អ្នកជំនាញ៖ កម្មករប្រមាណ៨០ម៉ឺននាក់អាចនឹងបាត់បង់ការងារ ប្រសិនកម្ពុជាបាត់បង់EBA
EBA «ប្រព័ន្ធអនុគ្រោះពន្ធគ្រប់មុខទំនិញលើកលែងតែសព្វាវុធ Everything but not Arm» របស់សភាពអឺរ៉ុប(EU) និងត្រូវវាយតម្លៃឈានដល់ការធ្វើសេចក្ដីសម្រេចចិត្តជាផ្លូវការនៅថ្ងៃទី ១២ កុម្ភៈ ឆ្នាំ២០២០ខាងមុខនេះហើយ។ ជុំវិញបញ្ហា EBA នេះដែរ អ្នកជំនាញសេដ្ឋកិច្ច លោក ង៉ែត ជូ បានលើកឡើងថា ប្រសិនបើសហភាពអឺរ៉ុបសម្រេចដក EBA ពីកម្ពុជា កម្មករប្រមាណ៨០ម៉ឺននាក់អាចនឹងប្រឈមនឹងការបាត់បង់ការងារ។
ឆ្លើយប្រាប់គេហទំព័រ Bizkhmer លោក ង៉ែត ជូ បានលើកឡើងថា កម្មករប្រមាណ៨០ម៉ឺននាក់ អាចប្រឈមនឹងការបាត់បង់ការងារធ្វើ ប្រសិនបើកម្ពុជាបាត់បង់ប្រព័ន្ធអនុគ្រោះពន្ធ EBA ដូច្នេះប្រសិនបើកម្មករប្រមាណជាជិត១លាននាក់នេះបាត់បង់ការងារ ដោយយើងគិតតែប្រាក់ខែគោលចំនួន១៩០ដុល្លារក្នុងមួយខែ នោះក្នុង១ខែយើងអាចនឹងបាត់បង់ចំណូលរហូតដល់ ១៥២លានដុល្លារ ហើយប្រសិនបើគិតជាចំណូលប្រចាំឆ្នាំវិញគឺយើងនឹងបាត់បង់ប្រមាណជា ១៨៤២លានដុល្លារអាមេរិកឯណោះ។
ទោះជាយ៉ាងនេះក្ដី ផលប៉ះពាល់ដែលកើតឡើងពីប្រព័ន្ធអនុគ្រោះពន្ធ EBA នៅមិនទាន់ចេញជាផ្លូវការនៅឡើយទេ ថាវាមានផលប៉ះពាល់កម្រិតណាដល់សេដ្ឋកិច្ចកម្ពុជា។ យោងតាមកាសែត កោះសន្តិភាព លោក កាំង ម៉ូនីកា អគ្គលេខាធិការងនៃសមាគមរោងចក្រកាត់ដេរនៅកម្ពុជា(GMAC) មានប្រសាសន៍ថា« ខ្ញុំតែងតែមានទំនុកចិត្តថានឹងមិនមានការដកទាំងស្រុងទេ។ ខ្ញុំកាន់តែមានទំនុកចិត្តបើនិយាយពីការអនុវត្តន៍លក្ខខណ្ឌការងារ និងការគោរពសិទ្ធិការងារចំពោះកម្មករនិយោជិកក្នុងវិស័យកាត់ដេរសម្លៀកបំពាក់ ផលិតស្បែកជើង និងផលិតផលធ្វើដំណើរ»។
ជុំវិញបញ្ហានេះផងដែរ មន្ត្រីជាន់ខ្ពស់នៃក្រសួងសេដ្ឋកិច្ចនិងហិរញ្ញវត្ថុធ្លាប់បានលើកឡើងថាការដកប្រព័ន្ធអនុគ្រោះពាណិជ្ជកម្មគ្រប់មុខទំនិញលើកលែងតែអាវុធ (EBA) របស់សហភាពអឺរ៉ុបEUអាចជះឥទ្ធិពលអវិជ្ជមានដល់ការនាំចេញរបស់កម្ពុជាមានប្រមាណ៥០០លានដុល្លារអាមេរិកនិងប៉ះពាល់ដល់ការងារក្នុងស្រុកប្រហែល៣ម៉ឺននាក់។
គួរបញ្ជាក់ផងដែរថា នាថ្ងៃទី១២ ខែកុម្ភៈ ឆ្នាំ២០២០ខាងមុខនេះ សហភាពអឺរ៉ុបនឹងធ្វើការសម្រេចចិត្តចុងក្រោយ ថាតើនឹងត្រូវបន្តផ្ដល់ប្រព័ន្ធអនុគ្រោះពាណិជ្ជកម្មEBAដល់កម្ពុជាទៀតឬយ៉ាងណា បន្ទាប់ពីការវាយតម្លៃលើស្ថានភាពគោរពសិទ្ធិមនុស្សនៅកម្ពុជា៕
ដោយ៖ ជួប ស្រីរ័ត្ន
