ទុនវិនិយោគវៀតណាមនៅកម្ពុជាកើនបានដល់ជាង៣ពាន់លានដុល្លារអាមេរិក
បច្ចុប្បន្នប្រទេសវៀតណាមមានគម្រោងវិនិយោគនៅកម្ពុជាចំនួន ២១៤ម្រោង សរុបទំហំទុនវិនិយោគមានចំនួន ៣,៣ពាន់លានដុល្លារអាមេរិក ដែលធ្វើឲ្យវៀតណាមស្ថិតក្នុងប្រទេសមួយក្នុងចំណោមប្រទេសចំនួន៥ ដែលវិនិយោគច្រើនជាងគេបំផុតនៅកម្ពុជា។ នេះបើតាមការលើកឡើងរបស់ លោក ជីញ ឌិញ ស៊ុង (TRINH DINH DUNG) ឧបនាយករដ្ឋមន្ត្រីប្រទេសវៀតណាម ក្នុងឱកាសសម្ពោធផ្សារដោះដូរទំនិញកម្ពុជា-វៀតណាម នៅព្រំដែនកម្ពុជា-វៀតណាម ខេត្តត្បូងឃ្មុំ កាលពីព្រឹកថ្ងៃទី២៤ ខែធ្នូ ឆ្នាំ២០១៩ កន្លងទៅ។
ក្នុងឱកាសនោះ លោកឧបនាយករដ្ឋមន្ត្រីវៀតណាម បានលើកឡើងបន្ថែថា តាមការព្យាករណ៍ទំហំពាណិជ្ជកម្មរវាងប្រទេសទាំងពីនឹងកើនឡើងដល់ ៥ពាន់លានដុល្លារអាមេរិក នៅឆ្នាំ២០២០ខាងមុខ។ ទន្ទឹមគ្នានេះផងដែរ សម្ដេចនាយករដ្ឋមន្ត្រី ហ៊ុន សែន ក៏បានលើកឡើងផងដែរថា ទំហំពាណិជ្ជកម្មទ្វេភាគីរវាងកម្ពុជាវៀតណាមដែលមានចំនួន ៤៦០០លានដុល្លារ ជាជើងលេខដែលកត់ដោយគយ ប៉ុន្តែនៅមានជើងលេខច្រើនទៀតដែលមិនបានកត់ត្រាដោយគយ ដូច្នេះទំហំពាណិជ្ជកម្មកម្ពុជា-វៀតណាមគឺមានច្រើនជាង ៥ពាន់លានដុល្លារ បាត់ទៅហើយ។
តាមរយៈរបាយការណ៍ពីអាជ្ញាធរវៀតណាមបានឲ្យដឹងថា កាលពីចុងឆ្នាំ២០១៨ កន្លងទៅ ក្រុមហ៊ុនរបស់វៀតណាមដែលបានមកវិនិយោគនៅកម្ពុជា មានទំហំទឹកប្រាក់សរុបប្រមាណ ៣ពាន់លានដុល្លារអាមេរិក ជាមួយនឹងគម្រោងវិនិយោគសរុបប្រមាណ ២០០ គម្រោង ដែលបានធ្វើឲ្យវៀតណាមក្លាយជាប្រទេសមួយក្នុងចំណោម៥ប្រទេសដែលមានដើមទុនវិនិយោគច្រើនជាងគេនៅកម្ពុជា។
យោងតាមគេហទំព័រ Vietnamplus រហូតមកទល់ពេលនេះការវិនិយោគរបស់វៀតណាមនៅកម្ពុជាមាន ២១៤ គម្រោងដែលស្មើនឹងទុនវិនិយោគជាង ៣ ពាន់លានដុល្លារក្នុងនោះ ១៧៦ គម្រោងកំពុងមានសុពលភាពជាមួយនឹងទុនវិនិយោគសរុប ២,៧៧ ពាន់លានដុល្លារ។ ចំណែកឯការវិនិយោគរបស់កម្ពុជានៅវៀតណាមមាន ២១ គម្រោងដែលមានទុនវិនិយោគសរុបជិត ៦៤ លានដុល្លារជាប់លេខ ៥៤ ក្នុងចំណោមប្រទេសចំនួន ១៣២ ដែលបានបណ្តាក់ទុននៅវៀតណាម៕
ដោយ៖ ជួប ស្រីរ័ត្ន
