូច្នេះប្រសិនបើយើងចង់ឲ្យការលក់មានប្រសិទ្ធភាពត្រូវលក់តែផលិតផលណាដែលពិត ហើយការអួតនោះផងដែរក៏មិនត្រូវនិយាយឲ្យហួសពីការពិតដែរ។ យើងអាចអួតហួសពីអ្វីដែលមាននៅពេលនេះបាន ប៉ុន្តែត្រូវប្រាកដថាអ្វីដែលយើងអួត វានឹងមានពិតមែននាពេលខាងមុខ៕
ដោយ៖ ជួប ស្រីរ័ត្ន
