វៀតណាមគ្រោងចាប់យកភ្ញៀវទេសចរអន្តរជាតិឲ្យបានជាង ២០លាននាក់នៅឆ្នាំ២០២០
វិស័យទេសចរណ៍វៀតណាមបានចូលរួមចំណែកយ៉ាងសកម្ម ក្នុងការជួយបង្កើនកំណើនសេដ្ឋកិច្ចជាតិ ដោយក្នុងនោះវិស័យនេះបានចូលរួមចំណែកប្រមាណជាង ៦ភាគរយ ជារៀងរាល់ឆ្នាំទៅក្នុង GDP(ផលិតផលក្នុងស្រុកសរុប) ស្របគ្នានេះដែរវៀតណាមគ្រោងនឹងស្រូបទាញភ្ញៀវទេសចរអន្តរជាតិឲ្យបានប្រមាណ ២០,៥លាននាក់ឯណោះនៅឆ្នាំ២០២០ខាងមុខ។ នេះបើយោងតាមសារព័ត៌មាន VIETNAM+ បានចេញផ្សាយកាលពីពេលកន្លងទៅ។
វិស័យទេសចរណ៍វៀតណាមបានដាក់នូវចេញយុទ្ធសាស្ត្រគោលដៅ ទាក់ទាញភ្ញៀវទេសចរណ៍អន្តរជាតិឲ្យបាន ២០,៥លាននាក់នៅឆ្នាំ២០២០ និងភ្ញៀវទេសចរណ៍ក្នុងស្រុកប្រមាណ ៩០លាននាក់។ នេះបើតាមការលើកឡើងនៅក្នុងកិច្ចប្រជុំនៃរដ្ឋបាលជាតិទេសចរណ៍វៀតណាម (VNAT) នាទីក្រុងហាណូយកាលពីថ្ងៃទី២៣ ខែធ្នូ ឆ្នាំ២០១៩។
តាមការឲ្យដឹងពី VNAT នៅក្នុងឆ្នាំ២០១៩វៀតណាមបានទទួលភ្ញៀវទេសចរបរទេសចំនួន ១៨លាននាក់ ដែលបានកើនឡើងចំនួន ១៦ភាគរយ បើធៀបនឹងតួលេខក្នុងឆ្នាំ២០១៨ ខណៈទេសចរក្នុងស្រុកក្នុងឆ្នាំ២០១៩មានចំនួន ៨៥លាននាក់ កើនឡើង ៦ភាគរយ។
គួរបញ្ជាក់ផងដែរថា វិស័យទេសចរណ៍វៀតណាមរកចំណូលបានជាង ៧២០ពាន់ពាន់លានដុង (ជិត ១៦,៧ពាន់លានដុល្លារ) ពោលគឺកើនឡើង ១៦ភាគរយ ក្នុងមួយឆ្នាំ។ វៀតណាមមានកំណើនភ្ញៀវទេសចរក្នុងរយៈពេល ៣ឆ្នាំជាប់ៗគ្នា ពោលគឺចាប់ពីឆ្នាំ២០១៦ មានចំនួន ២២ភាគរយ ក្នុងមួយឆ្នាំ ដែលធ្វើឲ្យវៀតណាមស្ថិតក្នុងចំណោម ១០ប្រទេស ដែលមានកំណើនភ្ញៀវទេសចរខ្ពស់បំផុតនៅលើពិភពលោក៕
ដោយ៖ ជួប ស្រីរ័ត្ន
