ឆ្នេររាមនឹងប្រែមុខមាត់ជាក្រុងទេសចរណ៍ខ្នាតយក្សលេចធ្លោ ក្រោមទុនវិនិយោគ១៦ពាន់លានដុល្លារ
គម្រោងអភិវឌ្ឍន៍ទេសចរណ៍ «ទីក្រុងរាម» ដែលស្ថិតនៅតំបន់ទេសចរណ៍នាគរាជ ក្នុងខេត្តព្រះសីហនុ របស់ក្រុមហ៊ុនធំមួយឈ្មោះថា ខានូពី ស៊ែន ឌីវែឡុបមិន ឯ.ក (CANOPY SENDS DEVELOPMENT COL.,TD) ក្រោមទុនវិនិយោគរហូតដល់ ១៦ពាន់លានដុល្លារអាមេរិក ដោយគ្រោងនិងសាងសង់លាតសន្ធឹងលើផ្ទៃដីជាង ៨០០ហិកតា ត្រូវបានក្រសួងអនុម័តគាំទ្រ។
នេះដោយយោងតាមសេចក្ដីប្រកាសរបស់ក្រសួងរៀបចំដែនដី នគរូបនីយកម្មនិងសំណង់ ក្នុងកិច្ចប្រជុំរវាង ក្រសួងរៀបចំដែនដី នគរូបនីយកម្ម និងសំណង់ និងអន្តរក្រសួង ក្រោមអធិបតីភាពរបស់ ឯកឧត្តម ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី ១៤ កុម្ភៈ កន្លងទៅ។
គម្រោងនេះត្រូវបានបែងចែកជាដំណាក់កាល ដោយនឹងត្រូវអនុវត្តគម្រោងនាដើមឆ្នាំ២០២០ ដោយរៀបចំហេដ្ឋារចនាសម្ព័ន្ធ និងសំណង់ដូចជា សណ្ឋាគារ ភោជនីយដ្ឋាន អាហារដ្ឋាន អាគារស្នាក់នៅ និងសាលប្រជុំនានាជាដើម ដោយនឹងត្រូវរៀបចំឆ្នេរស្រស់ស្អាតពីរកន្លែងដើម្បីប្រើប្រាស់ជាសាធារណៈ សម្រាប់អភិវឌ្ឍន៍តំបន់នោះផង និងសម្រាប់សាធារណៈជនចូលមកតំបន់នោះផង។
គួរបញ្ជាក់ផងដែរថា គម្រោងទីក្រុងរាម គឺជាផ្នែកមួយនៃគម្រោងអភិវឌ្ឍន៏ទេសចរណ៍ពិសិដ្ឋនាគរាជ របស់ក្រសួងទេសចរណ៍ ដែលលាតសន្ធឹងលើផ្ទៃដីទំហំប្រមាណ ៣ ០៨១ ហិកតា ។ គម្រោងនាគរាជនេះ មានទីតាំងស្ថិតនៅ ឃុំរាម និងឃុំបិតត្រាំង ស្រុកព្រៃនប់ ខេត្តព្រះសីហនុ និងជាប់ជាមួយក្រុងព្រះសីហនុ ដែលនឹងតភ្ជាប់ឆ្នេរសមុទ្ររាម ឆ្នេរអូរត្រេះ ឆ្នេរអូរឈើទាល ក៏ដូចជាព្រលានយន្តហោះ ទៅជាតំបន់សក្តានុពលសេដ្ឋកិច្ចដ៏ធំមួយ៕
ដោយ៖ ជួប ស្រីរ័ត្ន
