ទីក្រុង ៩ នេះនឹងស្ថិតនៅក្រោមទឹកសមុទ្រក្នុងឆ្នាំ ២១០០ ខាងមុខ
ការបម្រែបម្រួលអាកាសធាតុ គឺជាប្រធានបទដ៏ក្តៅគគុកមួយរបស់ពិភពលោកនៅពេលបច្ចុប្បន្ននេះត្បិតអីវាបង្កឲ្យមានគ្រោះមហន្តរាយយ៉ាងធ្ងន់ធ្ងរដល់មនុស្សជាតិនៅពេលអនាគត។ នៅក្នុងចំណោមគ្រោះមហន្តរាយធំៗដូចជា ព្យុះ គ្រោះរាំងស្ងួត និងរញ្ជួយដីជាដើម ការកើនឡើងនៃកម្ពស់ទឹកសមុទ្រគឺជាហានិភ័យដ៏ធំបំផុតមួយដែលនឹងគំរាមកំហែងបង្កឲ្យមានទឹកជំនន់ជន់លិចដល់ទីក្រុងនានាដែលនៅជិតតំបន់មាត់សមុទ្រ។
តួយ៉ាងដូចទីក្រុងចំនួន ៩ ខាងក្រោមនេះស្រាប់ ត្រូវបានគេព្យាករណ៍ថា នឹងត្រូវជន់លិចដោយទឹកសមុទ្រចាប់ពីពាក់កណ្តាលសតវត្សរ៍នេះតទៅ។
១) ទីក្រុងហ្សាការតាប្រទេសឥណ្ឌូណេស៊ី
ទីក្រុងហ្សាការតាកំពុងស្រុតចុះជិត ២ តឹក ឬ ១៧ សង់ទីម៉ែត្រក្នុងមួយឆ្នាំៗដោយសារតែសកម្មភាពបូមទឹកពីក្រោមដីច្រើនពេក។ នៅក្នុងឆ្នាំ ២០៥០ ខាងមុខ អ្នកជំនាញបានអះអាងថា ផ្នែកភាគច្រើននៃទីក្រុងនេះនឹងត្រូវលិចដោយទឹកជំនន់ ដែលនេះជាមូលហេតុមួយផងដែរដែលធ្វើឲ្យរដ្ឋាភិបាលរបស់ខ្លួនមានគម្រោងផ្លាស់ប្ដូរទីក្រុងកាលពីពេលថ្មីៗកន្លងទៅនេះទៅកាន់កោះជ្វា។
ប្រភពរូបភាព៖ TODAYonline
២) ទីក្រុង Lagos ប្រទេសនីហ្សេរីយ៉ា
ឆ្នេរសមុទ្រទាបៗរបស់ទីក្រុង Lagos កំពុងបន្តលិចដោយទឹកសមុទ្រ ហើយការកើនឡើងនៃកំដៅផែនដីកំពុងធ្វើឲ្យទីក្រុងធំបំផុតរបស់ទ្វីបអាហ្វ្រិកមួយនេះស្ថិតនៅក្នុងគ្រោះមហន្តរាយទឹកជំនន់បន្តិចម្តងៗ។ បណ្ឌិតសភាវិទ្យាសាស្ត្រអាមេរិក PNAS បានព្យាករណ៍ថា កម្រិតទឹកសមុទ្រនឹងកើនឡើងជាង ២ ម៉ែត្រនៅចុងសតវត្សរ៍នេះ។
ប្រភពរូបភាព៖ Al Jazeera
៣) ទីក្រុង Houston រដ្ឋTexas របស់អាមេរិក
នៅពេលបច្ចុប្បន្ននេះគេសង្កេតឃើញថា ផ្នែកខ្លះនៃទីក្រុងនេះកំពុងលិចដោយទឹកជំនន់ជាបណ្តើរក្នុងអត្រា ជាង ៥ សង់ទីម៉ែត្រក្នុងមួយឆ្នាំ២ ដោយសារតែសកម្មភាពបូមទឹកក្រោមដីយកមកប្រើប្រាស់។ នេះនឹងបង្កគ្រោះមហន្តរាយកាន់តែធ្ងន់ធ្ងរបន្ថែមទៀត ធ្វើឲ្យទីក្រុងខាងលើងាយរងគ្រោះនៅពេលអនាគត ខណៈព្យុះធំៗកន្លងមកបានបង្កទឹកជំនន់ និងបំផ្លិចបំផ្លាញលំនៅឋានប្រជាជនរាប់សែនខ្នង។
ប្រភពរូបភាព៖ Premium Parking
៤) ទីក្រុងដាការប្រទេសបង់ក្លាដេស
បើយោងតាមកាសែត New York Timesទីក្រុងដាការរួមចំណែកផលិតឧស្ម័នពុល ០,៣% នៃឧស្ម័នពុលសរុបនៅលើភពផែនដីដែលរួមចំណែកដល់ការបម្រែបម្រួលអាកាសធាតុ។ ប៉ុន្តែប្រទេសនេះក៏កំពុងប្រឈមមុខទៅនឹងផលវិបាកធំបំផុតមួយផងដែរ នោះគឺកើនឡើងកម្ពស់ទឹកសមុទ្រដែលទំហំ ១៧% នៃទីក្រុងនេះនឹងជន់លិច ឬធ្វើឲ្យប្រជាជន ១៨លាននាក់ត្រូវផ្លាស់ទីលំនៅក្នុងឆ្នាំ ២០៥០ខាងមុខ។
ប្រភពរូបភាព៖ UNO Our World
៥) ទីក្រុង Venice ប្រទេសអ៊ីតាលី
ទីក្រុង Venice បានស្រុតចុះ ០,២០ សង់ទីម៉ែត្រក្នុងមួយឆ្នាំៗ។ រដ្ឋាភិបាលប្រទេសនេះបានចាប់ផ្តើមសាងសង់ជញ្ជាំងការពារទឹកជំនន់តាំងពីឆ្នាំ ២០០៣ មកម្ល៉េះ ប៉ុន្តែដល់ឆ្នាំ ២០២២ ទើបរួចរាល់។ យ៉ាងណាមិញ ទីក្រុងនេះនឹងពិបាកគេចផុតពីទឹកសមុទ្រណាស់នៅក្នុងឆ្នាំ ២១០០ ខាងមុខ។
ប្រភពរូបភាព៖ Euroradialyouth2016
៦) ឆ្នេរ Virginia រដ្ឋ Virginia
ឆ្នេរ Virginia គឺជាឆ្នេរមួយដែលកំពុងស្ថិតនៅក្រោមគ្រោះមហន្តរាយការកើនឡើងនៃកម្ពស់ទឹកសមុទ្រ និងការស្រុតដីដ៏ឆាប់រហ័សជាងគេបំផុត។ មន្ទីរមហាសមុទ្រនិងបរិយាកាស ជាតិរបស់អាមេរិកបានព្យាករណ៍ថា ឆ្នេរមួយនេះអាចនឹងស្ថិតនៅក្រោមទឹកសមុទ្រកម្ពស់ជាង ៣,៦០ម៉ែត្រ នៅត្រឹមឆ្នាំ ២១០០ ខាងមុខ។
ប្រភពរូបភាព៖ Businessinsider
៧) ទីក្រុងបាងកកប្រទេសថៃ
យោងតាមកាសែត The Guardian បានឲ្យដឹងថា ទីក្រុងបាងកកកំពុងស្រុតចុះបន្តិចម្តងៗក្នុងអត្រាជាង ១ សង់ទីម៉ែត្រក្នុងមួយឆ្នាំៗ ហើយអាចនឹងស្ថិតនៅក្រោមទឹកសមុទ្រត្រឹមឆ្នាំ ២០៣០ ប៉ុណ្ណោះ។ រដ្ឋាភិបាលរបស់ខ្លួនបានសាងសង់ជញ្ជាំងការពារទឹកជំនន់មួយចំនួនរួចមកហើយនៅពេលកន្លងមក ក៏ប៉ុន្តែនៅតែមិនមានប្រសិទ្ធភាពអាចជួយស្រោចស្រង់ទីក្រុងនេះទាំងស្រុងបានទេ ជាពិសេសនៅរដូវវស្សា។
ប្រភពរូបភាព៖ Inspitripblog
៨) ទីក្រុង Rotterdam ប្រទេសហុល្លង់
បើយោងតាមកាសែត New York Times ៩០% នៃទីក្រុងនេះកំពុងស្ថិតនៅក្រោមទឹកសមុទ្រ។ ខណៈដែលកម្ពស់ទឹកសមុទ្រកំពុងកើនឡើង ទីក្រុងនេះក៏កំពុងប្រឈមមុខទៅនឹងគ្រោះមហន្តរាយទឹកជំនន់ផងដែរ។ រដ្ឋាភិបាលបានសាងសង់អាងទំនប់ទឹក និងរបងការពារទឹកជំនន់នៅតាមតំបន់នានាក្នុងទីក្រុងនេះដែរដើម្បីទប់ស្កាត់បញ្ហានេះ។
ប្រភពរូបភាព៖ en.ratterdam
៩) ទីក្រុង Alexandria ប្រទេសអេហ្ស៊ីប
ឆ្នេរទីក្រុង Alexandria កំពុងស្រុតទាបបន្តិចម្តងៗ ខណៈដែលកម្ពស់ទឹកសមុទ្រក៏កំពុងកើនឡើងដែរ។ យោងតាមការចេញផ្សាយរបស់វិទ្យុជាតិអាមេរិក (NPR) បានឲ្យដឹងថា កម្រិតទឹកសមុទ្រនៅឆ្នេរសមុទ្រមេឌីទែរ៉ាណេ នឹងកើនឡើង ០,៦០ ម៉ែត្រក្នុងឆ្នាំ ២១០០ ខាងមុខ៕
ប្រភពរូបភាព៖ Climate News Network
ប្រភព៖ Businessinsider
