បោះបង់ឱកាសការងារល្អនៅបារាំង! កូនខ្មែរម្នាក់យកជំនាញមកបង្កើតក្រុមហ៊ុនជួយប្រជាជន
លោក ចៃ ឡូ ស្ថាបនិកក្រុមហ៊ុន Water Environment (W.E) Venture Co., Ltd (WE Venture) ជាក្រុមហ៊ុនផ្គត់ផ្គង់ប្រព័ន្ធទឹកស្អាតដល់ប្រជាពលរដ្ឋក្នុងសហគមន៍នៅតាមជនបទ រួមនឹងផ្ដល់ការប្រឹក្សាយោបល់ផ្នែកទឹកស្អាត។ ដំណើរការបានរយៈពេលជាង២ឆ្នាំ បច្ចុប្បន្នក្រុមហ៊ុនបានវិនិយោគស្ថានីយទឹកស្អាតមួយកន្លែង ដែលផ្គត់ផ្គង់បានចំនួន២ឃុំនៅក្នុងខេត្តបាត់ដំបង ព្រមទាំងគ្រោងនឹងវិនិយោគបន្ថែមចំនួន៣កន្លែងទៀតក្នុងខេត្តបន្ទាយមានជ័យ។
ងាកទៅមើលប្រវត្តិខ្លះៗរបស់ស្ថាបនិករូបនេះពិតជាគួរឲ្យសរសើរ។ បន្ទាប់ពីបានបញ្ចប់ការសិក្សាថ្នាក់ឧត្ដមសិក្សា នាវិទ្យាស្ថានបច្ចេកវិទ្យាកម្ពុជា ជំនាញជាវិស្វករ ផ្នែកទេពកោសល្យជនបទ ជំនាញបណ្ដាញទឹកស្អាត ក្នុងកំឡុងឆ្នាំ២០០៣ លោក ចៃ ឡូ ជានិស្សិតឆ្នើមដែលមានពិន្ទុល្អ ក៏បានទទួលអាហារូបករណ៍ទៅសិក្សានៅប្រទេសបារាំងរយៈពេល២ឆ្នាំ ផ្នែកគ្រប់គ្រងទឹកស្អាត។ ក្រោយពីបញ្ចប់ថ្នាក់អនុបណ្ឌិតនៅទីនោះ លោកត្រូវបានក្រុមហ៊ុនធំមួយនៅបារាំងផ្ដល់ឱកាសការងារឲ្យ បន្ទាប់ពីការសរសេរនិក្ខេបបទបានយ៉ាងល្អលោក រហូតទទួលបានពានរង្វាន់។
នៅក្នុងកិច្ចសម្ភាសន៍ជាមួយ Bizkhmer លោក ចៃ ឡូ ប្រាប់ថា គោលបំណងទៅសិក្សានៅក្រៅប្រទេសគឺចង់ស្វែងយល់ពីវិធីធ្វើទឹកបែបបច្ចេកវិទ្យាទំនើបរបស់បរទេស ប៉ុន្តែលោកគ្មានបំណងចង់បំពេញការងារនៅទីនោះនោះទេ។ ដោយទឹកចិត្តស្រលាញ់ និងចង់ជួយមាតុភូមិវិញ លោកបានបដិសេធ និងអរគុណដល់ក្រុមហ៊ុនចំពោះការផ្ដល់ឱកាសដល់រូបលោក។
បន្ទាប់ពីមកដល់កម្ពុជា លោកបានចូលបម្រើការងារនៅក្នុងអង្គការដែលទាក់ទងនឹងវិស័យទឹកស្អាតជនបទអស់រយៈពេល១២ឆ្នាំ តាំងពីជាគម្រោងចាប់ផ្ដើមដំបូង (Start up) រហូតពង្រីកបានទូទាំងប្រទេស។ ក្រោយមក នៅក្នុងខែតុលា ឆ្នាំ២០១៧ លោកក៏បានបង្កើតក្រុមហ៊ុន WE Venture ឡើង ក្នុងគោលបំណង ជួយផ្គត់ផ្គង់ទឹកស្អាតជូនប្រជាជនកម្ពុជា។ ជាគោលបំណង លោកនឹងធ្វើឲ្យ WE Venture ក្លាយជាក្រុមហ៊ុនធំជាងគេលើវិស័យផ្គត់ផ្គង់ទឹកស្អាតនៅកម្ពុជា៕
ដោយ៖ ជួប ស្រីរ័ត្ន
