តំបន់សេដ្ឋកិច្ចពិសេសស្វាយរៀងទទួលគម្រោងរោងចក្រ២បន្ថែមក្នុងទំហំទុនជាង១១លានដុល្លារ
ក្រុមប្រឹក្សាអភិវឌ្ឍន៍កម្ពុជា (CDC) សម្រេចចេញវិញ្ញាបនបត្រចុះបញ្ជីជាស្ថាពរដល់ក្រុមហ៊ុនចំនួន២ លើគម្រោងរោងចក្រផលិតអំពូលភ្លើង និងរោងចក្របង្គុំ និងដំឡើងសម្ភារៈអេឡិចត្រូនិក ដែលមានទីតាំងស្ថិតនៅតំបន់សេដ្ឋកិច្ចពិសេសខេត្តស្វាយរៀង ក្នុងទំហំទុនវិនិយោគ ១០,៧៨លានដុល្លារអាមេរិក និងអាចបង្កើតឱកាសការងារដល់ពលរដ្ឋបានចំនួន ១.៨៤០កន្លែង។
ក្រុមហ៊ុន -“CHEN BROTHERS LIGHTING CO., LTD.”: គម្រោងបង្កើតរោងចក្រផលិតអំពូលភ្លើងលំអ ផ្លិតទឹកជូតកញ្ចក់រថយន្ត និងតម្រង់ខ្យល់, មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសស្វាយរៀងហ្គីហ្គា រីសស៍ ខេត្តស្វាយរៀង, មានទុនវិនិយោគប្រមាណ ១,៧១លានដុល្លារអាមេរិក និងអាចបង្កើតការងារបានចំនួន ៣៤០កន្លែង។
ក្រុមហ៊ុន “QUNYOU (CAMBODIA) ELECTRIC APPLIANCE CO., LTD.”: គម្រោងបង្កើតរោងចក្របង្គុំ និងដំឡើងសម្ភារៈអេឡិចត្រូនិកប្រើប្រាស់ក្នុងផ្ទះ, មានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេសស្វាយរៀងហ្គីហ្គា រីសស៍ ខេត្តស្វាយរៀង, មានទុនវិនិយោគប្រមាណ ៩,០៧លានដុល្លារអាមេរិក និងអាចបង្កើតការងារបានចំនួន ១.៥០០កន្លែង៕
ដោយ៖ ជួប ស្រីរ័ត្ន
