មិនបាច់ទៅដល់សាលាទេ! វេបសាយមួយនេះជួយប្អូនៗទី១២ប្រលងជាប់ដាក់ពាក្យចូលរៀនបានយ៉ាងងាយ
បន្ទាប់ពីប្រឡងជាប់សញ្ញាប័ត្រមធ្យមសិក្សាទុតិយភូមិដោយជោគជ័យ ប្អូនៗទី១២រួមនឹងអាណាព្យាបាលប្រាកដជាបារម្ភនិងពិបាកក្នុងការជ្រើសរើសជំនាញសិក្សា ក៏ដូចជា សាកលវិទ្យាល័យដែលសក្ដិសមក្នុងការបន្តការសិក្សាថ្នាក់ឧត្ដមសិក្សា។ ទាំងនេះនឹងលែងក្លាយជាបញ្ហាចោទទៀតហើយ ដោយគ្រាន់តែចូលទៅកាន់វេបសាយ www.salaenrollment.comនោះអ្នកនឹងអាចស្វែងរកព័ត៌មានជាច្រើនទាក់ទងនឹងជំនាញសិក្សា សាកលវិទ្យាល័យរួមនឹងវិទ្យាស្ថានជាច្រើន ពិសេសគឺអាចដាក់ពាក្យបានតែម្ដងដោយមិនចាំបាច់ទៅកាន់សាលាដោយផ្ទាល់នោះទេ។
នៅក្នុងកិច្ចសម្ភាសន៍ លោក សុខ លាភ ស្ថាបនិកវេបសាយ Sala enrollment ប្រាប់ថា លោកបង្កើតវេបសាយនេះព្រោះ ចង់ឲ្យប្អូនៗទី១២ដែលប្រឡងជាប់មានលទ្ធភាពអាចស្វែងរកព័ត៌មានសិក្សាបានកាន់តែងាយស្រួល ដោយមិនចាំបាច់ចំណាយពេលវេលានិងថវិកាច្រើនមកដោយផ្ទាល់នោះទេ ជាក់ស្ដែងអ្នកដែលរស់នៅតាមបណ្ដាខេត្តតែម្ដង។
លោកស្ថាបនិកប្រាប់បន្តថា បន្ទាប់ពីសិស្សសម្រេចចិត្តជ្រើសរើសសាកលវិទ្យាល័យណាមួយហើយ ពួកគាត់អាចចុះឈ្មោះនិងដាក់ពាក្យចូលរៀននៅក្នុងសាកលវិទ្យាល័យតាមរយៈវេបសាយបាន ដោយមិនចាំបាច់ចំណាយពេលវេលាមកដោយផ្ទាល់នោះទេ។ ជាការរំពឹងទុករបស់លោកគឺ ចង់ឲ្យវេបសាយមួយនេះដើរតួនាទីសំខាន់ក្នុងការផ្ដល់ព័ត៌មានកាន់តែសម្បូរបែបដល់ប្អូនៗសិស្សនិស្សិត ជាពិសេសអ្នកដែលរស់នៅតាមបណ្ដាខេត្តឆ្ងាយៗ ឲ្យពួកគាត់កាន់តែមានភាពងាយស្រួលបន្ថែមទៀត។
គួរបញ្ជាក់ផងដែរថា វេបសាយ Sala enrollment ត្រូវបានដាក់ឲ្យប្រើប្រាស់ដោយឥតគិតថ្លៃសម្រាប់សិស្សនិស្សិត ដោយរួមមានទាំងខេមរភាសា និងភាសាអង់គ្លេស ដោយបង្ហាញអំពីព័ត៌មានពីសាកលវិទ្យាល័យទាំងរដ្ឋ និងឯកជន រួមនឹងវិទ្យាស្ថាននៅទូទាំងទីក្រុងភ្នំពេញ សរុបចំនួន៤៣កន្លែង៕
ដោយ៖ ជួប ស្រីរ័ត្ន
