អ្នកជំនាញព្យាករណ៍ថា ឆ្នាំ២០៣០ទីក្រុងភ្នំពេញនឹងមានតម្រូវការផ្ទះរហូតដល់៨០ម៉ឺនខ្នង
រាជធានីភ្នំពេញជា គឺជាមជ្ឈមណ្ឌលពាណិជ្ជកម្ម ឧស្សាហកម្ម ជំនួញ និងជាកន្លែងនៃបណ្ដុំការងារជាច្រើនសម្រាប់ប្រជាជន។ ជាមួយគ្នានេះ អ្នកជំនាញខាងវាយតម្លៃអចលនទ្រព្យ លោក ហឹម សីហា បានបង្ហាញពីការព្យាករណ៍ថា ក្នុងឆ្នាំ២០៣០ខាងមុខនេះចំនួនប្រជាជនដែលមកកាន់រាជធានីភ្នំពេញនឹងកើនរហូតដល់ជិត៣លាននាក់ ដូច្នេះតម្រូវការផ្ទះសម្រាប់ផ្គត់ផ្គង់នឹងអាចកើនដល់៨០ម៉ឺនខ្នង។
អ្នកជំនាញរូបនេះបានបន្តថា ដោយសារតែកំណើនបែបនេះធ្វើឲ្យផ្ទះបូរី ឬផ្ទះល្វែងជាដើមក្នុងរយៈពេលពីមួយឆ្នាំទៅមួយឆ្នាំកាន់តែមានគម្លាតឆ្ងាយទៅៗពីទីក្រុងភ្នំពេញ ហើយក្នុងការព្យាករណ៍របស់លោក លោកជឿថាក្នុងរយៈពេល៣០ឆ្នាំទៅមុខទៀត ចម្ងាយពីផ្ទះបុរីឬផ្ទះល្វែងទាំងនោះទៅកាន់តំបន់កណ្ដាលក្រុងភ្នំពេញ យ៉ាងហោចណាស់ក៏មានចម្ងាយពី២០ ទៅ៣០គីឡូម៉ែត្រដែរ។
ប្រជាជនសម្រេចចិត្តទិញផ្ទះនាតំបន់ឆ្ងាយដោយសារតែមានតម្លៃសមរម្យ។ ប៉ុន្តែ ដោយសារតែពួកគាត់មានការងារនឹងមុខរបរនៅតំបន់កណ្ដាលក្រុង ដូច្នេះលោកគិតថា របត់នៃតម្រូវការរបស់ពួកគាត់អាចនឹងផ្លាស់ប្ដូរមកលើទីផ្សារខន់ដូរវិញ។ ទន្ទឹមនឹងការលើកឡើងខាងលើរបស់លោក ហឹម សីហា អ្នកជំនាញផ្នែកអចលនទ្រព្យមួយរូបទៀតគឺ លោកស្រី អាន សុធីតា នាយិកាជាន់ខ្ពស់នៃក្រុមហ៊ុន CBRE Cambodia ក៏បានព្យាករណ៍ដែរថានារយៈពេលប្រមាណ១០ឆ្នាំខាងមុខនេះ ទីក្រុងភ្នំពេញនឹងមានតម្រូវការខន់ដូរខ្ពស់៕
ដោយ៖ ជួប ស្រីរ័ត្ន
