ក្រុមហ៊ុនជប៉ុនមួយ គ្រោងបង្កើតរោងចក្រច្នៃគ្រាប់ស្វាយចន្ទីស្តង់ដារអន្តរជាតិនៅកម្ពុជា
នៅក្នុងជំនួបជាមួយឯកឧត្ដម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២៤ ខែតុលា ឆ្នាំ២០១៩កន្លងទៅ លោក Murayama Tsetuo នាយកក្រុមហ៊ុន Top Planning Japan Co., Ltd បានបង្ហាញពីឆន្ទៈចង់បង្កើតរោងចក្រកែច្នៃគ្រាប់ស្វាយចន្ទីរបស់កម្ពុជាក្នុងកម្រិតស្តង់ដារអន្តរជាតិ។ នេះបើយោងតាមការផ្សាយរបស់ក្រសួងកសិកម្ម រុក្ខាប្រមាញ់ និងនេសាទ។
នៅក្នុងឱកាសនៃជំនួបនេះ លោក Murayama Tsetuo បានលើកឡើងថា «កន្លងមកនេះ ដោយទទួលបានការជួយឧបត្ថម្ភគាំទ្រពីអង្គការ JICA ក្រុមហ៊ុនបានធ្វើការសិក្សាស្រាវជ្រាវអំពីសក្ដានុពលដំណាំស្វាយចន្ទីកម្ពុជា ហើយលទ្ធផលនៃការសិក្សាគឺបានធ្វើតេស្តសាកល្បងរសជាតិគ្រាប់ស្វាយចន្ទីផលិតនៅកម្ពុជាដោយប្រជាជនជប៉ុនបង្ហាញថា គ្រាប់ស្វាយចន្ទីកម្ពុជាមានរសជាតិឆ្ងាញ់ជាងគ្រាប់ស្វាយចន្ទីរបស់វៀតណាម ឥណ្ឌា និងអាហ្វិក»។
លោកបន្តថា «ដោយសារតែមើលឃើញពីគុណភាព អនាម័យ បរិមាណផលិត ការប្រើប្រាស់បច្ចេកវិទ្យាដាំដុះ និងកែច្នៃផលិតផលគ្រាប់ស្វាយចន្ទីរបស់កម្ពុជានៅមានកម្រិតនៅឡើយ ទើបជំរុញឲ្យក្រុមហ៊ុនមានឆន្ទៈចង់បង្កើតរោងចក្រកែច្នៃគ្រាប់ស្វាយចន្ទីកម្ពុជាឲ្យក្លាយជាផលិតផលដែលមានស្តង់ដារកម្រិតអន្តរជាតិ ដើម្បីឈានទៅលើកកម្ពស់បរិមាណ គុណភាព និងអនាម័យគ្រាប់ស្វាយចន្ទីកម្ពុជាឲ្យស្ថិតក្នុងចំណាត់ថ្នាក់ពិភពលោកនាពេលអនាគត»។
ជាការឆ្លើយតប ឯកឧត្ដមរដ្ឋមន្រ្តីបានថ្លែងអំណរគុណជូនចំពោះប្រជាជន និងរាជរដ្ឋាភិបាលជប៉ុន ដែលបានជួយគាំទ្រដល់ការអភិវឌ្ឍប្រទេសកម្ពុជាឲ្យមានការរីកចម្រើនតាមរយ:គម្រោងអភិវឌ្ឍលើគ្រប់វិស័យ ក្នុងនោះក៏មានវិស័យកសិកម្មផងដែរ។ លោកបានបន្តទៀតថា តាមរយៈបទពិសោធន៍ដែលក្រុមហ៊ុនមានស្រាប់ សង្ឃឹមថាគម្រោងនេះនឹងដំណើរការទៅដោយរលូន ហើយក្រសួងក៏ដូចជាអង្គភាពពាក់ព័ន្ធនឹងរង់ចាំផ្ដល់កិច្ចសហការពេញលេញ ដើម្បីឲ្យការវិនិយោគនេះសម្រេចទទួលបានជោគជ័យតាមការគ្រោងទុក៕
