នាយករដ្ឋមន្ត្រី៖ ដំណក់ប្រេងដំបូង និងរ៉ែមួយចំនួននឹងត្រូវប្រើប្រាស់ក្នុងឆ្នាំ២០២០នេះ
អញ្ជើញថ្លែងសារពិសេសមួយជូនជនជាតិខ្មែរទាំងអស់ ពាក់ព័ន្ធស្ថានភាពថ្មីៗចុងក្រោយនា វិមានសន្តិភាព រាជធានីភ្នំពេញ នាព្រឹកថ្ងៃទី ២៤ ខែកុម្ភៈ ឆ្នាំ២០២០ នេះ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា មានប្រសាសន៍បង្ហើបពីដំណើរការនៃដំណក់ប្រេងដំបូង រួមជាមួយនឹងរ៉ែមួយចំនួនរបស់កម្ពុជា ថានឹងដំណើរការនៅក្នុងឆ្នាំ២០២០នេះ។
សម្ដេចនាយករដ្ឋមន្ត្រី មានប្រសាសន៍លើកឡើងថា កម្ពុជានឹងពន្លឿនការផលិតប្រេង នៅក្នុងឆ្នាំ២០២០នេះ ហើយរ៉ែមួយចំនួនដែលកម្ពុជាមិនទាន់បានប្រើ ក៏និងអាចយកមកប្រើប្រាស់នៅក្នុងឆ្នាំ២០២០នេះផងដែរ។ រ៉ែមួយចំនួនដូចជា រ៉ែមាស រហូតដល់រ៉ែធ្យូងថ្មជាដើម ដែលទើបតែត្រូវបានអនុម័តកាលពីប៉ុន្មានថ្ងៃមុននេះ គឺនិងត្រូវឲ្យផលិតអគ្គិសនីនៅនឹងកន្លែងធ្យូងថ្ម ដែលមានស្រាប់នោះតែម្ដង។
សម្ដេចបញ្ជាក់បន្តថា កម្ពុជាមានចំណូលសារពើពន្ធ ពីពន្ធដារ និងពន្ធគយ ដែលជាមធ្យមទទួលបានចំណូលប្រមាណ ៥០០លានដុល្លារ ក្នុងមួយខែ។ គិតត្រឹមតែចំណូលសារពើពន្ធប្រមាណ ៥០០លានដុល្លារ ក្នុងមួយខែនេះ កម្ពុជាអាចយកទៅគ្រប់គ្រងទៅលើការចំណាយចរន្តបាន ដោយនេះមិនទាន់បានប្រកាសប្រាប់ ពីពេលវេលាច្បាស់លាស់នៃដំណើរការដំណក់ប្រេងដំបូងរបស់កម្ពុជាផង។
ឯកឧត្ដម ស៊ុយ សែម រដ្ឋមន្ត្រីក្រសួងរ៉ែនិងថាមពល ធ្លាប់បានលើកឡើងក្នុងសម័យប្រជុំពេញអង្គអង្គព្រឹទ្ធសភា កាលពីពេលកន្លងទៅថា បច្ចុប្បន្ននេះកម្ពុជាមានតំបន់ដែលអាចរុករកចំនួន៣កន្លែង គឺតំបន់សមុទ្រ តំបន់ដីគោក និងតំបន់ត្រួតស៊ីគ្នារវាងព្រំដែនសមុទ្រកម្ពុជា – ថៃ ។ ឯកឧត្ដមបញ្ជាក់ថា ផ្អែកទាំងស្រុងលើលក្ខខណ្ឌភូគព្ភសាស្ត្រទាំងដែនគោក និងដែនដែនសមុទ្រ មកដល់បច្ចុប្បន្ននេះកម្ពុជាមានប្លុកប្រេងកាតចំនួន២៥ ក្នុងនោះដែនសមុទ្រ៦ប្លុក ដែនគោក១៩ប្លុក និង៤តំបន់នៅដែនសមុទ្រត្រួតគ្នារវាងកម្ពុជា-ថៃ ៕
ដោយ៖ ជួប ស្រីរ័ត្ន
