កាល​ពី​ថ្ងៃ​ទី១២ ខែ​កុម្ភៈ ឆ្នាំ​២០២០ កន្លង​ទៅ គណៈកម្មការអឺរ៉ុប បាន​សម្រេច​ដកប្រព័ន្ធ​អនុគ្រោះ​ពន្ធអ្វីគ្រប់យ៉ាង​លើក​លែង​តែ​អាវុធ (EBA) លើ​ផ្នែកខ្លះ​ចេញ​ពី​កម្ពុជា​ ដែល​មាន​ទំហំ​សរុប​ប្រមាណ​ ២០ភាគរយ។ 

ជុំវិញ​បញ្ហា​នេះ​ផង​ដែរ អ្នក​ជំនាញ​សេដ្ឋកិច្ច លោក​បណ្ឌិត ចាន់ សុផល បាន​បង្ហោះ​នៅ​លើ​គណនេយ្យ​ហ្វេសប៊ុក​របស់​លោក​ថា កម្ពុជា​ត្រូវ​បង់​ពន្ធ​លើ​ទំនិញ​នាំ​ទៅ​អឺរ៉ុប​ចំនួន ២០% នៃ​ទំនិញ​នាំ​ចេញ​សរុប​ ដែល​វា​មាន​កម្រិត​ប្រហែល ១០០លានដុល្លារ ក្នុង​១ឆ្នាំ វា​ត្រូវ​ជា ១,២% នៃ​ចំណាយ​ថវិកា​ជាតិ និង​ត្រូវ​ជា ០,៣៥% នៃ​ផលិតផល​សរុប​ក្នុង​ស្រុក (GDP)។ វា​មិន​ធ្វើ​ឱ្យ​សេដ្ឋកិច្ច​ថមថយ​ខ្លាំង ឬ​ក៏​ដួល​រលំ​នោះ​ទេ។ 

(រូបភាព៖ Sophal Chan)

លោក​បណ្ឌិត​បាន​រៀបរាប់​យ៉ាង​ដូច្នេះ​ថា «តាម​ការ​វាយ​តម្លៃ​ជា​បឋម​របស់​ខ្ញុំ  ពន្ធ​លើ​ទំនិញ​២០%នេះ មាន​កម្រិត​ប្រហែល ១០០លានដុល្លារ ក្នុង១ឆ្នាំ។ បរិមាណ​នេះ មិន​ច្រើន​ពេក​ទេ​បើ​គិត​ក្នុង​បរិបទ​សេដ្ឋកិច្ច​កម្ពុជា​បច្ចុប្បន្ន។ វា​ត្រូវ​ជា ១,១% នៃ​ការ​នាំ​ចេញ​សម្លៀក​បំពាក់​និង​ស្បែក​ជើង​សរុប។ វា​ត្រូវ​ជា ១,២% នៃ​ចំណាយ​ថវិកា​ជាតិ និង​ត្រូវ​ជា ០,៣៥% នៃ​ផលិតផល​សរុប​ក្នុង​ស្រុក (GDP)។ វា​មិន​ធ្វើ​ឱ្យ​សេដ្ឋកិច្ច​ថមថយ​ខ្លាំង ឬ​ក៏​ដួល​រលំ​នោះ​ទេ»។ 

លោក​បញ្ជាក់​បន្ថែម​ថា ខ្ញុំ​យល់​ថា វា​ជា​ឱកាស​ល្អ​សម្រាប់​កម្ពុជា (ទាំង​រដ្ឋាភិបាល​  ទាំង​វិស័យ​ឯកជន ទាំង​កម្មករ) ដែល​ត្រូវ​រៀន​រស់​ដោយ​គ្មាន​ភាព​អនុគ្រោះ​ពី​គេ ជា​បណ្តើរៗ​ព្រោះ​ថា ៥ឆ្នាំទៀត គេ​នឹង​តម្រូវ​ឱ្យ​បង់​ពន្ធ ១០០% ហើយ ខណៈ​ដែល​កម្ពុជា​ជាក់​ច្បាស់​ថា​បាន​រីកចម្រើន​ឡើង​ផុត​ពី​ចំណោម​ប្រទេស​ដែល​មាន​ការ​អភិវឌ្ឍ​តិចតួច (Least Developed Countries – LDCs)។

អ្នក​ជំនាញ​បន្ថែម​ថា ភាព​អនុគ្រោះ​ពន្ធ​នេះ គេ​ឱ្យ​សម្រាប់​តែ​ប្រទេស LDCs ដែល​បច្ចុប្បន្ន​នេះ​ មាន​ចំនួន​៤៨ ក្នុង​ចំណោម​ជាង ២០០ប្រទេស ក្នុង​ពិភពលោក​ទាំង​មូល។ ម្នាក់ៗ​តែង​តែ​ចង់​ឱ្យ​ប្រទេស​ខ្លួន​ឡើង​ជា​ប្រទេស​មាន​ចំណូល​មធ្យម និង​ចំណូល​ខ្ពស់។ ដូចនេះ​ យើង​ត្រូវ​តែ​ខំ​ប្រឹងប្រែង​ទាំង​អស់​គ្នា​ឡើង។

គួរ​បញ្ជាក់​ផង​ដែរ​ថា ជា​នីតិវិធី បើ​គណៈកម្មការ​អឺរ៉ុប ពិត​ជា​ព្យួរ​មែន រយៈពេល​៦​ខែក្រោយ ទើប​ការសម្រេច​នោះ ចូល​ជា​ធរមាន នោះ​មាន​ន័យ​ថា សហភាព​អឺរ៉ុប នឹង​ចាប់​ផ្តើម​យក​ពន្ធ​លើ​ការ​នាំចូល​ទំនិញ​ពី​កម្ពុជា នៅ​ខែ​សីហា ឆ្នាំ​២០២០​នេះ៕

ដោយ៖ ជួប ស្រីរ័ត្ន