រយៈពេល ៩ខែខុងក្រោយុ ឆ្នាំ២០១៩ រាជរដ្ឋាភិបាលប្រមូលចំណូលថវិកាសរុបបាន៩០ភាគរយ
គិតមកដល់រយៈពេល៩ខែ នាឆ្នាំ២០១៩នេះ រាជរដ្ឋាភិបាលកម្ពុជាបានប្រមូលចំណូលថវិការដ្ឋសរុបបានរហូតដល់៩០% បើធៀបនឹងច្បាប់ថវិកាឆ្នាំ២០១៩ ដោយក្នុងនោះចំណូលដែលបានមកពីការប្រមូលពន្ធគយនិងរដ្ឋាករបានចំនួន៤៣%។ នេះបើតាមការឲ្យដឹងពី ក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី៣០ ខែតុលា ឆ្នាំ២០១៩កន្លងទៅ។
ទិន្នផលចំណូលនៃចំនួនថវិការដ្ឋបានមកអំពីការប្រមូល ពន្ធគយនិងរដ្ឋាករបានចំនួន ៤៣%, ពន្ធដារបានប្រមាណ ៣២%, ចំណូលមិនមែនសារពើពន្ធបានចំនួន ១២% រួមនឹងចំណូលផ្សេងៗទៀតមានចំនួន ៦%។ជាមួយគ្នានេះ តាមរយៈរបាយការណ៍បូកសរុបនៅក្នុងត្រីមាសទី៣ ឆ្នាំ២០១៩នេះ បង្ហាញថា គ្រប់ផ្នែកនៃផែនការសកម្មភាព រួមនៃការងារកែទម្រង់ការគ្រប់គ្រងហិរញ្ញវត្ថុ សាធារណៈបន្តមានវឌ្ឍនភាពល្អ និងវិជ្ជមាន។ ជាទូទៅការប្រមូលចំណូល និងការអនុវត្តចំណាយ នៅបន្តមានសុខភាពល្អធៀបនឹងឆ្នាំមុនៗ និងនៅរក្សាបាន និន្នាការល្អប្រសើរទៅតាមការគ្រោងទុក។
លោកឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានណែនាំ អំពីកិច្ចការគន្លឹះៗមួយចំនួនទៀត ត្រូវបន្តពង្រឹងក្នុងអនុវត្តន៍ កសាង និងរៀបចំបញ្ចប់ រួមមានជាអាទ៍ ការរៀបចំបញ្ចប់លិខិតបទដ្ឋានគតិយុត្តិ ពាក់ព័ន្ធនឹងការគ្រប់គ្រងចំណូលមិនមែនសារពើពន្ធ។ ការគ្រប់គ្រងទ្រព្យសម្បត្តិរដ្ឋ។ ផែនការសកម្មភាពលម្អិតសម្រាប់អនុវត្តយុទ្ធសាស្ត្រគន្លឹះៗ នានា ដូចជា យុទ្ធសាស្ត្រកែទម្រង់ប្រព័ន្ធលទ្ធកម្មសាធារណៈឆ្នាំ២០១៩-២០២៥ យុទ្ធសាស្ត្រកែទម្រង់ប្រព័ន្ធថវិកា រដ្ឋបាលថ្នាក់ក្រោមជាតិឆ្នាំ២០១៩-២០២៥, យុទ្ធសាស្ត្រកៀរគរចំណូល២០១៩-២០២៣ និងអនុក្រឹត្យស្តីពី ការគ្រប់គ្រងគម្រោងវិនិយោគសាធារណៈជាដើម៕
ដោយ៖ ជួប ស្រីរ័ត្ន
