អ្នកជំនាញ៖ ក្នុងរយៈពេល១០ឆ្នាំវិស័យខុនដូរកម្ពុជាកើនឡើងរហូតដល់៩២%
វិស័យខុនដូរនៅកម្ពុជាចាប់ផ្ដើមកកើតដំបូងនៅក្នុងកំឡុងឆ្នាំ២០០៨ ដែលគម្រោងដំបូងគឺជារបស់ជនជាតិកូរ៉េ និងបានសង់ដំបូងនៅក្នុងខណ្ឌទួលគោក។ នៅពេលនោះខុនដូរថ្នាក់កណ្ដាលមានតម្លៃប្រមាណ ១៣០០ដុល្លារក្នុងមួយម៉ែត្រការ៉េ ដោយឡែកបើយើងក្រឡែកមើលតម្លៃខុនដូរប្រភេទនេះនាពេលបច្ចុប្បន្ន គឺបានកើនរហូតដល់ ២៥០០ដុល្លារឯណោះក្នុងមួយម៉ែត្រការ៉េ។
ប្រភពរូប៖ Sabay
ដូច្នេះយើងឃើញថាក្នុងរយៈពេលប្រមាណជាង១០ឆ្នាំមកនេះ វិស័យខុនដូរបានកើនឡើងរហូតដល់៩២%ឯណោះ ដែលជាមធ្យមបានកើនឡើងចំនួន៩%នៅក្នុងវិស័យនេះ។ នេះបើតាមការលើកឡើងរបស់ លោកស្រី អាន សុធីតា នាយិកាជាន់ខ្ពស់នៃក្រុមហ៊ុន CBRE Cambodia នៅក្នុងកម្មវិធី «ទុនគំនិតនៃការស្វែងយល់ពីសេដ្ឋកិច្ចក្នុងវិស័យអចលនទ្រព្យ» កាលពីពេលថ្មីៗកន្លងទៅ។
លោកស្រីនាយិកាបានបន្តលើកឡើងថា នេះគឺជាជម្រើសមួយដែលល្អ ប្រសិនបើយើងវិនិយោគនៅក្នុងវិស័យនេះ ព្រោះកំណើន៩%ក្នុងមួយឆ្នាំជាតួលេខមួយដែលខ្ពស់និងល្អខ្លាំងសម្រាប់អ្នកចាប់អារម្មណ៍លើការវិនិយោគ។ ក្នុងឆ្នាំ២០១៨ខន់ដូរនៅកម្ពុជាមានចំនួន១៤,០០០ ដែលចំនួននេះនឹងបន្តកើនដល់ ២៧,០០០ខុនដូរឯណោះនៅក្នុងឆ្នាំ២០១៩។ លោកស្រីថា គ្មានអ្វីដែលគួរឲ្យភ្ញាក់ផ្អើលនោះទេចំពោះកំណើនខ្ពស់បែបនេះ ព្រោះថាអ្វីដែលថ្មីគឺតែងតែមានកំណើនខ្ពស់។
ដោយសារខុនដូរជាប្រភេទផ្ទះដែលមានតម្លៃសមរម្យ ព្រមទាំងមានទីតាំងស្ថិតនៅកណ្ដាលក្រុងដែលផ្ដល់ជាភាពងាយស្រួលដល់ប្រជាពលរដ្ឋដែលមានការងារ និងអាជីវកម្មនៅក្នុងទីក្រុងភ្នំពេញ លោកស្រីផ្ទាល់បានព្យាករណ៍ថាប្រមាណ១០ឆ្នាំទៀតនាពេលអនាគត ប្រជាជនភាគច្រើនដែលនៅភ្នំពេញនឹងមានខនដូរផ្ទាល់ខ្លួន៕
ដោយ៖ ជួប ស្រីរ័ត្ន
