សាក​ទាយ​ទៅ​មើល៍​ថា ការងារ​ណា​ដែល​មាន​តម្រូវការ​ខ្ពស់​ជាងគេ​បំផុត​ក្នុង​លោក?​ អ្នក​អាច​សាកល្បង​ឆ្លើយ ហើយ​​មក​ផ្ទៀងផ្ទាត់​​នៅ​ចម្លើយ​ខាងក្រោម​នេះ។ យោង​តាម​របាយការណ៍​សេដ្ឋកិច្ច​សាកលលោក (World Economic Forum) បាន​​បង្ហាញ​បញ្ជី​ឈ្មោះ ការងារ​ចំនួន ១០ ដែល​មាន​តម្រូវការ​ខ្ពស់​ជាងគេ​បំផុត​នៅ​លើ​ពិភពលោក​បច្ចុប្បន្ន​នេះ។ ​

១០.ប្រធាន​គ្រប់គ្រង​វិស្វកម្ម (Engineering Manager)
ប្រាក់ខែ​ជា​មធ្យម៖ ១១២ ៧៧៧ ដុល្លារ (នៅ​អាមេរិក) 
​តម្រូវការ៖ ប្រធាន​គ្រប់គ្រង​វិស្វកម្ម​មាន​តម្រូវការ​ខ្ពស់​នៅ​ក្នុង​​បណ្តា​ប្រទេស​​ចំនួន​៩ នៅ​ទូទាំង​ពិភពលោក​រួមមាន​ អូស្ត្រាលី ស្វីស​ និង​អង់គ្លេស​ជាដើម​។ ​

​​​៩.គណនេយ្យករ (Accountant) ​
ប្រាក់ខែ​ជា​មធ្យម៖ ៥០ ១៤៩ ដុល្លារ​ (នៅ​​អាមេរិក) 
តម្រូវការ៖ គណនេយ្យករ​មាន​តម្រូវការ​ខ្ពស់​នៅ​ក្នុង​ចំណោម​បណ្តា​ប្រទេស​ចំនួន​ ១១ ​នៅ​ទូទាំង​ពិភពលោក​រួមមាន​ហ្វាំងឡង់​  អៀរឡង់ និង​កូរ៉េខាងត្បូង។​ 

៨. អ្នកវិភាគ​ទិន្នន័យ​ព័ត៌មាន​វិទ្យា (IT Data Analyst) 
ប្រាក់ខែ​ជា​មធ្យម៖ ៥៨ ២៨៣ ដុល្លារ (នៅ​អាមេរិក) 
តម្រូវការ៖ អ្នក​វិភាគ​ទិន្នន័យ​ព័ត៌មានវិទ្យា​មាន​តម្រូវការ​ខ្ពស់​នៅ​ក្នុង​​បណ្តា​ប្រទេស​ចំនួន ១១ នៅ​ទូទាំង​ពិភពលោក​ដែល​រួមមាន  ប្រេស៊ីល ហុឡង់ដ៍​ និង​អាមេរិក។

៧.វិស្វករ​អគ្គីស​នី (Electrical Engineer)
ប្រាក់​ខែ​ជា​មធ្យម៖ ៧៣ ២២៥ ដុល្លារ (នៅ​អាមេរិក)
តម្រូវការ៖ វិស្វករ​អគ្គិសនី​មាន​តម្រូវការ​ខ្ពស់​នៅ​​ក្នុង​ចំណោម​បណ្តា​ប្រទេស​ចំនួន​ ១៦ ​នៅ​ទូទាំង​ពិភពលោក​ដែល​រួមមាន​ដូចជា​ កាណាដា អាល្លឺម៉ង់ និង​នូវែលហ្សេឡង់។

៦.វិស្វករ​សំណង់​ស៊ីវិល (Civil Engineer)
ប្រាក់ខែ​ជា​មធ្យម៖ ៦៤ ៣៧៣ ដុល្លារ (​នៅ​អាមេរិក) 
តម្រូវការ៖ វិស្វករ​សំណង់​ស៊ីវិល​មាន​តម្រូវការ​ខ្ពស់​នៅ​ក្នុង​​បណ្តា​ប្រទេស​ចំនួន ១៦ នៅ​ទូទាំង​ពិភពលោក​ដែល​រួមមាន​ដូចជា​ ប្រទេស​ឈីលី ម៉ិកស៊ិក និង​ទួរគី។

៥.វេជ្ជបណ្ឌិត (Doctor) 
ប្រាក់ខែ​ជា​មធ្យម៖ ១៤០ ២៣៤ ដុល្លារ (​នៅ​អាមេរិក) 
តម្រូវការ៖ វេជ្ជបណ្ឌិត​ និង​គ្រូពេទ្យ​ជំនាញ​មាន​តម្រូវការ​ខ្ពស់​នៅ​បណ្តា​ប្រទេស​ចំនួន ១៦ ​នៅ​ទូទាំង​ពិភពលោក​​ដែល​រួមមាន​ដូចជា កាណាដា អ៊ីស្រាអែល ​និង​ជប៉ុន។

៤.គិលានុបដ្ឋាយិកា (Nurse)
ប្រាក់ខែ​ជា​មធ្យម៖ ៦២ ៦៩៥ ដុល្លារ (នៅ​អាមេរិក)
តម្រូវការ៖ គិលានុបដ្ឋាយិកា​មាន​តម្រូវការ​ខ្ពស់​នៅ​ក្នុង​បណ្តា​ប្រទេស​ចំនួន ១៨ ​នៅ​ជុំវិញ​​ពិភពលោក​រួមមាន​ដូចជា  អូទ្រីស  នូវែលហ្សេឡង់​ និង​រុស្ស៊ី។

៣.វិស្វករ​មេកានិច(Mechanical Engineer) 
ប្រាក់ខែ​ជា​មធ្យម៖ ៦៨ ៨៨១ ដុល្លារ (​នៅ​អាមេរិក)
តម្រូវការ៖ វិស្វករ​មេកានិច​មាន​តម្រូវការ​ខ្ពស់​នៅ​ក្នុង​បណ្តា​ប្រទេស​ចំនួន​ ១៩ ​នៅ​ជុំវិញ​ពិភពលោក​ដែល​រួមមាន​ដូចជា​ ក្រិក  អេស្ប៉ាញ​ និង​អាមេរិក។

២.​វិស្វករ​អេឡិចត្រូនិក (Electronics Engineer)
ប្រាក់ខែ​ជា​មធ្យម៖ ៧៤ ៩៣៦ ដុល្លារ (​នៅ​អាមេរិក)
តម្រូវការ៖ វិស្វករ​អេឡិចត្រូនិក​មាន​តម្រូវការ​ខ្ពស់​នៅ​បណ្តា​ប្រទេស​ចំនួន​ ១៩ ​ជុំវិញ​ពិភពលោក​ដែល​រួមមាន​​ដូចជា​ ប្រេស៊ីល  បារាំង​និង​ស្លូវ៉ាគី។

១.អ្នក​អភិវឌ្ឍន៍​កម្មវិធី​ Software (Software Developer)
ប្រាក់ខែ​ជា​មធ្យម៖ ៦៩ ៥៨៣ ដុល្លារ (​នៅ​អាមេរិក)
តម្រូវការ៖ អ្នក​អភិវឌ្ឍន៍​កម្មវិធី​ Software កំពុង​មាន​តម្រូវការ​ខ្ពស់​​រហូត​ដល់​ទៅ  ២៤ ប្រទេស​​នៅ​ជុំវិញ​​ពិភពលោក​រួមមាន​ជប៉ុន អង់គ្លេស​និង​អាមេរិក។

នៅ​ក្នុង​យុគសម័យ​ឌីជីថល​ដូច​សព្វថ្ងៃ​នេះ​  វា​មិន​ពិបាក​ទេ​ក្នុង​ការ​មើល​ថា​ ហេតុអ្វី​បាន​ជា​តម្រូវការ​​ទីផ្សារ​ការងារ​មួយ​នេះ​បាន​កើនឡើង។​ រាប់​ចាប់​​តាំង​ពី​ការងារ​​អភិវឌ្ឍ (Develop) គេហទំព័រ​​រហូត​ដល់​ការ​​សរសេរ​កម្មវិធី​​ផ្សេងៗ​ទៀត ​គឺ​​បាន​ឆ្លុះបញ្ចាំង​ថា  អ្នក​អភិវឌ្ឍន៍​កម្មវិធី​ Softwareគឺ​ជា​ការងារ​មាន​តម្រូវការ​ខ្ពស់​ជាង​​ការងារ​ណាៗ​​ទាំងអស់ និង​មិន​អាច​ខ្វះ​បាន៕

ប្រភព៖ CNBC